ރަސްމީ ފާލަމުގެ މަސައްކަތުގެ ސްޕީޑް ހަލުވިކޮށްފި، ސްޓްރަކްޗާ ފްރޭމް ނިމިއްޖެ

މާލޭގެ ރަސްމީ ފާލަން އަލުން ހެދުމަށް އޯވަހެޑް ސްޓްރަކްޗާ ނިންމާފައިވާ ކަމަށާއި މިހާރު ކުރަމުން އަންނަނީ ފުރާޅުގެ މަސައްކަތްތައް ކަމަށް އެމްޓީސީސީން މިއަދު ބުނެފި އެވެ.

ރަސްމީ ފާލަން އަލުން މަރާމާތުކޮށް އަދި އާ ޑިޒައިނަކަށް އެ ތަން ހެދުމަށް ކުރީގެ ސަރުކާރުން އެމްޓީސީސީއާ ހަވާލުކުރީ ޑިޒައިން އެންޑް ބިލްޑް އުސޫލުން 11.7 މިލިއަން ރުފިޔާ އަށެވެ. އެކަމަކު، އެ މަސައްކަތްތައް ފެށީ މި އަހަރުގެ މެއި މަހުގެ ކުރީކޮޅު އެވެ. އެކަން ކުރުމަށް ފާލަން އެއްކޮށް ރޫޅާލި ނަމަވެސް ތަކެތި ލިބުން ލަސްވުމުން މަސައްކަތް ދިގުލައިގެން ދިޔައީ އެވެ.

އެމްޓީސީސީގެ މީޑިއާ އޮފިޝަލް ވިދާޅުވީ ފާލަން ހެދުމަށް ބޭނުންވާ ތަކެތި ލިބުމުން ހަލުވި ދުވެލީގައި މިހާރު މަސައްކަތް ކުރަމުން އަންނަ ކަމަށެވެ. އެ ތަނުގެ ސްޓްރަކްޗާ ފްރޭމްގެ މަސައްކަތް ނިންމައި، ފުރާޅުގައި ޝިންގަލްސް ހަރުކޮށް، ސީލިންގް ފްރޭމްވޯކް ބިލްޑިންގެ މަސައްކަތްތައް ކުރަމުން އަންނަ ކަމަށް އޭނާ ވިދާޅުވި އެވެ.

މަސައްކަތުގެ ސްޕީޑް އަވަސް ވިޔަސް ފާލަން އެއްކޮށް ނިމޭނެ ތާރީހެއް އެމްޓީސީސީން އަދި ނުބުނެ އެވެ.

ރާއްޖޭގެ މިނިވަންކަމަށް 50 އަހަރު ފުރުމުގެ މުނާސަބަތުގައި ރަސްމީ ފާލަން އާ ޑިޒައިނަކަށް މަރާމާތުކޮށް ހުޅުވީ ކުރީގެ ރައީސް އަބްދުﷲ ޔާމީންގެ ވެރިކަމުގަިއ ޖުލައި، 2015 ގަ އެވެ. އެ ފާލަން ހުޅުވުމަށް ފަހު ދެ ފަހަރެއްގެ މަތިން އެތަން މަރާމާތުކުރި އެވެ. އެންމެ ފަހުން މަރާމާތުކުރީ 2017 ވަނަ އަހަރުގެ ތެރޭގަ އެވެ.

ނަމަވެސް އޭގެ ފަހުން މަރާމާތު ނުކޮށް ގިނަ ދުވަސް ވުމުން ފާލަމުގެ ދަގަނޑުތަކުގައި ދަބަރުޖަހައި އެ ތަން ހުރީ ބޮލަށް ވެއްޓޭ ހިސާބުގައި ކަމަށް ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބު ކުރިން ވިދާޅުވެފައި ވެ އެވެ.

"މިހާރު ވާ ގޮތަކީ ފާލަން ހަދާފައި ހުރި ގޮތުން މެއިންޓެއިން ކުރަން ވެސް އުނދަގުލީ. ހާއްސަކޮށް މިދިޔަ ފަސް އަހަރު ރަނގަޅަށް ނުބެލެހެއްޓުމުން ދަގަނޑުތަކުގައި ދަބަރު ޖަހާފައި ހުރީ،" އޭނާ ވިދާޅުވި އެވެ.

ރަސްމީ ފާލަން މި ފަހަރު ހަދަނީ 1950 ގައި ރަސްމީ ފާލަން ހުރި ގޮތް އަސްލަކަށް ބަލައިގެންނެވެ.