ގެދޮރުވެރިޔާ ފްލެޓްތަކުގެ މައްސަލާގައި ދައުވާކުރުމާ މެދު މަޝްވަރާތައް ފަށައިފި

ކުރީގެ ސަރުކާރުން ހިންގި ގެދޮރުވެރިޔާ ސްކީމްގެ ދަށުން ދޫކުރާ ފްލެޓްތަކުގެ މައްސަލާގައި ތުހުމަތު ކުރެވޭ ފަރާތްތަކުގެ މައްޗަށް ދައުވާކުރުމާ މެދު ގޮތެއް ނިންމުމަށް އެންޓި-ކޮރަޕްޝަން ކޮމިޝަން (އޭސީސީ) އިން ޕްރޮސިކިއުޓާ ޖެނަރަލް (ޕީޖީ) އޮފީހާ އެކު މަޝްވަރާތައް ފަށައިފި އެވެ.

އޭސީސީން މިރޭ ނެރުނު ނޫސްބަޔާނެއްގައި ބުނީ އެ ކޮމިޝަނުން ތަހުގީގުކުރަމުން އަންނަ ގެދޮރުވެރިޔާ ސްކީމްގެ ދަށުން ފްލެޓް ދޫކުރުމުގެ މައްސަލާގައި ހިމެނޭ ފަރާތްތަކުގެ (ތުހުމަތުތައް ކުރެވޭ ފަރާތްތަކުގެ) މައްޗަށް ދައުވާކޮށްދިނުމާ މެދު ގޮތެއް ނިންމުމަށް ޕީޖީ އޮފީހާ އެކު ރަސްމީކޮށް ޑިއުޓީ ޕްރޮސިކިއުޝަން މަރުހަލާ ފަށާފައިވާ ކަމަށެވެ.

އާންމުންގެ މަސްލަހަތު ބޮޑު މި މައްސަލާގައި ޑިއުޓީ ޕްރިސިކިއުޝަންގެ މަރުހަލާ ނިންމައި ދައުވާކުރެވޭނެ ފަރާތްތަކުގެ މައްޗަށް ދައުވާކޮށްދިނުމަށް އެދެން ކުރަން ޖެހޭ މަސައްކަތްތައް އެ ކޮމިޝަނުން ވީހާ ވެސް އަވަހަކަށް ކުރަމުން ގެންދާނެ ކަމަށް އޭސީސީން ބުންޏެވެ.

ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގައި، މާލޭގައި ދިރިއުޅޭތާ 15 އަހަރުވެފައިވާ މީހުންނަށް ދޭން ނިންމި ގެދޮރުވެރިޔާ ފްލެޓްތަކުގެ މައްސަލާގައި އޭސީސީން ކުރި ބޮޑު ތަހުގީގަށް ފަހު ބުނީ ފުރަތަމަ 4،000 ފްލެޓް ދޭން އޭރުގެ ހައުސިން މިނިސްޓްރީން ކަނޑައެޅި މީހުންގެ ތެރެއިން ފްލެޓަށް ހުރިހާ ޝަރުތެއް ހަމަވަނީ އެންމެ 20 ޕަސެންޓް މީހުން ކަމަށެވެ. އެހެންވެ، އެ ލިސްޓް ރިވިއު ކުރަން އެ ކޮމިޝަނުން ވަނީ މިހާރުގެ ހައުސިން މިނިސްޓްރީއަށް އަންގައިފަ އެވެ.

އޭސީސީން އެގޮތަށް އެންގުމުން ހައުސިން މިނިސްޓްރީން ވަނީ ގެދޮރުވެރިޔާ ސްކީމްގެ ފުރަތަމަ ބުރުގައި ފޯމު ހުށަހެޅި އެންމެންގެ ފޯމުތައް ރިވިއުކުރަން ނިންމައި، އެ މަސައްކަތް ފަށައިފަ އެވެ. އެއީ 20،000 އަށް ވުރެ ގިނަ ފޯމެވެ.

ކުރީގެ ސަރުކާރުން ހިންގި ބިންވެރިޔާ އަދި ގެދޮރުވެރިޔާ ސްކީމުގެ ދަށުން ޝަރުތު ހަމަނުވާ ބަޔަކަށް ބިންތަކެއް ދިން މައްސަލާގައި ޖިނާއީ ތަހުގީގެއް ހިންގަން ޕްރޮސިކިއުޓާ ޖެނެރަލް އައްބާސް ޝަރީފް ފުލުހުންނަށާއި އޭސީސީއަށް މިދިޔަ ބުރާސްފަތި ދުވަހު ވެސް ވަނީ އަމުރެއް ކުރައްވައިފަ އެވެ.