ފޮޑެންއަކީ ޕްރިމިއާ ލީގުގެ އެންމެ މޮޅު ކުޅުންތެރިޔާ: ގާޑިއޯލާ

މެންޗެސްޓާ (މާޗު 4) - މެންޗެސްޓާ ސިޓީން ފަހަތުން އަރައި 3-1 އިން ވާދަވެރި މެންޗެސްޓާ ޔުނައިޓެޑް ބަލިކުރި މެޗުގައި ދެ ގޯލު ޖެހި ފިލް ފޮޑެން އަލީ އިނގިރޭސި ޕްރިމިއާ ލީގުގެ އެންމެ މޮޅު ކުޅުންތެރިޔާ ކަމަށް ސިޓީގެ ކޯޗު ޕެޕް ގާޑިއޯލާ ބުނެފި އެވެ.

މެޗުގެ ނުވަވަނަ މިނިޓުގައި މާކަސް ރަޝްފޯޑް އޭރިއާ ބޭރުން ކާމިޔާބު ކުރި ގޯލުން ފުރަތަމަ ހާފު ލީޑޫ ކުރީ ޔުނައިޓެޑެވެ. ނަމަވެސް ދެވަނަ ހާފުގައި ސިޓީން ވަނީ އެޓީމުގެ ފެންވަރު ދައްކާލައިފަ އެވެ. މި ހާފުގައި ޔުނައިޓެޑްގެ ކޯޗު އެރިކް ޓެން ހާގް ރެފްރީއާ ޒުވާބު ކުރުމުން ރީނދޫ ކާޑު ވެސް ދެއްކި އެވެ.

ފޮޑެންގެ ދެ ގޯލުން ސިޓީން ނަތީޖާ އަނބުރާލި އިރު، މެޗުގެ އިތުރު ވަގުތުގައި ތިންވަނަ ގޯލު ޖެހީ އާލިން ހާލަންޑެވެ.

"އޭނާ [ފޮޑެން] އަކީ ޕްރިމިއާ ލީގުގެ އެންމެ މޮޅު ކުޅުންތެރިޔާ މިވަގުތު އޭނާ ކުރާ މަސައްކަތަށް ބަލާއިރު. ކިހާ މެޗެއް އޭނާ އެ ކުޅެނީ، ގަބޫލުކުރަން ވެސް ދަތިވޭ،" މިހާތަނަށް ލީގުގައި 11 ގޯލު ޖަހައި، ހަތް ގޯލު އެސިސްޓް ކޮށްފައިވާ ފޮޑެންގެ ކުޅުމާ މެދު ގާޑިއޯލާ ބުންޏެވެ.

މި ނަތީޖާއާ އެކު ސިޓީ ވަނީ ލީގުގައި އެއްވަނައިގައި އޮތް ލިވަޕޫލާ ދެކޮޅަށް އަންނަ އާދިއްތަ ދުވަހު ނުކުތުމުގެ ކުރިން އަމިއްލަ ކޮންޓްރޯލް ނަގައިފަ އެވެ. ލިވަޕޫލް ވަނީ ހޮނިހިރު ދުވަހުގެ ރޭ މެޗުގެ އެންމެ ފަހު ވަގުތުކޮޅުގައި ޑާވިން ނޫނޭޒް ޖަހައިދިން ގޯލުން 1-0 އިން ނޮޓިންހަމް ފޮރެސްޓް ބަލިކޮށްފަ އެވެ.

ލިވަޕޫލް އެއްވަނައިގައި އޮތީ 27 މެޗުން 63 ޕޮއިންޓް ހޯދައިގެންނެވެ. އެއް ޕޮއިންޓް މަދުން ސިޓީ އޮތީ ދެވަނައިގަ އެވެ. އަންނަ ހަފްތާ ރަށުން ބޭރުގައި ލިވަޕޫލް ބަލި ކޮށްގެން ސިޓީ އަށް އަލުން އެއްވަނައަށް ޖެހިލުމުގެ ފުރުސަތު އެބަ އޮތެވެ.

މި ހަފްތާ ކުޅުނު އިރުތު ބައެއް މެޗުތަކަށް ބަލައިލާއިރު ނިއު ކާސަލް ޔުނައިޓެޑުން 3-0 އިން ވުލްވްސް ވަނީ ބަލި ކޮށްފަ އެވެ. ޓޮޓެންހަމުން 3-1 އިން ކްރިސްޓަލް ޕެލަސްގެ މައްޗަށް ކުރި ހޯދިއިރު ޗެލްސީ އާއި ބްރެންޓްފޯޑް ބައްދަލުކުރި މެޗު ނިމުނީ 2-2 އިން އެއްވަރު ވެގެންނެވެ.

ލީގުގެ ތިންވަނައިގައި އޮތް އާސެނަލް މިރޭ ރަށުން ބޭރުގައި ޝެފީލްޑް ޔުނައިޓެޑާ ދެކޮޅަށް ނުކުންނާނެ އެވެ.