އެއްވެސް ރައްޔިތަކަށް ދޭ ސަބްސިޑީ، އާސަންދަ އަދި ޕެންޝަނެއް ނުކަނޑާނަން: ރައީސް

އެއްވެސް ރައްޔިތަކަށް ލިބެމުންދާ ސަބްސިޑީ އާއި އާސަންދަ އަދި ޕެންޝަންގެ ފައިސާ ކަނޑާނުލާނެ ކަމުގެ ޔަގީންކަން ރައީސް ޑރ. މުހައްމަދު މުއިއްޒު ރޭ ދެއްވައިފި އެވެ.

އެ މަނިކުފާނު އެހެން ވިދާޅުވީ، އއ. އަތޮޅަށް އިއްޔެ ކުރެއްވި ދަތުރުފުޅުގައި މަތިވެރި އަށް ވަޑައިގެން ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގަ އެވެ.

ރައީސް ވިދާޅުވީ، މި ސަރުކާރުގެ ސިޔާސަތަކީ މިހާރު ރައްޔިތުމީހާ އަށް ލިބެމުންދާ އެއްވެސް އެއްޗެއް އުނިނުކޮށް، އާމްދަނީ އިތުރުކޮށްދިނުން ކަމަށެވެ.

މިދިޔަ އަހަރުގެ ރިޔާސީ އިންތިހާބުގައި ވައުދުވެވަޑައިގެންނެވި ފަދައިން މި ސަރުކާރުން ފައިސާ ޗާޕު ނުކުރާނެކަން ފާހަގަ ކުރައްވައި ރައީސް މުއިއްޒު ވިދާޅުވީ ސަރުކާރުގެ އަމާޒަކީ ރާއްޖެ ބަނގުރޫޓު ވިޔަނުދީ، ގައުމަށް އިގުތިސޯދީ ގޮތުން ތަރައްގީ ގެނެސް، އުމްރާނީ ތަރައްގީގެ މަސައްކަތްތައް ހިންގަމުން ކުރިއަށް ގެންދިއުން ކަމަށެވެ.

"ކުރިއަށް އޮތް ތަނުގައި އެއްވެސް ރައްޔިތަކަށް ލިބެމުންދާ ސަބްސިޑީއެއް ވެސް ނުކަނޑާނަން. އާސަންދައެއް ވެސް ނުކަނޑާނަން. ރިޓަޔާމަންޓް ޕެންޝަނެއް ވެސް ނުކަނޑާނަން. އަދި އެ އަށް ވުރެ ރަނގަޅު ކޮށްދޭނީ،" ރައީސް ވިދާޅުވި އެވެ.

ސަރުކާރުން ރައްޔިތުންނަށް ދޭ ސަބްސިޑީތަކަށް ގެންނަ ބަދަލުތައް ތަފްސީލް ކޮށްދެއްވަމުން އެ މަނިކުފާނު ވިދާޅުވިގޮތުގައި އެންމެ ބޮޑު ބަދަލަކީ ނާޖާއިޒު ގޮތެއްގައި މީގެ ކުރިން ކުރަމުން ދިޔަ ހަރަދުތައް ކުޑަކުރުމެވެ.

އާސަންދައިގެ ހިދުމަތުގެ ނާޖާއިޒު ބޭނުން ހިފައި، ބޮޑު އަގުގައި ބޭސް ވިއްކުން ހުއްޓުވުން ފަދަ ކަންކަން އެ ބަދަލާ އެކު ކުރައްވާނެ ކަމަށް ރައީސް ވިދާޅުވި އެވެ.

"ބައެއް ބޭސް ރާއްޖޭގައި ވިއްކަމުން އަންނަނީ 1،000 ޕަސެންޓަށް ވުރެ ބޮޑު ފައިދާއެއް ލައިގެން. އެގޮތުން އެންމެ އާންމުކޮށް ވިއްކާ 250 ބޭހަށް ބެލި ނަމަ ވެސް އެއީ ހަގީގަތް ފެންނަން އޮތް ކަމެއް،" ރައީސް މުއިއްޒު ވިދާޅުވި އެވެ.

އެކަމަކު އެ ކަމަށް ގެންނަ ބަދަލުގެ ސަބަބުން އާންމުންނަށް އެއްވެސް އެއްޗެއް ނުގެއްލޭނެ ކަމަށާއި އެސްޓީއޯ ރޭޓުގައި އަގުހެޔޮކޮށް ބޭސް ލިބޭނެ ކަމަށް އެ މަނިކުފާނު ވިދާޅުވި އެވެ.

ސަރުކާރުގެ ވަކިވަކި އިދާރާތަކުން ހިންގާ އަމިއްލަ ރިޓަޔަމެންޓް ސްކީމްގެ ތެރެއިން ވަޒީފާ އިން އަލަށް ރިޓަޔާވާ މުވައްޒަފުންނަށް މަހުން މަހަށް ދޭން ކަނޑައަޅާފައިވާ އެލަވަންސްތައް ނުދޭން މި ފަހުން ނިންމި އެވެ. ނަމަވެސް ރައީސް މުއިއްޒު ވަނީ އެ ނިންމި ނިންމުން އުވާލައްވައިފަ އެވެ.