ފްރާންސް އެފްއޭގެ އާ ރައީސް އިންތިހާބު ކުރީ އެމެޗާ ކްލަބްތަކަށް ވެސް ވޯޓް ލެވޭ ގޮތް ހެދުމަށް ފަހު

ޕެރިސް (ޑިސެމްބަރު 14) - ފްރާންސް ފުޓްބޯޅަ ފެޑެރޭޝަންގެ ރައީސްގެ މަގާމަށް، ކުރީގެ ފެޑެރޭޝަންގެ ނައިބު ރައީސް ފިލިޕޭ ޑިއާލޯ އިންތިހާބު ކޮށްފި އެވެ.

ކުރީ އަހަރުތަކާ ހިލާފަށް ގިނަ އެމެޗާ ކްލަބްތަކެއް ވެސް ބައިވެރިކޮށްގެން އިއްޔެ ކުރިއަށް ގެންދިޔަ މި އިންތިހާބުގައި ޑިއާލޯ ވަނީ 55 ޕަސެންޓަށް ވުރެ މަތިން ވޯޓު ހޯދައިފަ އެވެ. އިންތިހާބުގައި އޭނާގެ ވާދަވެރިޔަކީ ކުރީގެ ރައީސް ނޮއެލް ލެ ގްރޭޓްއާ ކުރިން ގާތް ގުޅުމެއް ބޭއްވި ޕިއެރޭ ސެމްސޮނޮފް އެވެ.

ކުރިން 250 ފަރާތަކަށް ފެޑެރޭޝަންގެ އިންތިހާބުގައި ވޯޓުލުމުގެ ފުރުސަތު އޮތް ނަމަވެސް، މިފަހަރުގެ އިންތިހާބުގައި ޕްރޮފެޝަނަލް ކްލަބްތަކާ އެކު އެމެޗާ ކްލަބްތަކުގެ ރައީސުން ވެސް ހިމެނޭހެން 11،500 ފަރާތެއް މިފަހަރުގެ އިންތިހާބުގައި އިލެކްޓްރޯނިކް ވޯޓިން މެދުވެރިކޮށް ބައިވެރިކޮށްފައިވެ އެވެ.

އުމުރުން 61 އަހަރުގެ ޑިއާލޯ ވިދާޅުވީ މި ވޯޓުން ލިބުނު ކާމިޔާބީއާ އެކު އެގައުމުގެ ފުޓްބޯޅައިގެ ޑިމޮކްރަސީ ދައްކުވައިދީފި ކަމަށެވެ. އަންނަ އަހަރުގެ ޖެނުއަރީ މަހުގެ މެދުތަރެއިން ފެށިގެން، ފްރާންސްގެ ފުޓްބޯޅައާ ބެހޭ ގޮތުން މުޅި ގައުމުގައި މަޝްވަރާއެއް ފަށާނެ ކަމަށާއި އެމެޗާ ފުޓްބޯޅައަށް އެހީ ހޯދުމަށް އެކުގައި މަސައްކަތް ކޮށް ޕްލޭނެއް ހަދާނެ ކަމަށް ވެސް އޭނާ ވިދާޅުވި އެވެ.

މީގެ އިތުރުން ޑިއާލޯ ވަނީ އެމެޗާ ކްލަބްތަކަށް ދޭ ބަޖެޓް އިތުރުކޮށް، ކުރިއަށް އޮތް ހަތަރު އަހަރުތެރޭ އެގައުމުގެ އަންހެން ކުޅުންތެރިންގެ އަދަދު ދެގުނަ ކުރުމުގެ ވިސްނުން ގެންގުޅޭކަން ވެސް ހާމަ ކޮށްފަ އެވެ.

ކުރީގެ ރައީސް ލެ ގްރޭޓް ފްރާންސް ފުޓްބޯޅަ ފެޑެރޭޝަންގެ ރައީސްކަމުން މިދިޔަ އަހަރުގެ ކުރީކޮޅު އިސްތިއުފާ ދިނީ، ޖިންސީ ގޯނާގެ ތުހުމަތުތަކަކާ ގުޅިގެން މަގާމުގެ މަސްއޫލިއްޔަތާ ދުރުގައި ހުރުމަށް ފަހު އެވެ.

ލެ ގްރޭޓްގެ މައްޗަށް ކުރެވުނު ޖިންސީ ގޯނާގެ މައްސަލައިގެ ދައުވާތައް އެހާ ސީރިއަސް ކަމެއް ނެތް ކަމަށް ބުނެ އެގައުމުގެ ޕްރޮސެކިއުޓަރުން ވަނީ މިދިޔަ މަހު ދައުވާތައް ބާތިލްކޮށްފި އެވެ.

ލެ ގްރޭޓް މިދިޔަ އަހަރުގެ ޖެނުއަރީ މަހު މަގާމުގެ މަސްއޫލިއްޔަތާ ދުރަށް ޖެހިލި ހިސާބުން ފެށިގެން އެ ފެޑެރޭޝަން ހިންގުމާ ހަވާލުވެ ހުރީ ވެސް ޑިއާލޯ އެވެ.