ޑިސްޕޮސަބްލް އީ-ސިނގިރެޓް މަނާކުރި އީޔޫގެ ފުރަތަމަ ގައުމަކަށް ބެލްޖިއަމް

އެކި ރަހަތަކުގައި، ފުރާވަރުގެ ކުދިންނާއި ޒުވާނުން ޝައުގުވެރިވާ ގޮތަށް މާކެޓްކުރަމުން ގެންދާ ޑިސްޕޮސަބްލް އީ-ސިނގިރެޓް މަނާކުރާ ޔޫރަޕިއަން ޔުނިއަން (އީޔޫ) ގެ ފުރަތަމަ ގައުމަކަށް ބެލްޖިއަމް ވެއްޖެ އެވެ.

އެއްފަހަރު ބޭނުންކޮށްފައި އުކާލާ ވޭޕް ވިއްކުން މާދަމާއިން ފެށިގެން ބެލްޖިއަމްގައި މަނާ ވާއިރު އެއީ ދުންފަތުގެ އިސްތިއުމާލު ކުރުން ހުއްޓުވުމުގެ ގައުމީ ޕްލޭނެއްގެ ދަށުން، ޒުވާނުންގެ ސިއްހަތު ރައްކާތެރި ކުރުމުގެ ގޮތުން އެޅި ފިޔަވަޅެކެވެ.

އީޔޫގެ އަމާޒަކީ ދުންފަތުގެ އިސްތިއުމާލު ނުކުރާ ޖީލެއް 2040 ވަނަ އަހަރުގެ ނިޔަލަށް ބިނާކޮށް، 27 ގައުމު ހިމެނޭ ބްލޮކްގެ އާބާދީގައި މިހާރު ތިބި ދުންފަތުގެ އިސްތިއުމާލުކުރާ ގާތްގަނޑަކަށް 25 ޕަސެންޓް ފަސް ޕަސެންޓަށް ދަށްކުރުމެވެ.

އީޔޫގެ ބައެއް ގައުމުތަކުން ވަނީ މިއަށްވުރެ ކުރިން މި ލަނޑުދަނޑި ހާސިލްކުރުމަށް އަމާޒު ހިފައިފަ އެވެ.

އާންމު ގޮތެއްގައި ވޭޕް ޕްރޮމޯޓްކުރަނީ އާންމުކޮށް ބޭނުންކުރާ ސިނގިރޭޓަށް ވުރެ ނުރައްކާ ކުޑަ އެއްޗެއްގެ ގޮތުގަ އެވެ. ރީތި ކުލަަތަކުގެ ޕެކޭޖިން އާއި މީރު ރަހަތަކާ އެކު މިއީ ދުމުގެ ނުބައި ވަހުން ސަލާމަތްކޮށްދޭ އެއްޗެއްގެ ގޮތުގައި ފުރާވަރުގެ ކުދިންނާއި ޒުވާނުންނަށް މި ޕްރޮމޯޓްކުރެ އެވެ.

ނަމަވެސް އީ-ސިނގިރޭޓުގައި ވެސް ނިކޮޓިން އެކުލެވިގެންވާތީ، މިއީ ވަރަށް ބޮޑަށް ދެވިހިފާ އެއްޗެކެވެ.

ބެލްޖިއަމުން އަންނަނީ އެ ގައުމަކީ މީގެ ފަސް އަހަރު ކުރިން ބާޒާރަށް ނެރުނު ޑިސްޕޯސަބަލް އީ-ސިނގިރޭޓުގެ ނުރައްކަލާ ދެކޮޅަށް އެންމެ އަވަހަށް ފިޔަވަޅު އަޅަން ފެށި އެއް ގައުމު ކަމަށް ބުނަމުންނެވެ.

ފެޑެރަލް ސަރުކާރުން 2021 ވަނަ އަހަރު އީޔޫގެ އެގްޒެކެޓިވް އާމް، ޔޫރަޕިއަން ކޮމިޝަނަށް ވަނީ އެއްފަހަރު ބޭނުންކޮށްފައި އުކާލާ ވޭޕްތައް މަނާކުރަން ހުށަހަޅައިފަ އެވެ. މި ހުއްދަ ކޮމިޝަނުން ދިނީ މިދިޔަ މާޗް މަހު އެވެ.

ފްރާންސުން ވެސް ވަނީ ބެލްޖިއަމްގެ ނަމޫނާ ނަގައި، ވޭޕް މަނާކުރުމުގެ މަސައްކަތް ފެށުމަށް ކޮމިޝަން ހުއްދަ މިހާރު ހޯދައިފަ އެވެ. އެ ގައުމުގައި މިކަމާ ގުޅޭ ގާނޫނަށް އަމަލުކުރަން ފެށުމުން ވޭޕް އުފެއްދުމާއި ވިއްކުމާއި ހިލޭ ދިނުން މަނާވާނެ އެެވެ. އެއާ ހިލާފުވެއްޖެ ނަމަ 100،000 ޔޫރޯ (104،000 ޑޮލަރު) އިން ޖޫރިމަނާ ކުރެވޭނެ އެވެ.