ފަރަށް އުރިފައިވާ 8 އުޅަނދު އަދިވެސް ފުން ނުކުރޭ!

ރާއްޖޭގެ އެކި ހިސާބުތަކުގައި ފަރަށް އުރިފައިވާ 8 އުޅަނދު އަދިވެސް ފުން ނުކޮށް އެބައޮތް ކަމަށް އީޕީއޭ އިން ބުނެފި އެވެ.

މައުލޫމާތު ހޯދައި ލިބިގަތުމުގެ ގާނޫނުގެ ދަށުން އީޕީއޭ އިން "މިހާރު" އަށް ދިން މައުލޫމާތުގައިވާ ގޮތުގައި، ފަރަށް އުރިފައިވާ 8 އުޅަނދުގެ ތެރޭގައި، މީގެ ހަތް އަހަރު ކުރިން ފަރަށް އެރި އުޅަނދެއް ވެސް ހިމެނެ އެވެ.

ފުން ނުކޮށް އެންމެ ގިނަ ދުވަސްވީ ބޯޓަކީ ފެބްރުއަރީ 21، 2017 ގައި ތ. ފުނައްޑޫ ފަރަށް އަރާފައިވާ "މަރިންޑޯ 1" ޓަގު ބޯޓާއި "އެސްއެމް އެންޑް 2301" ބާޖެކެވެ. ބޭރުގެ އެ ބޯޓުތަކުގެ ރާއްޖޭގެ އޭޖެންޓަކީ ބީއެމްސީ ސްލިޕްވޭ އެންޑް ސެލްވޭޖު ކޮމްޕެނީ ޕްރައިވެޓް ލިމިޑެޓެވެ.

އީޕީއޭ އިން ބުނީ އެ ބޯޓު ފުންކުރަން އެ ކުންފުންޏަށް ތަކުރާރުކޮށް އެންގި ނަމަވެސް، އަދިވެސް އެކަން ކޮށްފައި ނުވާ ކަމަށެވެ.

އަދިވެސް ފުން ނުކޮށް ހުރި ބޯޓުތައް

• މެއި 31، 2018 ގައި ހއ. އިންނަފިނޮޅު ފަރަށް އެރި "ސޮންވާ ގްލޯރީ" ކިޔާ ބާޖު. އޭގެ ރާއްޖޭގެ އޭޖެންޓަކީ ވެސް ބީއެމްސީ ސްލިޕްވޭ އެންޑް ސެލްވޭޖު ކޮމްޕެނީ ޕްރައިވެޓް ލިމިޑެޓް. އެ ބޯޓު އެތަނުން ނަގަން ތަކުރާރުކޮށް އެންގުމުން ވެސް އަދިވެސް އެކަން ކޮށްފައި ނުވޭ.

• ޖުލައި 31، 2018 ގައި ފަރަށް އެރި "ހައި ހްސިއަންގް" ކިޔާ ބޯޓު. އެކަމަކު، މި ބޯޓާ ގުޅޭ އިތުރު ތަފުސީލެއް އީޕީއޭއިން ނުދޭ. އީޕީއޭ އިން ބުނީ އެ ބޯޓުގެ ވެރިފަރާތް ދެނެގަނެވިފައި ނުވާ ކަމަށް.

• ސެޕްޓެމްބަރު 14، 2020 ގައި ށ. ނަލަންދޫ ފަރަށް އެރި "އެމްވީ ހެވީ ސްޓާ" ކިޔާ ބޯޓު. އެއީ، ހެވީ ލޯޑް މޯލްޑިވްސް ޕްރައިވެޓް ލިމިޑެޓްގެ ބޯޓެއް. އެ ބޯޓު އެތަނުން ނަގަން ތަކުރާރުކޮށް އެންގުމުން ވެސް އަދިވެސް އެކަން ކޮށްފައި ނުވޭ.

• އޮކްޓޯބަރު 7، 2022 ގައި ގއ. ރޮނޑާދޫ ފަރަށް އެރި "އަލް ޖަމީލް" ކިޔާ ބޭރުގެ ބޯޓެއް.

• އޮކްޓޯބަރު 10، 2022 ގައި މާލެ އަތޮޅުގައި އޮންނަ ޕަޓީނާ މޯލްޑިވްސް ރިސޯޓު ކައިރިއަށް ފަރަށް އެރި "އޯކިޑް 55" ކިޔާ ބޯޓު. އެއީ އޯކިޑް ހޯލްޑިންސް ޕްރައިވެޓް ލިމިޑެޓްގެ ބޯޓެއް.

• މި އަހަރުގެ ޖުލައި 15 ގައި ހދ. ކުޅުދުއްފުށީ ފަރަށް އެރި "ޓިއަންޖިން" ކިޔާ ބާޖު. އެއީ އިންޑިއާގެ ކުންފުންޏެއް ކަމަށްވާ އޯރިސް އެސްއެސް ލިމިޓެޑުގައި ރަޖިސްޓްރީކޮށްފައިވާ ބޯޓެއް. އެ ބޯޓުގެ ރާއްޖޭގެ އޭޖަންޓަކީ ބީއެމްސީ ސްލިޕްވޭ އެންޑް ސެލްވޭޖު ކޮމްޕެނީ ޕްރައިވެޓް ލިމިޑެޓް. އީޕީއޭއިން ބުނީ އެ ސަރަހައްދުގެ ފަރަށް ލިބިފައިވާ ގެއްލުން ސާވޭކޮށްގެން ބަލާފައިވާ ކަމަށް. އަދި އެ ބާޖު އެތަނުން ނަގަން ވެސް ވެރިފަރާތަށް އަންގާފައިވާ ކަމަށް.

• މި އަހަރުގެ ނޮވެމްބަރު 10 ގައި ހުޅުމާލެ ފަރަށް އެރި "ބްލޫ ވޮޔޭޖާ" ކިޔާ ބޯޓު. އެއީ އޯޝަން އެލެމެންޓްސް ޕްރައިވެޓް ލިމިޑެޓްގެ ބޯޓެއް. އީޕީއޭ އިން ބުނީ އެ ބޯޓު ފުންކުރުމުގެ މަސައްކަތް ފަށާފައިވާ ކަމަށް ބޯޓުގެ ވެރިފަރާތުން މިދިޔަ މަހު 17 ގައި އެ އެޖެންސީއަށް އަންގާފައިވާ ކަމަށް.

ރާއްޖޭގެ ފަރުތަކަށް އަރާ ބޯޓުތައް އަމިއްލައަށް ފުންކުރުމުގެ ގާނޫނީ ބާރުވެރިކަން އީޕީއޭއަކަށް ނޯވެ އެވެ. އެކަން ކުރަން ޖެހެނީ ބޯޓުގެ ވެރިފަރާތުންނެވެ. އަދި ގާނޫނު އޮތް ގޮތުން، ފަރުތަކަށް އަރާ ބޯޓުތައް ޖޫރިމަނާ ކުރެވެނީ ވެސް އެ ބޯޓުތައް ފުންކުރުމުންނެވެ. އެހެންވެ، ބޯޓުތައް ފަރުމަތީގައި އޮންނަހާ ހިނދަކު އީޕީއޭއަށް ކުރެވޭނެ އިތުރު އެއްވެސް ކަމެއް ނޯވެ އެވެ. އެ އެޖެންސީން ވަނީ ރައްޔިތުންގެ މަޖިލީހުގައި ވެސް މިކަމުގެ ކަންބޮޑުވުން ފާޅުކޮށްފަ އެވެ.

އީޕީއޭގެ ޑިރެކްޓާ ޖެނެރަލް އިބްރާހިމް ނައީމް ރައްޔިތުންގެ މަޖިލީހުގެ ތިމާވެއްޓާއި މޫސުމީ ބަދަލުތަކާ ބެހޭ ކޮމިޓީގައި ކުރިން ވިދާޅުވި ގޮތުގައި، ބޭރުގެ އުޅަނދުތައް ފަރަށް އަރައިގެން ޖޫރިމަނާ ކުރުމަށް ފަހު، އެޖެންޓާ ވާހަކަ ދައްކަމުން ދަނިކޮށް އެޖެންޓް ބަދަލުވާ ފަހަރުތަކާއި އުޅަނދު އެހެން މީހަކަށް ވިއްކާލައިގެން އޭގެ ވެރިޔާ ބަދަލުވާ މައްސަލަތައް ވެސް ކުރިމަތިވެ އެވެ. އެކަމުގެ ސަބަބުން ވެސް އަލުން މަޝްވަރާތައް ކުރަންޖެހި، ޖޫރިމަނާ ފައިސާ ހޯދުން ދިގުލައިގެންދެ އެވެ.

ތިމާވެއްޓަށް ގެއްލުން ދިނުމުގެ އެކި މައްސަލަތަކާ ގުޅިގެން ކޮށްފައިވާ ޖޫރިމަނާތަކުގެ ތެރެއިން 825 މިލިއަނަށް ވުރެ ގިނަ ރުފިޔާ އަދިވެސް ދައުލަތަށް ނުލިބޭކަން އީޕީއޭގެ ތަފާސްހިސާބުތަކުން އެނގެ އެވެ.