އާ އަހަރަށް މަހުޖަނުންގެ ޖެޓުތައް ރާއްޖެ އަށް؛ 8 ޕަސެންޓުގެ އިތުރުވުމެއް!

އާ އަހަރާ ދިމާކޮށް މި މަހު ގިނަ އަދަދެއްގެ އަމިއްލަ ޖެޓުތައް ރާއްޖެއަށް އައިސްފައިވާ ކަމަށް ވެލާނާ އިންޓަނޭޝަނަލް އެއާޕޯޓު ހިންގާ އެމްއޭސީއެލުން މިއަދު ބުނެފި އެވެ.

ކްރިސްމަސް އާއި އާ އަހަރާ ދިމާކޮށް ކޮންމެ އަހަރަކު ވެސް ދުނިޔޭގެ މަހުޖަނުންގެ ޕްރައިވެޓު ޖެޓުތަކުން ވެލާނާ އެއާޕޯޓު ފުރާލާއިރު، މި ވަގުތު ވެސް 30 އަށް ވުރެ ގިނަ ޖެޓު އެ އެއާޕޯޓުގައި ޕާކުކޮށްފައި އެބައޮތް ކަމަށް އެ ކުންފުނިން ބުންޏެވެ.

ކޮންމެ ފަހަރަކު ވެސް އާ އަހަރު ފެށުން ގާތްވާ ވަރަކަށް ޖެޓުގެ އަދަދު އިތުރުވެ އެވެ. އަދި ގިނަ މަހުޖަނުން ރާއްޖެ އަންނަނީ ކްރިމަސް ފާހަގަކުރުމަށް ފަހު، ސީދާ އާ އަހަރަށެވެ.

އެމްއޭސީއެލްގެ އޮފިޝަލަކު "މިހާރު" އަށް މިއަދު ވިދާޅުވީ މިދިޔަ އަހަރުގެ ޑިސެމްބަރު މަހުގެ 28 ވަނަ ދުވަހުގެ ނިޔަލަށް ޖުމްލަ 137 ޖެޓު މޫވްމަންޓްސް ރިކޯޑް ކުރެވިފައިވާ ކަމަށެވެ. އެކަމަކު މި އަހަރުގެ ޑިސެމްބަރު މަހުގެ މިހާތަނަށް ނުވަތަ އިއްޔެގެ ނިޔަލަށް އެކަނިވެސް 148 ޖެޓު މޫވްމަންޓްސް ރިކޯޑްކުރެވިފައިވާ ކަމަށް އޮފިޝަލް ވިދާޅުވި އެވެ.

"އެއީ 8 ޕަސެންޓުގެ އިތުރުވުމެއް،" އޭނާ ވިދާޅުވި އެވެ.

މުޅި އަހަރުގެ ތަފާސްހިސާބުތަކަށް ބަލާއިރު، މި އަހަރުގެ މިހާތަނަށް 2،326 ޖެޓު މޫވްމަންޓްސް ރިކޯޑްކުރެވިފައިވެ އެވެ. މިދިޔަ އަހަރުގެ ޑިސެމްބަރު މަހުގެ 28 ވަނަ ދުވަހުގެ ނިޔަލަށް ރިކޯޑްކުރެވިފައި ވަނީ 2،107 ޖެޓު މޫވްމަންޓްސް އެވެ.

އެހެންވެ، އެއީ ވެސް މިދިޔަ އަހަރާއި މި އަހަރުގެ މިހާތަނަށް އަޅާބަލާއިރު 10 ޕަސެންޓްގެ އިތުރުވުމެއް ކަމަށް އޮފިޝަލް ވިދާޅުވި އެވެ.

ކޮންމެ އަހަރަކު ވެސް މި ދުވަސްވަރަށް ގިނަ އަދަދަކަށް ޕްރައިވެޓް ޖެޓްތައް ރާއްޖެ އަށް އަންނާތީ އެކަމަށް ހާއްސަކޮށް ވެލާނާ އެއާޕޯޓުގެ ތިން ސަރަހައްދެއްގެ ޖެޓުތައް ޕާކު ކުރެވޭނެ ޖާގަތައް ހަދާފައިވެ އެވެ. އެއާޕޯޓުގެ އުތުރާއި އިރުމައްޗާ އަދި ދެކުނު ފަރާތުގައި ހަދާފައިވާ ޖެޓު ޕާކިން ސަރަހައްދުތަކުގައި ޖުމްލަ 68 ޖާގަ އޮވެ އެވެ.

މާލެ އާއި ހުޅުމާލެ ގުޅުވައިދޭ ހައިވޭން ދަތުރުކުރާއިރު އެއާޕޯޓުގެ ދެކުނު ފަރާތުގައި ޕާކުކޮށްފައި އޮތް ގިނަ އަދަދެއްގެ ޖެޓުތައް މިހާރު ވަރަށް ރީއްޗަށް ފެނެ އެވެ.

"ބްރިޖުގައި ދުއްވާފައި ދާއިރު އެ ފެންނަނީ އުތުރާއި އިރުމަތި ސަރަހައްދުގެ ޕާކިން ފުރިގެން ދެކުނު ފަރާތުގައި ޕާކް ކޮށްފައި ހުންނަ ޖެޓުތައް. އާންމުކޮށް އެ ތަނުގައި ޕާކް ކުރާނީ މައި ދެ ތަން ޖެޓުތަކުން ފުރުނީމާ،" އޮފިޝަލް ވިދާޅުވި އެވެ.

މިދިޔަ އަހަރާ ބަލާއިރު، ވެލާނާ އިންޓަނޭޝަނަލް އެއާޕޯޓަށް އައި ފަސިންޖަރުންގެ އަދަދު ވެސް ނުވަ ޕަސެންޓަށް ވަނީ އިތުރު ވެފައި ކަމަށް އެމްއޭސީއެލުން ބުންޏެވެ.

މިދިޔަ އަހަރު ރާއްޖެ އަށް 2.2 މިލިއަން ފަސިންޖަރުން އައިސްފައިވާއިރު އިއްޔެގެ ނިޔަލަށް އެ އަދަދު އުޅެނީ 2.4 މިލިއަންގައި ކަމަށް ބުންޏެވެ.

ކްރިސްމަސް އާއި އާ އަހަރު ދިމާކޮށް ރާއްޖޭގެ ރިސޯޓުތަކާއި ގެސްޓް ހައުސްތަކަށް އަބަދުވެސް ބާރުބޮޑުވެ އެވެ. މަޝްހޫރު ކުޅިވަރު ކުޅުންތެރިންނާއި ފިލްމީ ތަރިންގެ އިތުރުން އެކި ދާއިރާތަކުން ފާހަގަކޮށްލެވޭ ޝަހުސިއްޔަތުތައް ޗުއްޓީ ހޭދަކޮށްލަން ކޮންމެ އަހަރެއްގެ ވެސް މި ދުވަސްވަރު ރާއްޖެއަށް ޒިޔާރަތްކުރެ އެވެ.

އެމްއޭސީއެލްގެ އޮފިޝަލް ވިދާޅުވިގޮތުގައި، އާ އަހަރާ ދިމާކޮށް ވެލާނާ އިންޓަނޭޝަނަލް އެއާޕޯޓަށް ބާރު ބޮޑުވެފައިވާތީ، މުވައްޒަފުން ވެސް އޮންނަ އުސޫލުގެ ތެރެއިން އިތުރު ގަޑީގައި ނެރެގެން ފަސިންޖަރުންނަށް އަންނަނީ ހިދުމަތް ދެމުންނެވެ.

"މި ދުވަސްވަރު އަދި ވަރަށް ރަނގަޅަށް މެނޭޖު ކުރަމުން އެބަދެވޭ. އެއީ އަޅުގަނޑުމެންގެ މުވައްޒަފުންގެ ބުރަ މަސައްކަތް،" އޭނާ ވިދާޅުވި އެވެ.

ސްކޫލް ބަންދާއި އާ އަހަރުގެ ބަންދާ ދިމާކޮށް މި ދުވަސްވަރު އެއާޕޯޓަށް ވަރަށް ބާރުބޮޑެވެ.