ސިޓީ ބަލިކުރި މެޗުގެ ތަރިއަށް ފަރުވާތެރިވާން ޖެހޭ: އަމޯރިމް

މެންޗެސްޓާ (ޑިސެމްބަރު 16) - ވާދަވެރި މެންޗެސްޓާ ސިޓީ އަތުން ރޭ ފަހު ވަގުތު 2-1 އިން މޮޅުވި މެޗުގައި މެންޗެސްޓާ ޔުނައިޓެޑްގެ ތަރިއަކަށް ވި އަމަޑް ޑިއާލޯ, 22, އާ މެދު ފަރުވާރެރިވުމަށް ކޯޗު ރުބެން އަމޯރިމް އެދިއްޖެ އެވެ.

ޖޮސްކޯ ގްވާޑިއޯލް ފުރަތަމަ ހާފުގައި ޖަހައިދިން ގޯލާ އެކު ސިޓީ މޮޅުވާން ދަނިކޮށް ޔުނައިޓެޑް އެއްވަރުކުރީ ޑިއާލޯ އަށް ކުރި ފައުލަކަށް ލިބުނު ޕެނަލްޓީންނެވެ. ފުރިހަމަ ވަގުތު ހަމަވާން ދެ މިނިޓަށް ވެފައިވަނިކޮށް ޕެނަލްޓީ ކާމިޔާބު ކޮށްދިނީ ބްރޫނޯ ފެނާންޑޭޒް އެވެ. އޭގެ ދެ މިނިޓް ފަހުން ޔުނައިޓެޑް މޮޅުވި ގޯލު ޖެހީ ޑިއާލޯ އެވެ.

"އޭނާއަކީ ގިނަ މަގާމުތަކަށް ކުޅޭ ވަރަށް ހިތްތިރި ކުޅުންތެރިއެއް. އޭނާއާ މެދު އަހަރެމެން ފަރުވާތެރިވާން ޖެހޭ. ބައެއް ފަހަރު މި އަހަރެމެންގެ ކްލަބުގައި ޒުވާން ކުޅުންތެރިން ތިއްބާނެ ވަރަށް ހާއްސަ ހިސާބެއްގައި. ޑިއާލޯ އާ މެދު އެ ގޯސް ތަކުރާރު ނުކުރަމާ،" ޑިއާލޯއާ މެދު އުންމީދުތައް މާ މަތި ނުކުރުމަށް ނަސޭހަތްތެރިވަމުން އަމޯރިމް ބުންޏެވެ.

"ޖެހިގެން އޮންނަ މެޗަކީ އަދި މުޅިން އާ ކަމެއް. އޭނާ ވެސް ޓީމުގައި މަގާމު ދަމަހައްޓަން ބޭނުން ނަމަ އެ ވަރަށް މަސައްކަތް ކުރުމުގައި ދެމިހުންނަން ޖެހޭ."

މާކަސް ރަޝްފޯޑާއި އަލެހަންދްރޯ ގާނާޗޯގެ ބަދަލުގައި ރޭގެ މެޗު ފެށީ ޑިއާލޯ އާއި މޭސަން މައުންޓް އަރުވައިގެންނެވެ. ނަމަވެސް 12 ވަނަ މިނިޓުގެ ތެރޭގައި މައުންޓަށް އަނިޔާވެގެން ވަނީ ކޮބީ މެއިނޫ ކުޅެން އަރުވައިފަ އެވެ. ހަމައެއާއެކު ސިޓީގެ އާލިން ހާލަންޑް ހުއްޓުވުމުގައި މޮޅު ކުޅުމެއް ދެއްކި ޑިފެންޑަރު ހެރީ މެގުއާ އަށް ވެސް އަމޯރިމް ތައުރީފް ކުރި އެވެ.

އަމޯރިމް ބުނީ ބުރަކޮށް މަސައްކަތް ކޮށް ކުރިއަރަމުން އަންނަ ގިނަ ކުޅުންތެރިން ޔުނައިޓެޑްގައި އެބަތިބި ކަމަށެވެ. އަދި ޑިއާލޯގެ ކުރިއެރުންތަކުގައި ކުރީގެ ކޯޗުން ކަމަށްވާ އެރިކް ޓެން ހާގް އާއި ރޫޑް ވެން ނިސްޓެލްރޫއީގެ މަސައްކަތްތަކަށް ވެސް އޭނާ ތައުރީފް ކުރި އެވެ.

ސިޓީ ބަލިކޮށް ޔުނައިޓެޑް ވަނީ 22 ޕޮއިންޓާ އެކު 13 ވަނައަށް ކުރިއަށް ޖެހިލައިފަ އެވެ. އެންމެ ފަހުގެ ޗެމްޕިއަން ސިޓީ އޮތީ މިހާތަނަށް ކުޅުނު 16 މެޗުން ލިބުނު 27 ޕޮއިންޓާ އެކު ފަސް ވަނައިގަ އެވެ.

ލީގުގައި ރޭ ޓޮޓެންހަމުން ވަނީ ރަށުން ބޭރުގައި 5-0 އިން ސައުތެމްޓަން ބަލިކޮށްފަ އެވެ. ޓޮޓެންހަމްގެ ފަސް ގޯލު ވެސް ޖަހާފައި ވަނީ ފުރަތަމަ ހާފުގަ އެވެ.

މީގެ އިތުރުން ޗެލްސީ ވަނީ 2-1 އިން ބްރެންޓްފޯޑް ބަލިކޮށް، އެއް މެޗު މަދުން ކުޅެގެން އެއް ވަނައިގައި އޮތް ލިވަޕޫލާ ދެ ޕޮއިންޓަށް ގާތް ކޮށްފަ އެވެ. ލިވަޕޫލް ވަނީ 15 މެޗުން 36 ޕޮއިންޓް ހޯދައިފަ އެވެ. ޗެލްސީ ވަނީ މިހާތަނަށް 16 މެޗުން 34 ޕޮއިންޓް ހޯދައިފަ އެވެ.