މިދިޔަ ކުއާޓާގައި ތަކެތީގެ އަގު މައްޗަށް

މި އަހަރުގެ ތިން ވަނަ ކުއާޓާގައި އިންފްލޭޝަން ނުވަތަ ތަކެތީގެ އަގު އުފުލިފައިވާ ކަމަށް މަރުކަޒީ ބޭންކް، މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ތަފާސްހިސާބުތަކުން ދައްކައިފި އެވެ.

އެމްއެމްއޭ ކޮންމެ ކުއާޓަރެއްގައި ނެރެމުންދާ ކުއާޓާލީ އިކޮނޮމިކް ބުލެޓިންގައި ބުނީ މި އަހަރުގެ ދެވަނަ ކުއާޓަރާ އަޅާ ބަލާއިރު، މިދިޔަ ކުއާޓަރުގައި ތަކެތީގެ އަގު އެއް ޕަސެންޓް އިތުރުވެފައިވާ ކަމަށެވެ.

މިގޮތުން ދެވަނަ ކުއާޓަރުގައި 0.3 ޕަސެންޓުގައި ހުރި އިންފްލޭޝަން، ތިން މަސް ދުވަހުގެ ތެރޭގައި 1.3 ޕަސެންޓަށް އުފުލިފައިވާ ކަމަށް އެ ރިޕޯޓުގައި ބުންޏެވެ.

މިދިޔަ ކުއާޓަރުގެ ތެރޭގައި އަގު އެންމެ ބޮޑަށް އުފުލިފައިވާ ތަކެތީގެ ތެރޭގައި ކާބޯތަކެއްޗާއި ސިއްހީ ހިދުމަތާއި ހަކަތައިގެ ދާއިރާ ހިމެނެ އެވެ.

ކާބޯތަކެތީގެ ތެރެއިން މަހުގެ ބާވަތްތަކުން 10.4 ޕަސެންޓުން އަގުތައް އުފުލިފައިވާއިރު، ތަރުކާރީގެ އަގު 17.4 ޕަސެންޓުން ވަނީ އިތުރުވެފަ އެވެ.

އެމްއެމްއޭއިން ބުނީ މޭވާ އާއި ތަރުކާރީގެ އަގުތައް މިދިޔަ ކުއާޓަރުގައި މަތިވެފައިވަނީ ފިޔާ އާއި މިރުސް އަދި ލުނބޯގެ ސަޕްލައިއަށް އައި ދަތިތަކުގެ ސަބަބުން ކަމަށެވެ.

ސިއްހީ ހިދުމަތްތަކުގެ އަގުތައް މަތިވާން މެދުވެރިވި މައިގަނޑު ސަބަބަކީ އެ ރިޕޯޓުގައި ބުނެފައިވާ ގޮތުގައި ކޮންސަލްޓޭޝަން ނުވަތަ ޑޮކްޓަރަށް ދެއްކުމަށް ކުރަންޖެހޭ ހަރަދު ބޮޑުވުމެވެ. ނަމަވެސް ދެވަނަ ކުއާޓަރާ އަޅާ ބަލާއިރު ބޭހުގެ އަގުތައް މިދިޔަ ކުއާޓަރުގައި ވަނީ ދަށަށް ގޮސްފަ އެވެ.

ދެވަނަ ކުއާޓަރުގައި 9.3 ޕަސެންޓުން ދަށަށް ދިޔަ ހަކަތައިގެ ދާއިރާ، މިދިޔަ ކުއާޓަރުގައި ވަނީ 3.3 ޕަސެންޓު މަތިވެފަ އެވެ. މީގެ މައިގަނޑު ސަބަބަކީ އެމްއެމްއޭގެ ރިޕޯޓުގައި ބުނި ގޮތުގައި، ކަރަންޓުގެ އަގުތައް 4.7 ޕަސެންޓް އިތުރުވުމެވެ.

ކަރަންޓުގެ އަގުތައް މަތިވިޔަސް، ޕެޓްރޯލްގެ އަގު މިދިޔަ ކުއާޓަރުގައި ދަށްވެފައިވާކަން އެ ރިޕޯޓުގައި ފާހަގަ ކޮށްފައިވެ އެވެ.

އެމްއެމްއޭގެ ރިޕޯޓުގައި ލަފާކޮށްފައިވާ ގޮތުން، އަންނަ އަހަރު ސަބްސިޑީތަކަށް ގެންނަ ބަދަލާ ގުޅިގެން ތަކެތީގެ އަގު ފިނޭންސް މިނިސްޓްރީން ލަފާކޮށްފައިވާ މިންވަރަށް ވުރެ އިތުރުވާނެ އެވެ.

އަންނަ އަހަރަށް ލަފާކޮށް ރައްޔިތުންގެ މަޖިލިހަށް ހުށަހަޅާފައިވާ ބަޖެޓްގައިވާ ގޮތުން އަންނަ އަހަރު އިންފްލޭޝަން ހުންނާނެ ކަމަށް ލަފާކޮށްފައިވަނީ 3.9 ޕަސެންޓްގަ އެވެ.

ނަމަވެސް، އެމްއެމްއޭގެ ރިޕޯޓުގައި ބުނީ އަންނަ އަހަރުގެ ދެވަނަ ކުއާޓަރުގައި ތަކެތީގެ އަގު 5.2 ޕަަސެންޓް މައްޗަށް ގޮސް، އަދި އަންނަ އަހަރުގެ ތިން ވަނަ ކުއާޓަރުގައި އިންފްލޭޝަން 4.7 ޕަސެންޓްގައި ހުންނާނެ ކަމަށް ލަފާކުރެވޭ ކަމަށެވެ.