ތިމާވެށީގެ ޖޫރިމަނާތައް: 825 މިލިއަނަށް ވުރެ ގިނަ ރުފިޔާ ނުލިބޭ!

ތިމާވެއްޓަށް ގެއްލުން ދިނުމުގެ އެކި މައްސަލަތަކާ ގުޅިގެން ކޮށްފައިވާ ޖޫރިމަނާތަކުގެ ތެރެއިން 825 މިލިއަނަށް ވުރެ ގިނަ ރުފިޔާ އަދިވެސް ދައުލަތަށް ނުލިބޭކަން އީޕީއޭގެ ތަފާސްހިސާބުތަކުން ހާމަވެއްޖެ އެވެ.

މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން "މިހާރު" އިން އެދުމުން، އީޕީއޭ އިން މިދިޔަ ހަފުތާގައި ދިން މައުލޫމާތުތަކުގައިވާ ގޮތުން އެ އެޖެންސީން މިހާތަނަށް ކޮށްފައިވާ ޖޫރިމަނާތަކުގެ ތެރެއިން، މިދިޔަ މަހުގެ 14 ވަނަ ދުވަހާ ހަމައަށް 24 މައްސަލައެއްގައި ހިމެނޭ ފައިސާ ދައުލަތަށް ނުލިބެ އެވެ. އެއީ 825,978,942.81ރ. އެވެ.

އެ 24 މައްސަލައިގެ ޖޫރިމަނާގެ ތެރެއިން ދައުލަތަށް މިހާތަނަށް ލިބިފައި ވަނީ އެންމެ 50،000ރ. އެވެ. އެކަމަކު، މި ނޫން އެހެން މައްސަލަތަކުގައި ކޮށްފައިވާ ޖޫރިމަނާގެ ފައިސާ އެ އިދާރާއަށް ވަނީ ލިބިފަ އެވެ.

އީޕީއޭއިން ބުނީ ޖޫރިމަނާގެ ފައިސާ ނުދައްކާތީ، މީގެ ތެރެއިން ގިނަ މައްސަލަތަކުގައި ގާނޫނީ ގޮތުން އެ ފައިސާ ހޯދޭނެ ގޮތްތައް ބަލަމުން އަންނަ ކަމަށެވެ. އަދި ބައެއް މައްސަލަތައް ކޯޓަށް ހުށަހަޅައިގެން ވެސް ކުރިއަށް ގެންދާ ކަމަށް އެ އެޖެންސީން ބުންޏެވެ.

ނުލިބި ހުރި ފައިސާގެ ތެރޭގައި ގިނައިން ހިމެނެނީ ބޮޑެތި އަދަދުތަކުން ކޮށްފައި ހުރި ޖޫރިމަނާތަކެވެ. އޭގެ ތެރޭގައި 100 މިލިއަން ރުފިޔާއިން ޖޫރިމަނާ ކޮށްފައިވާ ހަ ފަރާތެއް ހިމެނެ އެވެ. އެއީ، ތިމާވެށި ހިމާޔަތްކޮށް ރައްކާތެރިކުރުމުގެ ގާނޫނުގެ ދަށުން ޖޫރިމަނާ ކުރެވޭ އެންމެ ބޮޑު އަދަދެވެ.

100 މިލިއަން ރުފިޔާއިން ޖޫރިމަނާކުރި މައްސަލަތައް

• "އޮލިމްޕިކް ކަންޑިލޯ" ނަމަކަށް ކިޔާ ބާޖު ފުވައްމުލަކު ފަރަށް އެރި މައްސަލަ.

• "ޓީބީ މުތާ" ކިޔާ ޓަގު ބޯޓާއި "މުތާ ޕްރައިޑް" ކިޔާ ބާޖު ހއ. ދިއްދޫ ފަރަށް އެރި މައްސަލަ.

• "އޭއެމް އެލްޕިޓް" ކިޔާ ބާޖާއި "އޭއެމް އާގަމް" ކިޔާ ޓަގު ކ. ވާވެއްދިށް ފަރަށް އެރި މައްސަލަ.

• "އޭއެމް އާގަމް" ކިޔާ ބާޖު ވ. މާގުޅީފަޅުގެ އުތުރުން އޮންނަ ކަނޑުއޮޅީގައިވާ ފަރަށް އެރި މައްސަލަ.

• "ބީޖީ ސީޕަރަ ތުރީ" ބާޖު ކ. ހިންމަފުށީ ފަރަށް އެރި މައްސަލަ.

• "މުތާ ރޯޔަލް" ޓަގު ބޯޓާއި "މުތާ ގްރޭސް" ބާޖު ކ. ފުށިދިއްގަރު ފަރަށް އެރި މައްސަލަ.

މި ހުރިހާ އުޅަނދުތަކަކީ ވެސް ރާއްޖެއިން ބޭރުގެ އުޅަނދުތަކެވެ. އީޕީއޭއިން ދިން ތަފާސްހިސާބުތަކުގައިވާ ގޮތުން ޖޫރިމަނާ ނުދައްކާ ފަރާތްތަކުގެ ތެރޭގައި ގިނައީ ވެސް ބޭރުގެ ކުންފުނިތަކުގެ އުޅަނދުތަކެވެ.

ދެވަނައަށް އެންމެ ބޮޑު ޖޫރިމަނާއެއްކޮށް، ފައިސާ ނުލިބި އޮތް މައްސަލައަކީ ތިލަމާލެ ބްރިޖު ހަދާ އިންޑިއާގެ އެފްކޮންސްގެ ބާޖެއް ވިލިމާލެ ފަރަށް އަރައި، ގެއްލުންވުމުން ކޮށްފައިވާ 69 މިލިއަން ރުފިޔާގެ ބޮޑު ޖޫރިމަނާ އެވެ. އީޕީއޭއިން ބުނި ގޮތުގައި އެ މައްސަލަ ޝަރީއަތަށް ހުށަހަޅަށް މިހާރު ވަނީ އެޓާނީ ޖެނެރަލްގެ އޮފީހަށް ވެސް ފޮނުވައިފަ އެވެ. އެ މައްސަލާގައި އެފޮކްސް އިން ވަނީ ޖޫރިމަނާގެ އަދަދު މާ ބޮޑު ކަމަށް ބުނެ އެ ފައިސާ ދައްކަން ދެކޮޅު ހަދައި، ދައުލަތާ ދެކޮޅަށް ސިވިލް ކޯޓަށް މައްސަލައެއް ވެސް ހުށަހަޅައިފަ އެވެ.

ފައިސާ ނުލިބިވާ އެންމެ ކުޑަ ޖޫރިމަނާއެއް ކަމަށް އީޕީއޭގެ ތަފާސްހިސާބުތަކުގައި ވަނީ ހިމާޔަތް ކޮށްފައިވާ ބ. ހަނިފަރު ސަރަހައްދަށް ގަވާއިދާ ހިލާފަށް ވަން އުޅަނދަކަށް ކޮށްފައިވާ ޖޫރިމަނާ އެވެ. ސަންރައިސް މޯލްޑިވްސް ޕްރައިވެޓް ލިމިޓެޑުގެ އެ އުޅަނދު ޖޫރިމަނާކޮށްފައި ވަނީ 5،000ރ. އިންނެވެ.

ތިމާވެށީގެ ޖޫރިމަނާތައް ނުލިބޭ މައްސަލާގައި އީޕީއޭ އާއި އޭޖީ އޮފީހުގެ އިސްވެރިން ރައްޔިތުންގެ މަޖިލީހުގެ ތިމާވެށްޓާއި މޫސުމީ ބަދަލުތަކާ ގުޅޭ ކޮމިޓީއަށް މިދިޔަ އޮކްޓޯބަރު މަހު ހާޒިރުކޮށް ވަނީ ސުވާލުކޮށްފަ އެވެ.

އީޕީއޭއިން އެ ކޮމިޓީގައި ބުނި ގޮތުގައި ތިމާވެއްޓަށް ގެއްލުން ދިނުމުން ކޮށްފައިވާ ޖޫރިމަނާގެ ފައިސާ ދައުލަތަށް ނުލިބި ދިގުލައިގެން ދާއިރު، އެ ފައިސާ ހޯދުމަށް ކޯޓަށް ދިއުމުގެ ބާރު އެ އެޖެންސީއަށް ނެތުމަކީ އެ ފައިސާ ހޯދުމަށް އޮތް އެންމެ ބޮޑު ގޮންޖެހުމެވެ.

އޭޖީ އޮފީހުން ބުނީ ރާއްޖޭގެ ފަރުތަކަށް އަރާ ބޭރުގެ ބޯޓުތައް ޖޫރިމަނާ ކުރުމުން އެ ފައިސާ ނުދައްކާ ރާއްޖެއިން ބޭރަށް ފުރައިގެންދާ މައްސަލަ ވޭތުވެދިޔަ ތިން އަހަރު ވަރަށް ބޮޑަށް ދިމާވަމުންދާ ކަމަށެވެ.