ސަބްސިޑީ ރިފޯމް ކުރާނީ އަންނަ އަހަރު

ސަރުކާރުން ސަބްސިޑީ ދޭ އުސޫލު ބަދަލުކޮށް، ވަކިވަކި ފަރުދުންގެ ހާލަތަށް ބަލައިގެން ސަބްސިޑީ ދިނުމުގެ މަސައްކަތް ކުރުން އަންނަ އަހަރަށް ފަސްކޮށްފި އެވެ.

ފިނޭންސް މިނިސްޓްރީން ބުނީ، ސަބްސިޑީ ރިފޯމު ކުރުމަށް ބޭނުންވާ ސޮފްޓްވެއާ ނިންމައި، އެކަމަށް ބޭނުންވާ މައުލޫމާތުތައް އެއްކުރަމުން އަންނަ ކަމަށެވެ.

އެ މިނިސްޓްރީން ބުނީ، ސޮފްޓްވެއާ ގުޅޭ ފަންނީ ކަންކަމާ އެކު، މިހާރު ޕްލޭން ކޮށްފައިވާ ގޮތުން އެކަން ދެން ކުރެވޭނީ އަންނަ އަހަރު ކަމަށެވެ. ސަބްސިޑީ ރިފޯމު ލަސްވަނީ، އެކަން ވީހާ ވެސް ރަނގަޅަށް ޕްލޭން ކޮށްގެން، އެންމެ ބޭނުން ޖެހިފައިވާ މީހުން ދެނެގަނެގެން އެކަން ކުރުމަށް ކަމަށް ފިނޭންސް މިނިސްޓްރީން ބުންޏެވެ.

ސަބްސިޑީ ރިފޯމަށް މިއަހަރު ބަޖެޓުގައި ވެސް 600 މިލިއަން ރުފިޔާ ކަނޑައަޅާފައި ވެ އެވެ. އެކަން ތަންފީޒު ކުރަން ކުރިން ނިންމާފައި އޮތީ މި އަހަރުގެ ޖުލައި މަހުން ފެށިގެންނެވެ. އެކަމަކު، އެ މަހުގައި އެކަން ނުކުރެވުނީ، ބޭނުންވާ ޕްލޭންތައް އެކުލަވައިނުލެވޭތީ ކަމަށް ފިނޭންސް މިނިސްޓްރީން ބުންޏެވެ.

މި އަހަރަށް ކަނޑައެޅި ދައުލަތުގެ ބަޖެޓުގައި ކަނޑައަޅާފައި ވަނީ ކަރަންޓާއި ތެލާއި ކާޑާއި ނަރުދަމާގެ ހިދުމަތްތަކަށް ދޭ ސަބްސިޑީ ބަދަލުކޮށް، ޑައިރެކްޓް ޓްރާންސްފާ ނިޒާމަކަށް ބަދަލު ކުރުމެވެ. އެއާ އެކު، ސަބްސިޑީއަށް ކުރާ ހޭދައިން 2.5 ބިލިއަން ރުފިޔާ ކުޑަ ކުރެވޭނެ ކަމަށް ބަޖެޓުގައިވެ އެވެ. ނަމަވެސް، މިހާރު އެކަން ހާސިލެއް ނުވާނެ އެވެ.

އެންމެ ބޭނުން ޖެހިފައިވާ މީހުންނަށް ސަބްސިޑީ ދޭން ފެށުމުން އާބާދީގެ 60 ޕަސެންޓަށް އޭގެ ފައިދާ ލިބޭނެ އެވެ. އެންމެ ބޮޑު އާމްދަނީއެއް ލިބޭ 40 ޕަސެންޓް ގޭބީސީތަކަށް ސަރުކާރުގެ ސަބްސިޑީ އެހީ ދިނުން ހުއްޓާލެވޭނެ އެވެ. އެކަން ކުރާނެ ގޮތްތައް ކުރިއަށް ދުވަސްތަކުގައި އާންމު ކުރާނެ ކަމަށް ފިނޭންސް މިނިސްޓްރީން ވަނީ ބުނެފަ އެވެ.

މިދިޔަ ފަސް އަހަރު ސަބްސިޑީ އަށް ވަނީ ދައުލަތުގެ ބަޖެޓުން 32 ބިލިއަން ރުފިޔާ ހޭދަކޮށްފަ އެވެ. ދައުލަތުން ސަބްސިޑީގެ ހަރަދުތަކަށް 2018 ވަނަ އަހަރު 3.4 ބިލިއަން ރުފިޔާ ހޭދަކުރި އިރު މިދިޔަ އަހަރު އެ ހަރަދު 10 ބިލިއަން ރުފިޔާ އަށް އަރާނެ އެވެ.

ސަބްސިޑީ ރިފޯމުކޮށް، އެކަމަށް ކުރާ ހޭދަ ހަމަނުޖެއްސޭނެ ކަމަށާއި އެކަމަށް ކުރާ ހަރަދު ކުޑަ ކުރުމަށް ތަކުރާރުކޮށް މާލީ އިދާރާތައް އައިއެމްއެފް އާއި ވޯލްޑް ބޭންކުން އަންނަނީ ލަފާދެމުންނެވެ.