އެމްއައިޓީޑީސީން މަޝްރޫއުތައް ހިންގުމުގެ ނަމުގައި 52.3 މިލިއަންގެ ބޮޑު އިސްރާފެއް!

މޯލްޑިވްސް އިންޓަގްރޭޓަޑް ޓޫރިޒަމް ޑިވެލޮޕްމަންޓް ކޯޕަރޭޝަން (އެމްއައިޓީޑީސީ) އިން 52.35 މިލިއަން ރުފިޔާ ހަރަދު ކޮށްގެން މިދިޔަ އަހަރުތަކުގައި ތިން މަޝްރޫއެއް ފެށިޔަސް، އެ އިން އެއްވެސް މަޝްރޫއެއްގެ މަސައްކަތް ނުނިމި ހުއްޓިފައިވާ ކަމަށް އޮޑިޓަ ޖެނެރަލްގެ އޮފީހުން ބުނެފި އެވެ.

އެމްއައިޓީޑީސީގެ ހާއްސަ އޮޑިޓް ރިޕޯޓުގައިވާ ގޮތުން، ރާއްޖޭގައި މެދުފަންތީގެ ޓޫރިޒަމް އިތުރަށް ތަރައްގީކޮށް، ޕްރޮމޯޓް ކުރަން ކުރީގެ ރައީސް އަބްދުﷲ ޔާމީންގެ ވެރިކަމުގައި 2016 ގައި އުފެއްދި ކުންފުނިން ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގައި 2021 ވަނަ އަހަރުގެ ނިޔަލަށް ތިން މަޝްރޫއެއް ފެށި އެވެ.

ލ. ބަރެސްދޫ އިންޓެގްރޭޓެޑް ރިސޯޓް އައިލެންޑް ޑިވެލޮޕްމަންޓް ޕްރޮޖެކްޓާއި ކ. ކާށިދޫގައި ކުރިއަށް ގެންދިޔަ ކާށިދޫ ޓޫރިސްޓް ވިލެޖް ޕްރޮޖެކްޓް އަދި ކ. އަތޮޅުގެ 10 ފަޅެއް ހިއްކައި ތަރައްގީ ކުރުމަށް ހިންގި ޕްރޮޖެކްޓް "ޕާމް" އަށް ޖުމްލަ 52.35 މިލިއަން ރުފިޔާ ހަރަދު ކޮށްފައިވާ ކަމަށް ރިޕޯޓުގައި ބުންޏެވެ.

"ނަމަވެސް އެއްވެސް ޕްރޮޖެކްޓެއްގެ މަސައްކަތް ނިމިފައި ނުވޭ،" އޮޑިޓު ރިޕޯޓުގައި ބުންޏެވެ.

އެމްއައިޓީޑީސީން ފެށި ތިން މަޝްރޫއަށް ކުރި ހަރަދު

ބަރެސްދޫ ޕްރޮޖެކްޓު - 22.02 މިލިއަން ރުފިޔާ

ކ. ކާށިދޫ ޕްރޮޖެޓު - 26.72 މިލިއަން ރުފިޔާ

ކ. އަތޮޅު ފަޅުތަކެއް ހިއްކުމުގެ ޕްރޮޖެކްޓު - 3.61 މިލިއަން ރުފިޔާ

އެ ރިޕޯޓުގައި ބުނީ، ބަރެސްދޫ ޕްރޮޖެކްޓް ކުރިއަށް ނުގެންދާއިރު، އެ މަސައްކަތް ހަވާލުކުރި ކުންފުންޏަށް އެޑްވާންސް ޕޭމަންޓްގެ ގޮތުގައި ދީފައިވާ 975,000 ޑޮލަރު އަނބުރާ ލިބިފައިނުވާ ކަމަށާއ، އެޑްވާންސް ފައިސާ ކޮންޓްރެކްޓަރަށް ދޫކޮށްފައިވަނީ އެޑްވާންސް ޕޭމަންޓް ގެރެންޓީއެއް ނުހޯދައި ކަމަށެވެ.

ކާށިދޫ ޓޫރިސްޓް ވިލެޖް ޕްރޮޖެކްޓްގެ ފޭސް 1 ގައި ހިމެނޭ މަސައްކަތްތަކަށް ކަނޑައަޅައި 1,656,346 ޑޮލަރުގެ ތެރެއިން 52 ޕަސެންޓު ހަރަދު ކޮށްފައިވީ ނަމަވެސް ފޭސް 1 ގައި ހިމެނޭ ޖުމުލަ 54 އެނދުގެ ތިން ގެސްޓް ހޮޓަލާއި މަލްޓި ޕާޕޯސް، ވޭސްޓް މެނޭޖްމަންޓް އަދި މެއިންޓަނަންސަށް ވަކިވަކި އިމާރާތްތަކެއް އެޅުމުގެ މަސައްކަތުގެ ތެރެއިން، މަސައްކަތް ކުރިޔަށް ގެންދިޔައީ ހަމައެކަނި އެއް ގެސްޓް ހޮޓަލާއި އާއި ވޭސްޓް މެނޭޖްމަންޓް ބިލްޑިންގް އަދި މެއިންޓަނަންސް ބިލްޑިންގެ މަސައްކަތް އެކަންޏެވެ.

"އަދި މި ތިން އިމާރާތް ވެސް އެއްކޮށް ނިމިފައި ނުވާކަން ފާހަގަކުރެވުނު،" ރިޕޯޓުގައި ބުންޏެވެ.

ކ. އަތޮޅުގެ 10 ފަޅެއް ތަރައްގީ ކުރުމުގެ މަޝްރޫއުގައި، ތިން ފަޅެއްގެ އީއައިއޭ އާއި މާސްޓާ ޕްލޭން ހެދުމަށް، ސިންގަޕޫރުގެ ކުންފުންޏަކާ ހަވާލުކޮށް އެކަމަށް 3.6 މިލިއަން ރުފިޔާ ހަރަދުކުރުމަށް ފަހު، އެ ފަޅުތަކަށް އެކުއިޒިޝަން ފީ ދައްކަން ޖެހޭތީ އެއީ ފީސިބަލް ކަމެއް ނޫން ކަމަށް ނިންމައި، އެ ޕްރޮޖެކްޓު ވެސް ހުއްޓާލާފައިވާ ކަމަށް އޮޑިޓު އޮފީހުން ބުންޏެވެ.

އެ ރިޕޯޓުގައި ބުނި ގޮތުގައި، ބަރެސްދޫ ޕްރޮޖެކްޓަށް އަމިއްލަ 35 ފަރާތްތަކުން ޖުމްލަ 55.3 މިލިއަން ރުފިޔާ އިންވެސްޓް ކޮށްފައިވާއިރު، މަޝްރޫއު ހުއްޓާލުމުން، މި އަހަރުގެ އޮކްޓޯބަރު މަހާ ހަމައަށް 22 ފަރާތަކަށް 36 މިލިއަން ރުފިޔާ އަނބުރާ ދީފައެއް ނުވެ އެވެ.

ސަރުކާރުން މާލީ އެހީތެރިކަން ލިބިގެން މެނުވީ، މި ފައިސާ އަނބުރާ ދެވޭނެ ގާބިލްކަމެއް ކުންފުނީގައި ނެތް ކަމަށް ވެސް ރިޕޯޓުގައި ބުންޏެވެ.

އެއާ އެކު، މި މަޝްރޫއުތައް ކުރިއަށް ގެންދިއުމަށް ބޭނުންވާ ފައިސާ ހަމަޖެހުމުން ނޫނީ ޕްރޮޖްކްޓްތަކުގެ މަސައްކަތް ނުފެށުމަށް އެމްއައިޓީޑީސީ އަށް އޮޑިޓު އޮފީހުން ވަނީ އަންގައިފަ އެވެ.

އެމްއައިޓީޑީސީ އުފެއްދި ފަހުން އެކަށީގެންވާ އާމްދަނީއެއް ލިބެމުން ނުދިއުމާއި ކުންފުނިން ފަށާފައިވާ މަޝްރޫއުތައް ވެސް އަވަސް މުސްތަގުބަލެއްގައި ނިމޭނެ ކަމަށް ނުބެލެވޭތީ ކުންފުންޏަށް އެކަށީގެންވާ އާމްދަނީ ލިބޭނެ އިތުރު ގޮތްތައް ހޯދައިގެން ނޫނީ ކުންފުނި އިތުރަށް ނުހިންގަން ވެސް އޮޑިޓު އޮފީހުން ދިން ލަފާތަކުގެ ތެރޭގައި ހިމެނެ އެވެ.