ތާރީހީ ކާމިޔާބީއެއް: ރާއްޖެ-ޗައިނާ އިން މިނިވަން ވިޔަފާރީގެ އެއްބަސްވުމަށް އަމަލުކުރަން ފަށައިފި

ރާއްޖެ އާއި ޗައިނާއާ ދެމެދު ހަދާފައިވާ މިނިވަން ވިޔަފާރީގެ އެއްބަސްވުމަށް މިއަދުން ފެށިގެން އަމަލުކުރަން ފަށައިފި އެވެ.

މިއީ ކުރީގެ ރައީސް އަބްދުﷲ ޔާމީންގެ ވެރިކަމުގައި އެ މަނިކުފާނު ޗައިނާއަށް ކުރެއްވި ދަތުރުފުޅެއްގައި 2014 ގައި ހަދާފައިވާ އެއްބަސްވުމެކެވެ. އެކަމަކު ޕީޕީއެމް/އެމްޑީއޭ ކޯލިޝަންގެ އަޣުލަބިއްޔަތު އޮތް މަޖިލީހުން ނޮވެމްބަރު 2017 ގައި އެ އެއްބަސްވުމަށް ރުހުން ދިނަސް ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގެ ދުވަސްވަރު އެ އެއްބަސްވުން މުރާޖައާ ކުރަމުންދާ ކަމަށް ބުނެ އަމަލެއް ނުކުރި އެވެ.

މިނިވަން ވިޔަފާރީގެ އެއްބަސްވުމެއްގައި ރާއްޖެ އާއި ޗައިނާ އިން ސޮއިކޮށްފައި އޮންނަތާ އަހަރުތަކެއް ފަހުން، އެ އެއްބަސްވުމަށް އަމަލު ކުރަން ފެށުމުގެ މަޝްވަރާތައް ފެށީ ރައީސް ޑރ. މުހައްމަދު މުއިއްޒު ނޮވެމްބަރު 17، 2023 ގައި މަގާމާ ހަވާލުވެވަޑައިގެން ޖެނުއަރީ 2024 ގައި ޗައިނާ އަށް ކުރެއްވި ދަތުރުފުޅުގަ އެވެ.

މި އެއްބަސްވުމަށް މިއަދުން ފެށިގެން އަމަލުކުރަން ފަށާފައިވާއިރު، މީގެ ސަބަބުން ރާއްޖެ އާއި ޗައިނާއާ ދެމެދު ކުރާ ވިޔަފާރީގެ މުއާމަލާތްތައް އެއް ބިލިއަން ޑޮލަރަށް އިތުރު ކުރެވޭނެ ކަމަށް ދިވެހި ސަރުކާރުން ބުނެ އެވެ. އެ ގައުމާ އެކު މިހާރު ކުރަމުންދާ ވިޔަފާރީގެ މުއާމަލާތަކަށް ވެސް 700 މިލިއަން ޑޮލަރު އަރަ އެވެ.

ރާއްޖެ-ޗައިނާގެ މިނިވަން ވިޔަފާރީގެ އެއްބަސްވުމުން ލިބޭނެ ފައިދާތައް:

- ޑިއުޓީ މާފުވެ، 7،000 އަށް ވުރެ ގިނަ އައިޓަމް ޗައިނާ އަށް އެކްސްޕޯޓް ކުރެވޭނެ.

- ރާއްޖެ އިން ޗައިނާ އަށް އެކްސްޕޯޓްކުރާ މަހުގެ ހުރިހާ ބާވަތަކަށް ޑިއުޓީ މާފުވާނެ. އޭގެ ތެރޭގައި ތާޒާ، ފިނިކޮށްފައި އަދި ގަނޑުކޮށްފައި ހުންނަ ކަޅު ބިލަމަހާއި ފާނައިގެ ބާވަތްތަކާއި އަދި ކަންނެލީގެ ބާވަތްތަކާއި މަސް ދަޅާއި ވަޅޯ މަހާއި ލޮނު މަހުގެ އިތުރުން ސީފުޑްގެ ބާވަތްތައް ވެސް ހިމެނޭނެ.

- އެ އެއްބަސްވުމުގެ ސަބަބުން ރާއްޖޭގައި އިމާރާތް ކުރުމުގެ ދާއިރާގައި ބޭނުންކުރާ މުދަލުގެ އަގު ހެޔޮވެ، އެ ދާއިރާ އަށް އިންވެސްޓްކުރުމަށް އިތުރު ފުރުސަތުތައް ފަހިވާނެ.

- އިމާރާތް ކުރުމަށް ރާއްޖޭގައި ބޭނުންކުރާ ގާތްގަނޑަކަށް ހުރިހާ ބާވަތަކުން ޑިއުޓީ މާފުވާނެ.

- ރާއްޖޭގައި އިންސާނީ ވަސީލަތްތައް ތަރައްގީކޮށް، އެކި ދާއިރާތަކުން ދިރާސާކުރުމަށް ޗައިނާގެ އެހީ ލިބުމާއި ދިވެހިންގެ ހުނަރު އިތުރުކުރުމަށް ވެސް ފުރުސަތު ލިބޭނެ. ޗައިނާ އިން އަންނަ އިންވެސްޓްމަންޓްތައް އިތުރުކުރުމަށް ދެ ގައުމުގައި އިންވެސްޓްމަންޓް ޕްރޮމޯޝަން ހިންގުމުގެ ފުރުސަތު ލިބޭނެ.

- އަމިއްލަ އުފެއްދުންތައް އުފައްދާ ފަރާތްތަކުގެ ޕްރޮޑަކްޓްތައް ޗައިނާއަށް އެކްސްޕޯޓް ކުރާނެ.

- އެކްސްޕޯޓާއި ރިއެކްސްޕޯޓްގެ ދާއިރާއިން ވަޒީފާގެ ފުރުސަތުތައް އިތުރުވާނެ.

- ފަރުނީޗަރު އެތެރެކުރުމަށް މިހާރު ފަސް ޕަސެންޓްގެ ޑިއުޓީއެއް ނަގަމުން އަންނައިރު މި އެއްބަސްވުމުގެ ސަބަބުން އެ ޑިއުޓީ މާފުވާނެ.

ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގައި ރާއްޖެ އާއި ޗައިނާގެ ގުޅުން ހީނަރުވެފައި އޮތަސް ރައީސް މުއިއްޒުގެ ވެރިކަމުގައި އެ ގުޅުން ވަނީ ވަރަށް ބޮޑަށް ރަނގަޅު ކޮށްފަ އެވެ.