ހައްޖުގެ އަޅުކަން އަދާނުކޮށް ތިބި މީހުންނަށް އިސްކަންދޭގޮތަށް އުސޫލު ބަދަލުކުރުމުގެ ވިސްނުން އެބަހުރި: ޝަހީމް

ހައްޖުގެ އަޅުކަން އަދާނުކޮށް ތިބި މީހުންނަށް އިސްކަންދިނުމަށް، މިހާރު އޮތް އުސޫލަށް ބަދަލުތައް ގެންނަންޖެހޭ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު މިއަދު ވިދާޅުވެއްޖެ އެވެ.

ހައްޖާ ބެހޭ ގަވައިދު މިހާރު އޮންނަގޮތުން އެ އަޅުކަން އަދާކުރަން ކިތަންމެ ގިނައިން ވެސް ސައުދީއަށް ދެވޭނެ އެވެ. ނަމަވެސް އެ އުސޫލު އެ ގޮތަށް އޮތުމުން، ރާއްޖެއިން ހައްޖަށް ދިއުމަށް ލިބޭ މަދު ކޯޓާއިން ފުރުސަތު ނުލިބޭ ކަންބޮޑުވުން އަބަދު ވެސް އޮވެ އެވެ.

އެހެންވެ، ޝަހީމް ވަނީ އެ އުސޫލު ބަދަލުކުރުމާ މެދު އާއްމުންގެ ހިޔާލަށް ސޯޝަލް މީޑިއާގައި ހުޅުވާލައިފަ އެވެ.

އޭނާ ކުރެއްވި ޕޯސްޓުގައި ވިދާޅުވީ ފަރުޟު ހައްޖު އަދާކޮށްފައި ތިބޭ މީހުންނަށް ދެ ވަނަ ހައްޖެއް ލިބޭނީ، އެންމެ ފަހުން ހައްޖުކުރިތާ ފަސް އަހަރު ފަހުން ކަމަށް ބައެއް ގައުމުތަކުން އުސޫލުތައް ހަދާފައި އެބަހުރި ކަމަށެވެ.

ޝަހީމް "މިހާރު"އަށް ވިދާޅުވީ އަލަށް ހައްޖަށް ދާ މީހުންނަށް އިސްކަންދިނުމާއި ފަސް އަހަރުން އެއް ފަހަރު ނޫނީ ދެ ފަހަރަށް ހައްޖު ނުކުރުމަށް އަދި 65 އަހަރުން މަތީގެ މީހުންނަށް އިސްކަންދޭނެ ތަރުބީތުތަކެއް ހެދުމަށް އުސޫލަށް ބަދަލުތައް ގެނައުމުގެ ވިސްނުން އެބަހުރި ކަމަށެވެ.

އާއްމުންގެ ހިޔާލަށް ބެލުމަށްފަހު ރައީސް ޑރ. މުހައްމަދު މުއިއްޒުގެ ލަފާފުޅަށް ފޮނުއްވާނެ ކަމަށް ޝަހީމް ވިދާޅުވި އެވެ.

"ފުރަތަމަ ހައްޖު ކުރަން ބޭނުންވާ މީހުންނަށް ފުރުސަތު ފަހިކުރުން [މީގެ ބޭނުމަކީ]،" މިނިސްޓަރު ވިދާޅުވި އެވެ.

ޝަހީމް ވިދާޅުވީ ސައުދީގައި ވެސް ދެ ވަނަ ފަހަރަށް ހައްޖަށް ދެވެނީ ފަސް އަހަރު ފަހުން ކަމަށެވެ. މިސްރުގައި އެ ގަވައިދު އޮންނަނީ އުމުރުން އެއް ފަހަރު ހައްޖަށް ދެވޭ ގޮތަށެވެ.

"ރާއްޖޭގައި ވެސް ފަރުޟު ހައްޖު އަދާކުރުމަށް ވީހާ ވެސް ގިނަ ބަޔަކަށް ފުރުސަތު އޮންނާނެ ގޮތަކަށް ކޯޓާ ބެހުމުގައި ނިޒާމީ އަދުލުވެރި ބަދަލެއް އޮންނަންޖެހޭ ކަމަށް ގަބޫލުކުރަން،"

އަމިއްލަ ބައެއް ކުންފުނިތަކުން ބޮޑު އަގުގައި ހައްޖަށް ގެންދާތީ ސަރުކާރުން ވަނީ، މި އަހަރުން ފެށިގެން ހައްޖުގެ ކޯޓާ އެއްކޮށް ހައްޖު ކޯޕަރޭޝަނަށް ދޭން ނިންމައިފަ އެވެ. ނަމަވެސް، ސަރުކާރު ކުންފުނީގެ ހަވާލުގައި ހައްޖަށް ދިއުމަށް ކިއުގައި އެތައް އަހަރެއް ވަންދެން މަޑުކުރަންޖެހެ އެވެ.