ބަދަލުވަނީ މާލޭގެ މޫނުމަތި އެކަންޏެއް ނޫން، "ޓްރެފިކް ސްޓްރެސް" އަށް ވެސް ބޮޑު ލުޔެއް

އެމްޕީއެލް ސަރަހައްދުން ފެށިގެން މާލޭގެ އެމްޓީސީސީ ފެރީ ޓާމިނަލާ ހަމައަށް ބޭރު މަގުގައި ޓްރެފިކް ތޮއްޖެހި، މީހުން ރުޅިގަދަ ނުވާ ދުވަހެއް މަދުވާނެ އެވެ. ހާއްސަކޮށް މަސް މާރުކޭޓު ސަރަހައްދާއި މަސްވެރިންގެ ޕާކު ހިމެނޭ ސަރަހައްދުގައި ވެހިކަލްތައް ކުރިއަށް ނުކަނޑައިގެން އެތައް އިރެއް ވަންދެން ތިބެން ޖެހުމުގެ ބުރަ އުފުލާތާ އެތައް ދުވަހެއް ވެއްޖެ އެވެ. ކާރޫބާރޫ ބޮޑު ވަގުތުތަކުގައި އެތައް ބަޔަކު "ސްޓްރެސް" ބޮޑުވެ، ރުޅިގަނޑު ފަޅައިގެން ދިއުމަކީ އާންމު ކަމެކެވެ.

ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިިބު ވިދާޅުވި ގޮތުގައި، އެމްޓީސީސީ ފެރީ ޓާމިނަލާ ހިސާބުން ފެށިގެން ރަސްފަންނު ސަރަހައްދާ ހަމައަށް ބޭރު މަގުގައި ތާރު އަޅައި އަދި ހަތަރު ލޭނަށް އެ މަގު ބަދަލުކުރުމަކީ މާލޭގައި ޓްރެފިކްގެ "އުދާސްތަކަށް" ލިބޭނެ އެންމެ ބޮޑު އެއް ލުއި ކަމަށެވެ.

އިއްޔެ ފެށީ މަސް މާރުކޭޓު ސަރަހައްދުން ފެށިގެން އެމްޓީސީސީ ފެރީ ޓާމިނަލާ ހަމައަށް އެ މަގުގައި ތާރު އަޅައި، އެތެރެ ތޮށި ބޭރަށް ޖައްސައި، ހަތަރު ލޭނަށް ޖާގަ ލިބޭ ގޮތަށް މަގު ފުޅާކުރުމުގެ މަސައްކަތެވެ. އެއީ އެ މަޝްރޫއުގެ ފުރަތަމަ ސެގްމަންޓެވެ. ދެވަނަ ސެގްމަންޓަކީ މަސްމާރުކޭޓް ސަރަހައްދުން ފެށިގެން އެމްޕީއެލް ސަރަައްދު އަދި މާފަންނުން ރަސްފަންނާ ހަމައަށް ބޮޑުތަކުރުފާނު މަގުގައި ތާރު އެޅުމެވެ.

ނަމަވެސް މަސްމާރުކޭޓު ސަރަހައްދަކީ ބާރު ބޮޑު ސަރަހައްދަކަށް ވާތީ ކޮންސްޓްރަކްޝަން މިނިސްޓްރީން ކަނޑައަޅާފައި ވަނީ ރަސްމީ ފާލަމުން ފެށިގެން މަސްމާރުކޭޓާ ހަމައަށް މަގު ފުޅާކޮށް، ތާރު އެޅުމުގެ މަސައްކަތް އަންނަ އޮކްޓޫބަރު 13 އާ ހަމައަށް ނިންމާ ގޮތަށެވެ.

މުޅި މަޝްރޫއުގެ އަގަކީ 144 މިލިއަން ރުފިޔާ ކަމަށް ވާއިރު އެމްޓީސީސީ އަށް އެ މަސައްކަތް ނިންމަން ދީފައި ވަނީ 455 ދުވަހެވެ. ނުވަތަ އެއް އަހަރާއި ތިން މަހެވެ.

"އެ ސަރަހައްދުގެ ކާރޫބާރޫ ބޮޑުވާ މައްސަލައަށް ވަރަށް ބޮޑު ލުޔެއް ލިބިގެންދާނީ. މަގު ފުޅާވުމަކީ އެއީ އެތައް ބަޔަކަށް ލިބޭނެ ވަރަށް ބޮޑު ފައިދާއެއް. ހަގީގަތުގައި މި ގެންނަނީ ވަރަށް ބޮޑު ބަދަލެއް،" އޭނާ ވިދާޅުވި އެވެ.

މުއްތަލިބު ވިދާޅުވި ގޮތުގައި ބޭރު މަގު ފުޅާކުރަމުން ދާނީ އެކި ސަރަހައްދު އެކި ވަރަށެވެ. އެއީ އެ ސަރަައްދުގެ ލޭންޑްސްކޭޕިން އަށް ވެސް އަންނަ ވަރަށް ބޮޑު ބަދަލެއް ކަން އޭނާ ފާހަގަކުރެއްވި އެވެ.

"މާލޭގެ މޫނުމައްޗަށް އަންނަ ބަދަލަކަށް ވުރެ ބޮޑަށް އެ ސަރަހައްދުގެ ކާރޫބާރޫ ބޮޑުވުން ކުޑަކޮށްދިނުމަށް ކުރާ ބޮޑު ކަމެއް މިއީ،" އެ ބަދަލު މިނިސްޓަރު ވަރަށް ކުރުކޮށް ވިދާޅުވެދެއްވި އެވެ.

މާލޭގެ ލޭންޑްސްކޭޕިންގެ އިތުރު މަސައްކަތްތަކެއް

މާލޭ އުތުރު ފަރާތުން ބޮޑުތަކުރުފާނު މަގު ހަތަރު ލޭނަކަށް ބަދަލުކޮށް، އެ ސަރަހައްދުގެ ކަނޑުތޮށި ބޭރަށް ޖެއްސުމުގެ މަސަައްކަތާ އެކު، ލޭންޑްސްކޭޕިން އަށް އިތުރު ބަދަލުތަކެއް ވެސް ގެންނަން ރާވާފައިވާ ކަަމަށް މިނިސްޓަރު ވިދާޅުވި އެވެ.

އޭގެ ތެރޭގައި ޖުމްހޫރީ މައިދާން އަލުން ތަރައްގީ ކުރުން ހިމެނެ އެވެ. އަދި މާލޭގެ ހުރިހާ މަގެއްގައި ތާރު އަޅައި ޒަމާނީ ފެންވަރަށް ޗައިނާ ސަރުކާރުގެ ހިލޭ އެހީގައި ހިންގަން ފަށާ މަޝްރޫއުގެ ދަށުން މަގުތައް ޑިޒައިން ކޮށްދޭނެ ބަޔަކު ހޯދުމުގެ ކަންކަން ޗައިނާގައި ކުރިއަށް ގެންދާ ކަމަށް މުއްތަލިބު ވިދާޅުވި އެވެ.

"އެ މަސައްކަތް ފެށިގެން ދިއުމުން މުޅި މާލެއަކީ އަލުން ދިރިއުޅުން ހިތްފަސޭހަ ތަނަކަށް ބަދަލުކުރަން ސަރުކާރުން ކުރާ މަސައްކަތަށް ވަރަށް ބޮޑު ބާރެއް ލިބިގެންދާނެ،" މިނިސްޓަރު ވިދާޅުވި އެވެ.

މާލޭ އުތުރު ފަރާތުން ބޮޑުތަކުރުފާނު މަގަށް މި ގެންނަނީ އެ ބަދަލުތަކުގެ ފެށުމެވެ. އެއިރަށް ހާއްސަކޮށް ލޯކަލް މާރުކޭޓު ކައިރިން ޓްރެފިކް ތޮއްޖެހި، ކުރިއަށް ނުކަނޑައި އެތައް އިރެއް ވަންދެން ތިބެންޖެހޭ މައްސަލަ އަށް ހައްލު ލިބޭނެ އެވެ.