ރާއްޖެ-ޗައިނާގެ މިނިވަން ވިޔަފާރީގެ އެއްބަސްވުމަށް ބުދަ ދުވަހުން ފެށިގެން އަމަލުކުރަން ފަށަނީ

ރާއްޖެ އާއި ޗައިނާއާ ދެމެދު ހަދާފައިވާ މިނިވަން ވިޔަފާރީގެ އެއްބަސްވުމަށް އަންނަ ބުދަ ދުވަހުން ފެށިގެން އަމަލުކުރަން ނިންމައިފި އެވެ.

މިނިވަން ވިޔަފާރީގެ އެއްބަސްވުމަށް އަމަލުކުރަން ފަށަން ތައްޔާރު ވެފައިވާކަން އިއުލާންކުރީ ޗައިނާގެ ކޮމާސް މިނިސްޓަރު ވަންގް ވެންޓާއޯ އާއި ރާއްޖޭގެ އިކޮނޮމިކް މިނިސްޓަރު މުހައްމަދު ސައީދު މިއަދު ބައިވެރިވެރިވެވަޑައިގަތް އޮންލައިން ރަސްމިއްޔާތެއްގަ އެވެ.

ރާއްޖެ އާއި ޗައިނާގެ މިނިވަން ވިޔަފާރީގެ އެއްބަސްވުމުގައި ސޮއިކުރީ ކުރީގެ ރައީސް އަބްދުﷲ ޔާމީންގެ ވެރިކަމުގައި އެމަނިކުފާނު ޗައިނާއަށް ކުރެއްވި ދަތުރުފުޅުގައި ޑިސެމްބަރު، 2014 ގަ އެވެ.

އެ އެއްބަސްވުމަށް ރައްޔިތުންގެ މަޖިލީހުން ރުހުން ދިނީ ޕީޕީއެމް/އެމްޑީއޭ ކޯލިޝަންގެ އަޣުލަބިއްޔަތު އޮތް މަޖިލީހުން ނޮވެމްބަރު، 2017 ގަ އެވެ. އެކަމަކު އޭގެ ފަހުން ސަރުކާރުން ބަދަލުވެ، އެ އެއްބަސްވުން މުރާޖައާ ކުރަމުންދާ ކަމަށް ބުނެ، ކުރީގެ ސަރުކާރުގައި އެ އެއްބަސްވުމަށް އަމަލުކުރަން ފަށާފައެއް ނުވެ އެވެ.

އަންނަ ބުދަ ދުވަހުން ފެށިގެން އެ އެއްބަސްވުމަށް އަމަލުކުރަން ފަށާނެކަން އިއުލާން ކުރައްވައި، ޗައިނާގެ ކޮމާސް މިނިސްޓަރު ވަންގް ވެންޓާއޯ ވިދާޅުވީ ޗައިނާ އާއި ރާއްޖެއަކީ ޒަމާނުއްސުރެ ގާތް ދެ ގައުމު ކަމަށާއި ފާއިތުވި އަހަރުތަކުގައި އިގްތިސާދީ ގުޅުން ވެސް ވަރަށް ބޮޑަށް ބަދަހިވެފައިވާ ކަމަށް އޭނާ ވިދާޅުވި އެވެ.

މިނިސްޓަރު ވިދާޅުވީ ޗައިނާ އާއި ރާއްޖޭގެ މިނިވަން ވިޔަފާރީގެ އެއްބަސްވުމާ ގުޅިގެން ދެ ގައުމުން ވެސް ވާންޖެހޭ ހުރިހާ ތައްޔާރީތަކެއް ވެފައިވާ ކަމަށެވެ.

އޭނާ ވިދާޅުވި ގޮތުގައި މި އެއްބަސްވުމުގެ ސަބަބުން ގިނަ ފައިދާތަކެއް ދިވެހިންނަށް ކުރާނެ އެވެ. އޭގެ ތެރޭގައި ރާއްޖެއިން ޗައިނާއަށް އެކްސްޕޯޓްކުރާ މަހުން ޑިއުޓީ މާފުވާނެ ކަމަށް ވިދާޅުވި އެވެ. އަދި ޗައިނާގެ އިލެކްޓްރޯނިކް ސާމާނާއި ފަރުނީޗަރު ފަދަ ތަކެތި ފަސޭހައިން ރާއްޖެއަށް ގެނެވޭނެ ކަމަށް ވިދާޅުވި އެވެ.

މި އެއްބަސްވުމުގެ ދަށުން ޗައިނާ އާއި ރާއްޖޭގެ ގުޅުން އިތުރު ހަރުފަތަކަށް ގެންދެވޭނެ ކަމަށް އުއްމީދު ކުރައްވާ އެ ގައުމުގެ ކޮމާސް މިނިސްޓަރު ވިދާޅުވި އެވެ.

އެ ރަސްމިއްޔާތުގައި މިނިސްޓަރު ސައީދު ވިދާޅުވީ އެ އެއްބަސްވުމަށް އަމަލުކުރަން ފެށުމާ އެކު އަމިއްލަ ފަރުދުންނާއި ދިވެހި ވިޔަފާރިތަކާއި ރާއްޖޭގެ އިގްތިސާދަށް ވެސް އޭގެ ފައިދާ ކުރާނެ ކަމަށެވެ. އަދި އަމިއްލަ މަސައްކަތް ކުރާ ފަރާތްތަކުގެ އުފެއްދުންތައް ވެސް ޗައިނާގެ މާކެޓަށް ނެރުމަށް މި އެއްބަސްވުމުން ބޮޑު ފަސޭހައަކަށް ވާއިރު، އޭގެ ސަބަބުން ވަޒީފާގެ ފުރުސަތުތައް ވެސް އިތުރުވެގެންދާނެ ކަމަށް ސައީދު ވިދާޅުވި އެވެ.

މިނިވަން ވިޔަފާރީގެ އެއްބަސްވުމެއްގައި ސޮއިކޮށްފައި އޮންނަތާ އެތައް އަހަރެއް ފަހުން، އެ އެއްބަސްވުމަށް އަމަލު ކުރަން ފެށުމުގެ މަޝްވަރާތައް ފެށީ ރައީސް ޑރ. މުހައްމަދު މުއިއްޒު ޗައިނާއަށް ކުރެއްވި ރަސްމީ ދަތުރުފުޅުގަ އެވެ.

ޗައިނާ އާއި ރާއްޖެއާ ދެމެދު ހެދި މިނިވަން ވިޔަފާރީގެ އެއްބަސްވުމަކީ ރާއްޖެއިން ބޭރުގެ ގައުމަކާ އެކު ހެދި މިފަދަ ފުރަތަމަ އެއްބަސްވުމެވެ.

ސަރުކާރުން ކުރިން ބުނެފައިވާ ގޮތުގައި މި އެއްބަސްވުމަށް އަމަލުކުރަން ފެށުމުން ޗައިނާ އާއި ރާއްޖެއާ ދެމެދު ކުރެވޭ ވިޔަފާރީގެ މުއާމަލާތްތައް އެއް ބިލިއަން ޑޮލަރަށް އިތުރު ކުރެވޭނެ އެވެ. އެގައުމާ އެކު 700 މިލިއަން ޑޮލަރުގެ ވިޔަފާރި މިހާރު ކުރަމުން އެބަދެ އެވެ.