ހައްޖު ކިއުގައި 9،000 އަށް ވުރެ ގިނަ މީހުން

ހައްޖަށް ދާން އެދިގެން ކިއުގައި މި ވަގުތު 9،000 އަށް ވުރެ ގިނަ މީހުން އެބަތިބި ކަމަށް ހައްޖު ކޯޕަރޭޝަންގެ މެނޭޖިން ޑިރެކްޓަރު މުހައްމަދު ޝަކީލް ރޭ ވިދާޅުވެއްޖެ އެވެ.

އޭނާ "މިހާރު" އަށް ވިދާޅުވީ ހައްޖަށް ދިއުމަށް ފައިސާ ދެއްކުމަށް ފަހު ވެއިޓް ލިސްޓުގައި 9،115 މީހުން އެބަތިބި ކަމަށެވެ. އޭގެ ތެރޭގައި އަލަށް ހައްޖަށް ދާން ފައިސާ ދެއްކި 8،623 މީހުންނާއި ރިޕީޓްކޮށް އެ އަޅުކަމަށް ދާން ނަން ނޯޓުކުރި 492 މީހުން ހިމެނެ އެވެ.

ވެއިޓް ލިސްޓުގައި އެންމެ ގިނައީ އަލަށް ހައްޖަށް ދާން ނަން ނޯޓުކުރި 65 އަހަރުން ދަށުގެ މީހުންނެވެ. އެ ކެޓަގަރީގައި 7،150 މީހުން އެބަތިއްބެވެ. އަދި އެ އުމުރުގައި ރިޕީޓްކޮށް ހައްޖަށް ދާން ނަން 393 މީހުން ނަން ނޯޓުކޮށްފައި އެބަތިއްބެވެ.

އަލަށް ހައްޖަށް ދާން ދެ ވަނަ އަށް އެންމެ ގިނައިން ތިބީ 65-75 އަހަރާ ދެމެދުގަ އެވެ. އެ އުމުރުގެ 1،370 މީހުން ނަން ނޯޓުކޮށްފައި ވެ އެވެ. އެ އުމުރުގައި ރިޕީޓުކޮށް ހައްޖަށް ދާން 91 މީހުން އަދި 75 އަހަރުން މަތީގައި، އަލަށް ހައްޖަށް ދާން 103 މީހުންނާއި ރިޕީޓުކޮށް އަޅުކަމަށް ދާން އަށް މީހުން ވެއިޓްލިސްޓުގައި އެބަތިބި ކަމަށް ޝަކީލް ވިދާޅުވި އެވެ.

ހައްޖު ކިއުގައި 9،000 އަށްވުރެ ގިނަ މީހުން މި ވަގުތު ތިބިއިރު، މިދިޔަ އަހަރުން ފެށިގެން ސަރުކާރުން ވަނީ ހައްޖަށް ގެންދަން ރާއްޖެއަށް ލިބޭ ކޯޓާ ހަމައެކަނި ސަރުކާރުގެ ކުންފުންޏަށް ދޭން ނިންމައިފަ އެވެ. އެއާއެކު، ހައްޖު ކިއު ކުޑަކުރަން މި އަހަރުން ފެށިގެން އިތުރު ފިޔަވަޅުތަކެއް އަޅަން ވެސް ރައީސް ޑރ. މުހައްމަދު މުއިއްޒު ވަނީ ނިންމަވައިފަ އެވެ.

އެ ފިޔަވަޅުތަކުގެ ތެރޭގައި؛

- އަލަށް ހައްޖުގެ އަޅުކަން އަދާކުރާ މީހުންނަށް އިސްކަންދިނުން

- ހައްޖުގެ އަޅުކަން އަދާނުކުރާ މީހުންގެ ތެރެއިން 65 އަހަރުން ފެށިގެން މަތީގެ މީހުންނަށް ހައްޖު ކޯޕަރޭޝަނުން ކޮންމެ އަހަރަކު، ހައްޖު ކޯޓާއިން ވަކި އަދަދެއް ކަނޑައެޅުން

- ހައްޖުގެ އަޅުކަން އަދާކޮށްފައިނުވާ 75 އަހަރުން މަތީގެ މީހުންގެ ތެރެއިން ސިއްހީ ހާލަތަށް ބަލައި އެހީތެރިއަކު ގެންދަންޖެހޭ މީހުންނަށް އެހީތެރިއަކު ހަމަޖައްސަން ފުރުސަތު ދިނުން. އެހީތެރިއެއްގެ ގޮތުގައި ގެންދެވޭނީ ހައްޖުގެ އަޅުކަން އަދާކޮށްފައި ނުވާ މީހެއް އަދި ހައްޖުގެ އަޅުކަން އަދާކޮށްފައިވާ މީހަކު އެހީތެރިއެއްގެ ގޮތުގައި ގެންދެވޭނީ، ހައްޖަށް ނުދާ މީހަކު ލިބެން ނެތް ހާލަތުގައި ކަމަށް ކަނޑައެޅުން.

- ހައްޖުގެ އަޅުކަން ކުރިން އަދާކޮށްފައިވާ މީހަކަށް އިތުރު ފުރުސަތެއް ދެވޭނީ، އެންމެ ފަހުން އެ އަޅުކަން އަދާކުރިތާ ފަސް އަހަރު ވުމުން ކަމަށް ކަނޑައެޅުން.

ހައްޖާ ބެހޭ ގަވާއިދު މިހާރު އޮންނަ ގޮތުން އެ އަޅުކަން އަދާކުރަން ކިތަންމެ ގިނައިން ވެސް ސައުދީއަށް ދެވޭނެ އެވެ. ނަމަވެސް އެ އުސޫލު އެ ގޮތަށް އޮތުމުން، ރާއްޖެއިން ހައްޖަށް ދިއުމަށް ލިބޭ މަދު ކޯޓާއިން ފުރުސަތު ނުލިބޭ ކަންބޮޑުވުން އަބަދު ވެސް އޮވެ އެވެ. ފައިސާ ދެއްކުމަށް ފަހު ހައްޖު ވެއިޓް ލިސްޓުގައި މަދުވެގެން ހައެއްކަ އަހަރު މަޑުކުރަންޖެހެ އެވެ.

ރާއްޖެ އަށް ވެސް އަހަރަކަށް ކަނޑައަޅާފައި ވަނީ 1،000 ކޯޓާ އެވެ.