އެންމެ ބޭނުންޖެހިފައިވާ މީހުންނަށް ސަބްސިޑީ ދޭން ފެށުމުން އިންފްލޭޝަން 7.5 ޕަސެންޓަށް އަރާނެ: ވޯލްޑް ބޭންކް

މި އަހަރު ތަކެތީގެ އަގު އުފުލޭ ވަރު 7.5 ޕަސެންޓަށް އަރާނެ ކަމަށް މާލީ އިދާރާ، ވޯލްޑް ބޭންކުން ލަފާކޮށްފި އެވެ.

"ސްކޭލިން ބެކް އެންޑް ރީބިލްޑިން ބަފާސް" ގެ ނަމުގައި ވޯލްޑް ބޭންކުން ނެރުނު ރިޕޯޓުގައި ބުނީ، މި އަހަރުގެ އިންފްލޭޝަން އުފުލޭނެ ކަމަށް ލަފާކުރެވޭ އެންމެ ބޮޑު ސަބަބަކީ ސަބްސިޑީ ރިޕޯމު ކުރުން ކަމަށެވެ.

ސަރުކާރުން ވަނީ ސަބްސިޑީ ޓާގެޓްކޮށް އެންމެ ބޭނުން ޖެހިފައިވާ މީހުންނަށް އެ ލިބޭނެ ގޮތްތައް ފަހިކޮށްދޭން ފްލޭން ކޮށްފަ އެވެ. އަންނަ ޖޫން މަހުން ފެށިގެން އެ ފިޔަވަޅުތައް އަޅަން ފަށާނެ ކަމަށް ފިނޭންސް މިނިސްޓްރީން ބުނެފައި ވެ އެވެ.

އެންމެ ބޮޑަށް ބޭނުން ޖެހިފައިވާ މީހުންނަށް ސަބްސިޑީ ދިނުމަށް ދައުލަތުގެ މި އަހަރުގެ ބަޖެޓުގައި 600 މިލިއަން ރުފިޔާ ހިމަނާފައި ވެ އެވެ. ބަޖެޓުގައިވާ ގޮތުން ކަރަންޓާއި ތެލާއި ކާޑާއި ނަރުދަމާގެ ހިދުމަތްތަކަށް ދޭ ސަބްސިޑީ ބަދަލުކޮށް، ޑައިރެކްޓް ޓްރާންސްފާ ނިޒާމަކަށް ބަދަލު ކުރުމަށް ވަނީ ކަނޑައަޅައިފަ އެވެ. އެއާ އެކު، ސަބްސިޑީ އަށް ކުރާ ހޭދައިން 2.5 ބިލިއަން ރުފިޔާ ކުޑަކުރެވޭނެ ކަމަށް ބަޖެޓުގައި ވެ އެވެ.

ސަބްސިޑީއަށް ގެންނަ ބަދަލާ ގުޅިގެން އަނެއްކާ ވެސް ތަކެތީގެ އަގު ހަމައަކަށް އެޅެން ފަށާނީ އަންނަ އަހަރު ކަމަށް ވޯލްޑް ބޭންކުން ބުންޏެވެ. އަންނަ އަހަރު އިންފްލޭޝަން 6.5 ޕަސެންޓަށް ދަށަށް ދާ އިރު ތަކެތީގެ އަގު އުފުލޭ ވަރު 2026 ގައި ހުންނާނީ ފަސް ޕަސެންޓުގައި ކަމަށް ވޯލްޑް ބޭންކުން ލަދާކުރެ އެވެ.

މިދިޔަ އަހަރު ރާއްޖޭގެ އިންފްލޭޝަން ހުރީ 2.9 ޕަސެންޓުގަ އެވެ. އެހެންވެ، މި އަހަރު ސަބްސިޑީއާ ހެދި އިންފްލޭޝަން އެ އިތުރުވަނީ 4.6 ޕަސެންޓެވެ.

ވޯލްޑް ބޭންކުން ލަފާކުރަނީ މި އަހަރު ރާއްޖޭގެ އިގްތިސާދު ކުރިއަރާނީ 4.7 ޕަސެންޓުގަ އެވެ. މިއީ މަރުކަޒީ ބޭންކް، އެމްއެމްއޭ އިން ވެސް ލަފާކުރާ ވަރެވެ.