ސަރުކާރުން ވަނީ 64 ބިލިއަން ރުފިޔާގެ ޓީބިލް ވިއްކާފައި: ވޯލްޑް ބޭންކް

ސަރުކާރުން ރާއްޖޭގެ ފައިނޭންޝަލް ސެކްޓަރު މެދުވެރިކޮށް 64 ބިލިއަން ރުފިޔާގެ ޓީބިލް މިހާތަނަށް ވިއްކާފައިވާ ކަން ވޯލްޑް ބޭންކުގެ ރިފޯޓުގައި ބުނެފި އެވެ.

އެ ބޭންކުން އާންމުކުރި "ސީކިން ސްޓެބިލިޓީ އިން ޓާބިއުލަންޓް ޓާމްސް" ރިޕޯޓުގައިވާ ގޮތުން ރާއްޖެ އިން އެތެރޭގެ ދަރަނި ނަގާ އަދަދު 68 ޕަސެންޓަށް ވަނީ އިތުރު ވެފަ އެވެ. ބޭންކިން ސެކްޓަރާއި ޕެންޝަން ފަންޑު މެދުވެރިކޮށް ވިއްކާ ޓީބިލް ވެސް ވަރަށް ބޮޑަށް އިތުރުވެފައިވާ ކަމަށް އެ ރިޕޯޓުގައި ބުންޏެވެ.

ސަރުކާރުގެ ހަރަދުތައް ހަމަޖެއްސުމަށް ވިއްކާ ޓީބިލްގެ އިތުރުން ސަރުކާރު ހިއްސާވާ ކުންފުނިތަކަށް ދޫކޮށްފައިވާ ލޯނުގެ އަދަދު 5.9 ބިލިއަން ރުފިޔާ އަށް އަރާ ކަމަށް ވެސް އެ ރިޕޯޓުގައި ވެ އެވެ.

ފިނޭންސް މިނިސްޓްރީގެ ތަފާސްހިސާބުތައް ދައްކާ ގޮތުން ޓީބިލްގެ އިތުރުން ބޭންކުތަކުން ނަގާފައިވާ އެހެން ލޯނުތަކާ އެކު ރާއްޖޭގެ އެތެރޭގެ ދަރަނި ވަނީ 74 ބިލިއަން ރުފިޔާ އަށް އަރައިފަ އެވެ.

ސަރުކާރުން ކޮންމެ ހަފްތާއަކު އަންނަނީ ޓީބިލް ވިއްކަން ހުޅުވައިލަމުންނެވެ. ޓީ ބިލް ވިއްކަނީ އެއް މަހާއި އެއް އަހަރާ ދެމެދުގެ މުއްދަތަކަށެވެ. އޭގެ އިންޓްރެސްޓް ރޭޓު އުޅެނީ 3.5 ޕަސެންޓާއި 4.6 ޕަސެންޓާ ދެމެދުގެ ރޭޓުތަކެއްގަ އެވެ.

ވޯލްޑް ބޭންކުން ބުނިގޮތުގައި، މިހާތަނަށް ނަގާފައިވާ ޖުމްލަ ދަރަނި އިތުރުވަމުންދާ އިރު ފައިނޭންޝަލް ސެކްޓަރު މެދުވެރިކޮށް ނަގާ ދަރަނި އަހަރުން އަހަރަށް ނުވަ ޕަސެންޓަށް އިތުރުވަމުންނެވެ. ބޭންކްތަކުގެ ޖުމްލަ އެސެޓުގެ 36 ޕަސެންޓު ނިސްބަތް ވަނީ ސަރުކާރުން ނަގާ ދަރަންޏެވެ. އެހެން މާލީ އިދާރާތައް ކަމުގައިވާ ޕެންޝަން އޮފީސް ފަދަ ތަންތަނުގެ ޖުމްލަ އެސެޓުގެ 68 ޕަސެންޓު ދަރަނި ސަރުކާރަށް ނިސްބަތްވާ ކަމަށް ވޯލްޑް ބޭންކުން ބުނެފައިވެ އެވެ.

އެ ބޭންކުން ބުނީ، ދައުލަތުގެ ޖުމްލަ ދަރަނި 126 ބިލިއަން ރުފިޔާގައި ހުރި އިރު އެހާ ބޮޑަށް އެތެރޭގެ ދަރަންޏަށް ބަރޯސާވާން ޖެހެނީ، ރާއްޖޭގެ ކްރެޑިޓް ރޭޓިން ދަށަށް ގޮސް، ބޭރުން ފައިނޭންސް ހޯދުމަށް ދަތިތައް ކުރިމަތިވެފައިވާތީ ކަމަށެވެ.

ވޯލްޑް ބޭންކުން ބުނީ، ރާއްޖެއިން ދަރަނި އަދާކުރަން ހޭދަކުރާ ވަރު އަހަރުން އަހަރަށް 13 ޕަސެންޓަށް އިތުރުވަމުންދާ ކަމަށެވެ. މި އަހަރު ދަރަނި އަދާކުރަން 6.3 ބިލިއަން ރުފިޔާ ހޭދަކުރަން ޖެހެ އެވެ. މިދިޔަ އަހަރު ދަރަނި އަދާކުރަން ހޭދަކުރީ 5.5 ބިލިއަން ރުފިޔާ އެވެ.

މި އަހަރު ދައްކަން ކަނޑައަޅާފައިވާ ދަރަނީގެ ތެރެއިން އިންޑިއާ އަށް ދައްކަން ޖެހޭ 50 މިލިއަން ޑޮލަރު (770 މިލިއަން ރުފިޔާ) އިތުރު އެއް އަހަރަށް ވަނީ ފަސްކޮށްދީފަ އެވެ.

ވޯލްޑް ބޭންކްގެ ރިޕޯޓުގައިވާ ގޮތުން ޗައިނާ އާއި ޔޫއޭއީ އިން ނެގި ދަރަނިތައް އަދާކުރުން ފަސްކުރުމަށް އެ ގައުމުތަކާ އެކު ސަރުކާރުން އަންނަނީ މަޝްވަރާ ކުރަމުންނެވެ.