ހުޅުމާލެ ފަރަށް އުޅަނދުތަކެއް އެރުމުން ބޮޑު ގެއްލުމެއް، 29 މިލިއަން ރުފިޔާގެ ޖޫރިމަނާއެއް

މިދިޔަ ފެބްރުއަރީ މަހު ހުޅުމާލެ ފަރަށް ހިލަ ބާޖާއި ޓަގުބޯޓެއް އެރުމުގެ ސަބަބުން ފަރަށް ލިބުނު ގެއްލުންތަކާ ގުޅިގެން އެ އުޅަނދުތަކުގެ ވެރިފަރާތް 29 މިލިއަން ރުފިޔާއިން ޖޫރިމަނާކޮށްފި އެވެ.

އެންވަޔަރްމަންޓް ޕްރޮޓެކްޝަން އޭޖެންސީ (އީޕީއޭ) އިން މިއަދު ކުރި އިއުލާނެއްގައި ބުނީ ޓަގު "އަނަންދި" އާއި ބާޖު "އޭއެމް މަނުމިތު" ހުޅުމާލޭގެ އުތުރު ފަރާތު ފަރަށް އެރީ މިދިޔަ ފެބްރުއަރީ މަހުގެ 21 ވަނަ ދުވަހު ކަމަށެވެ. އަދި އެ އުޅަނދުތައް ފަރުމަތިން ނެގީ މިދިޔަ އެޕްރީލް މަހުގެ 23 ވަނަ ދުވަހު ކަމަށް ވެސް އީޕީއޭއިން ބުންޏެވެ. އެއީ، ޔޫއޭއީގެ ކުންފުންޏެއް ކަމަށްވާ ދި މިޑްލް އީސްޓް މެރިން އެލްއެލްސީގެ ދެ އުޅަނދެވެ.

އެ އުޅަނދުތައް ފަރަށް އެރުމުގެ ސަބަބުން ލިބުނު ގެއްލުންތައް ބެލުމަށްޓަކައި އުޅަނދުތަކުގެ ވެރިފަރާތުން ހަމަޖައްސާފައިވާ ސާވޭޔަރުންނާ އެކު އީޕީއޭއިން ޖޮއިންޓް ސާވޭއެއް ހެދި ކަމަށް އެ އިއުލާނުގައި ބުންޏެވެ.

އީޕީއޭއިން ބުނި ގޮތުގައި، ފަރަށް ލިބުނު ގެއްލުން ދެނެގަތުމަށްޓަކައި ކުރިޔަށް ގެންދިޔަ ސާވޭއިން އެނގުނު ގޮތުގައި އެ ފަރުގެ 1،159 އަކަމީޓަރުގެ ސަރަހައްދަކަށް ވަނީ ވަރަށް ބޮޑަށް ގެއްލުން ލިބިފަ އެވެ. ނަމަވެސް، އެ ގެއްލުމުގެ އިތުރު ތަފުސީލެއް އަދި ނުދެ އެވެ.

އެ ސާވޭގެ ނަތީޖާއަށް ބަލައި، ރާއްޖޭގައި ތިމާވެށި ރައްކާތެރިކޮށް ދެމެހެއްޓުމާ ބެހޭ ގާނޫނުގެ ދަށުން ހަދާފައިވާ ތިމާވެއްޓަށް ދޭ ގެއްލުންތަކަށް ޖޫރިމަނާ ކަނޑައެޅުމާއި ބަދަލު ހޯދުމުގެ ގަވާއިދުގެ ދަށުން އެ އުޅަނދުތަކުގެ ވެރިފަރާތް 29،201،946ރ. އިން ޖޫރިމަނާކޮށްފައިވާ ކަމަށް އީޕީއޭއިން ބުންޏެވެ.

ޖޫރިމަނާގެ ފައިސާ ދެއްކުމަށް މިމަހުގެ ފުރަތަމަ ދުވަހުން ފެށިގެން 30 ދުވަހުގެ މުއްދަތެއް ވަނީ ދީފަ އެވެ.

ދިރާސާއެއް ކުރުމަށް ބޭނުންކުރި އުޅަނދަކުން 2022 ވަނަ އަހަރު ހުޅުމާލެ އިރުމަތީފަރާތު ފަރު ބޭރުގައި ސާވޭތަކެއް ކުރަމުން ދަނިކޮށް ބޮޑެތި ގެއްލުންތަކެއް ލިބުނެވެ. އެއީ އިންޑިއާގެ އެންމެ ބޮޑު އެއް ކުންފުނި ކަމަށްވާ ރިލަޔަންސްގެ ޖިއޯ ކުންފުންޏާ ހަވާލުކޮށްގެން ރާއްޖޭގައި އެޅި ސަބްމެރިން ކޭބަލެއްގެ ސާވޭގެ މަސައްކަތް ކުރަމުން ދަނިކޮށެވެ.

އެ މައްސަލާގައި އެ ކުންފުނި 200،000 އެއްހާ ރުފިޔާ އިން ޖޫރިމަނާ ކުރި ނަމަވެސް، މިހާތަނަށް ވެސް އެ ފައިސާ ދެއްކި ކަމެއް އަދި ނޭނގެ އެވެ.

ރާއްޖޭގެ އެކި ސަރަހައްދުތަކަށް ބޭރުގެ ބޯޓުފަހަރު ފަރަށް އަރައި، ގެއްލުންވުމުން އެތައް މިލިއަން ރުފިޔާއިން ޖޫރިމަނާކޮށްފައިވެ އެވެ. އޭގެ ތެރެއިން ޖޫރިމަނާ ފައިސާ ދައްކާފައިވާ މަދު މައްސަލައެއްގަ އެވެ.