ސިޓީ އާއި އާސެނަލަށް ވުރެ ކުރީގައި އަދިވެސް ލިވަޕޫލް

ލަންޑަން (އޮކްޓޫބަރު 5) - އިނގިރޭސި ޕްރިމިއާ ލީގުގައި މިއަދު ލިވަޕޫލުން 1-0 އިން ކްރިސްޓަލް ޕެލަސް ބަލިކޮށް އެއްވަނައިގައި މަގާމު ދެމެހެއްޓި އިރު، ވިއްދާފައި އޮތް މެންޗެސްޓާ ސިޓީ އާއި އާސެނަލް ވެސް މިރޭ ކުޅުނު މެޗު ފަހަތުން އަރައި ކާމިޔާބު ކޮށްފި އެވެ.

ސިޓީން އަމިއްލަ ދަނޑުގައި 3-2 އިން ފުލަމް ބަލި ކުރިއިރު އާސެނަލް އަމިއްލަ ދަނޑުގައި ސައުތެމްޓަންގެ މައްޗަށް ކުރި ހޯދީ 3-1 އިންނެވެ.

ރަށުން ބޭރުގައި ލިވަޕޫލް މިއަދު ހަވީރު ކުޅުނު މެޗުގެ ނުވަވަނަ މިނިޓުގައި އެޓީމުގެ ހަމައެކަނި ގޯލު ޖަހައިދިނީ ޑިއޯގޯ ޖޮޓާ އެވެ. މިއީ އޭނާ ލީގުގައި ލިވަޕޫލްގެ ފުރަތަމަ 11 ގައި ހިމެނިގެން ކުޅުނު 100 ވަނަ މެޗެވެ.

މެޗު ނިމެން 15 މިނިޓަށް ވެފައި ވަނިކޮށް ލިވަޕޫލްގެ ގޯލްކީޕަރު އެލިސަން ބެކާ އަށް އަނިޔާވެގެން ވަނީ ބަދަލު ކޮށްފަ އެވެ. ލިވަޕޫލްގެ ދެވަނަ ކީޕަރު ކޮނޯ ކެލެހާ ވެސް އަނިޔާގައި ހުރުމުގެ ސަބަބުން މި މެޗުގައި ކުޅެން އެރީ 23 އަހަރުގެ ވިޓެޒްލާވް ޖަރޯސް އެވެ. މިއީ އޭނާ ސީނިއާ ޓީމަށް ކުޅެދިން ފުރަތަމަ ފަހަރެވެ.

ސިޓީ ކޮޅަށް ގޯލު ޖަހައި 26 ވަނަ މިނިޓުގައި ފުލަމް އަށް ލީޑު ނަގައިދިނީ އަންޑްރެއާސް ޕެރޭއާ އެވެ. ނަމަވެސް މާ ގިނައިރެއް ނުވެ މަޓެއޯ ކޮވަސިޗް ވަނީ ސިޓީ އަށް އެއްވަރު ކޮށްދީފަ އެވެ.

ދެވަނަ ހާފުގެ ކުރީކޮޅު ކޮވަސިޗް ދެވަނަ ގޯލެއް ޖަހައި ސިޓީ އަށް ލީޑު ނަގައިދިން އިރު، ތިންވަނަ ލަނޑު 82 ވަނަ މިނިޓުގައި ކާމިޔާބު ކުރީ ޖެރެމީ ޑޯކޫ އެވެ.

ފުރިހަމަ ވަގުތު ހަމަވާން ދެ މިނިޓަށް ވެފައި ވަނިކޮށް، މެޗުގައި ގޯލު ޖަހަން ގިނަ ފުރުސަތުތަކެއް ހޯދި ފުލަމް އަށް ފަރަގު ކުޑަ ކޮށްދިނީ ރޮޑްރިގޯ މުނީޒް އެވެ.

އާސެނަލްއާ ދެކޮޅަށް ސައުތެމްޓަނުން ލީޑު ނެގީ ދެވަނަ ހާފު ފެށިގެން 10 ވަނަ މިނިޓުގައި ކަމެރޮން އާޗާ ޖަހައިދިން ގޯލުންނެވެ. ނަމަވެސް ތިން މިނިޓުތެރޭ ކައި ހަވާޓްޒް އާސެނަލް އަށް އެއްވަރު ކޮށްދިން އިރު، އޭގެ 10 މިނިޓު ފަހުން ލީޑު ނެގީ ގެބްރިއެލް މާޓިނެއްލީ ޖަހައިދިން ގޯލުންނެވެ. މެޗު ނިމެނިކޮށް ތިންވަނަ ލަނޑު ޖަހައިދިނީ ބުކަޔޯ ސަކާ އެވެ.

މި ނަތީޖާއާ އެކު ލިވަޕޫލް އެއްވަނައިގައި އޮތީ މިހާތަނަށް ކުޅުނު ހަތް މެޗުން 18 ޕޮއިންޓް ހޯދައިގެންނެވެ. ދެވަނައިގައި އޮތް ސިޓީ އާއި ތިންވަނައިގައި އޮތް އާސެނަލް ވެސް ވަނީ 17 ޕޮއިންޓް ހޯދައިފަ އެވެ.

ސިޓީ އަށް އެއްވަނަ ގެއްލުނީ ކުރީ ހަފްތާ ބަންދުގައި ނިއުކާލަސްއާ ދެކޮޅަށް ކުޅެ އެއްވަރު ވުމުންނެވެ. އޭގެ ކުރީ މެޗުގައި ވަނީ އާސެނަލްއާ ދެކޮޅަށް ކުޅެ އެއްވަރުވެފަ އެވެ. ލީގުގައި މިހާތަނަށް ބަލި ނުވެ އޮތީ ސިޓީ އާއި އާސެނަލް އެވެ.

ލީގުގައި މިރޭ ކުޅުނު އިތުރު މެޗުތަކަށް ބަލައިލާއިރު ބްރެންޓްފޯޑް ވަނީ 5-3 އިން ވުލްވްސް ބަލިކޮށްފަ އެވެ. ބްރެންޓްފޯޑުން ވަނީ ފުރަތަމަ ހާފުގައި ހަތަރު ގޯލު ކާމިޔާބު ކޮށްފަ އެވެ. ވެސްޓް ހޭމް ޔުނައިޓެޑުން 4-1 އިން އިޕްސްވިޗް ޓައުން ބަލިކުރި އިރު ލެސްޓަ ސިޓީ ވަނީ 1-0 އިން ބޯންމަތު ބަލިކޮށްފަ އެވެ.

ނިއުކާސަލް ޔުނައިޓެޑާއި އެވަޓަން ބައްދަލުކުރި މެޗު ނިމުނީ ލަނޑެއް ނުޖެހި އެއްވަރު ވެގެންނެވެ.