ލިވަޕޫލް ބަލި ނުވެ ސަލާމަތްވީ ކިރިޔާ، ސްލޮޓް ސަސްޕެންޑް

ލިވަޕޫލް (ޑިސެމްބަރު 15) - މެޗުގެ ބޮޑު ބައިގައި އެއް ކުޅުންތެރިއަކު މަދުކޮށް ކުޅުނު ލިވަޕޫލް ފަހު ވަގުތު 2-2 އިން އެއްވަރުކޮށް ފުލަމްއާ ދެކޮޅަށް ކުޅުނު މެޗުން ޕޮއިންޓެއް ހޯދައިފި އެވެ.

މި މެޗުގައި ލިވަޕޫލްގެ ކޯޗު އާނޭ ސްލޮޓް އަށް ވަނީ ރީނދޫ ކާޑެއް ދައްކައިފަ އެވެ. އެއީ އޭނާ އަށް ލީގުގައި މިހާތަނަށް ދެއްކި ތިންވަނަ ރީނދޫ ކާޑަށް ވުމާ އެކު އެއް މެޗަށް ސަސްޕެންޑް ވީ އެވެ. މިދިޔަ އޮކްޓޫބަރު މަހު ޗެލްސީ އާއި އާސެނަލްއާ ދެކޮޅަށް ކުޅުނު މެޗުގައި ސްލޮޓް އަށް ވަނީ ކާޑު ދައްކައިފަ އެވެ.

ނަމަވެސް ލިވަޕޫލް އެންމެ އަވަހަށް ލީގުގައި އަންނަ ހަފްތާ ޓޮޓެންހަމާ ދެކޮޅަށް ކުޅޭ މެޗުގައި ޓީމަށް އިރުޝާދު ދޭން އެޓީމުގެ ބެންޗުގައި ސްލޮޓް ހުރެވޭނެ އެވެ. އޭނާ ސަސްޕެންޝަން ފުރިހަމަކުރާނީ އަންނަ ބުދަ ދުވަހުގެ ރޭ ސައުތެމްޓަނާ ދެކޮޅަށް ކުޅޭ ލީގް ކަޕް މެޗުގަ އެވެ.

ފުލަމްއާ ދެކޮޅަށް ލިވަޕޫލްގެ ކުޅުންތެރިއަކު މަދުވީ 17 ވަނަ މިނިޓުގައި އެންޑީ ރޮބާޓްސަން އަށް ރަތް ކާޑު ދެއްކުމާ ގުޅިގެންނެވެ. އޭގެ ކުރިން 11 ވަނަ މިނިޓުގައި އަންޑްރެސް ޕެރޭރާ ވަނީ ފުލަމް އަށް ލީޑު ނަގައި ދީފަ އެވެ.

ލިވަޕޫލް އިން ފުރަތަމަ ފަހަރަށް ނަތީޖާ އެއްވަރު ކުރީ ދެވަނަ ހާފު ފެށިގެން ދެވަނަ މިނިޓުގައި ކޯޑީ ގަކްޕޯ ޖަހައިދިން ގޯލުންނެވެ. ނަމަވެސް 76 ވަނަ މިނިޓުގައި ރޮޑްރިގޯ މުނީޒް ވަނީ އަލުން ފުލަމް އަށް ލީޑު ހޯދައި ދީފަ އެވެ.

ލިވަޕޫލަށް އެއްވަރު ކޮށްދިން ގޯލު 86 ވަނަ މިނިޓްގައި ޖަހައިދިނީ ޑިއޯގޯ ޖޮޓާ އެވެ. މިއީ މިދިޔަ އޮކްޓޫބަރު މަހު ލިބުނު އަނިޔާއަކުން ރަނގަޅުވެގެން އައިސް ޖޮޓާ ކުޅުނު ފުރަތަމަ މެޗެވެ.

މި ނަތީޖާއާ އެކު އެއްވަނައިގައި އޮތް ލިވަޕޫލަށް ވަނީ 15 މެޗުން 36 ޕޮއިންޓް ލިބިފަ އެވެ. ދެވަނައިގައި އޮތީ 15 މެޗުން 31 ޕޮއިންޓް ހޯދާފައިވާ ޗެލްސީ އެވެ.

ތިންވަނައިގައި އޮތް އާސެނަލް ވަނީ ރޭ އެވަޓަންއާ ވާދަކޮށް 0-0 އިން އެއްވަރު ވެފަ އެވެ. މިއާ އެކު އެޓީމަށް ވަނީ 16 މެޗުން 30 ޕޮއިންޓް ލިބިފަ އެވެ.

ރޭ ނޮޓިންހަމް ފޮރެސްޓް ވަނީ ފަހުވަގުތު ފަހަތުން އަރައި ދެ ގޯލު ޖަހައިގެން 2-1 އިން އެސްޓަން ވިލާ ބަލިކޮށް ހަތަރުވަނަ އަށް ޖެހިލައިފަ އެވެ. ފޮރެސްޓަށް 16 މެޗުން 28 ޕޮއިންޓް ލިބިފައި ވާއިރު، 16 މެޗުން ލިބުނު 25 ޕޮއިންޓާ އެކު އެސްޓަން ވިލާ އޮތީ ހަވަނައިގަ އެވެ. ފަސްވަނައިގައި އޮތީ 15 މެޗުން 27 ޕޮއިްނޓް ހޯދާފައިވާ މެންޗެސްޓާ ސިޓީ އެވެ.

ލީގުގައި ރޭ ކުޅުނު އިތުރު މެޗުތަކަށް ބަލައިލާއިރު، އިޕްސްވިޗް ޓައުން ވަނީ ފަހު ވަގުތު 2-1 އިން ވުލްވްސް ބަލިކޮށްފަ އެވެ. އަދި ނިއުކާސަލް ޔުނައިޓެޑުން ވަނީ 4-0 އިން ލެސްޓަ ސިޓީ ބަލިކޮށްފަ އެވެ.