އައްޑޫ ހިތަދޫ މޫދަށް ކްލޮރިން އެޅުމުން ދިރުންތައް މަރުވެގެން ލައްގަނީ

އައްޑޫ ހިތަދޫގެ ފުއްޓަރު ފަރާތު މޫދަށް ކްލޮރިން އެޅުމުން ދިރުންތައް މަރުވެގެން ލައްގަން ފަށައިފި އެވެ.

ކްލޮރިން އަޅާފައި ވަނީ ހިތަދޫގައި އޮންނަ ކިނބިވައު ކިޔާ ސަރަހައްދަށެވެ.

އައްޑޫ ނޭޗާ ޕާކު ބަލަހައްޓާ އޮފިޝަލަކު "މިހާރު" އަށް މިއަދު ވިދާޅުވީ ކިނބިވައު ސަރަހައްދަށް ކްލޮރިން އެޅުމުގެ ސަބަބުން އެކި ބާވަތްތަކުގެ ކަނޑުގެ ދިރުންތައް މަރުވެގެން ލައްގާ ކަމަށް އާންމުންގެ މީހަކު ރިޕޯޓްކުރީ އިއްޔެ ހެނދުނު ކަމަށެވެ.

އެ ސަރަހައްދުގައި މޫދާ ކައިރީގައި ކްލޮރިން ހުސްކޮށްފައި ހުރި 25 ކިލޯގެ 15 ވަރަކަށް ފާޓާ ހުރި ކަމަށާއި އެއީ މުއްދަތު ހަމަވެފައި ހުރި ފާޓާތަކެއް ކަން އޭގެ ލޭބަލްތަކުން އެނގޭ ކަމަށް ވެސް އޮފިޝަލް ވިދާޅުވި އެވެ.

"އެކި ކަހަލަ ސްޕީޝީސްތައް މަރުވެގެން ބީޗަށް ލައްގާފައި ހުރީ، އެ ސަރަހައްދު ފުރެންދެން،" އޮފިޝަލް ވިދާޅުވި އެވެ.

"އަޅުގަނޑުމެން ބެލިބެލުމުން ފަރުމަތިން ވެސް އެބަ ފެނޭ ކްލޮރިންގެ އަސަރު. ފަރު ވެސް ހުދުވެފައި ހުރީ."

މަރުވެގެން ލައްގާފައި ހުރި އެއްޗެހީގެ ތެރޭގައި ބޯވަ އާއި ބޯވަދިލަމަހާއި ޑިނގާ އާއި ކަކުންޏާއި ވެނާއި ތޮޅިޔާއި ކޮއްޔާއި އެހެން ބާވަތުގެ މަސްތައް ހިމެނެ އެވެ.

މި މައްސަލަ ފުލުހުންނާއި އީޕީއޭ އަށް ވެސް މިހާރު ރިޕޯޓްކޮށްފައިވާ ކަމަށް އޮފިޝަލް ވިދާޅުވި އެވެ.

ފުލުހުން ބުނީ ހިތަދޫގެ ފުއްޓަރު ފަރާތު މޫދަށް ކްލޮރިން އަޅާފައިވާ ކަމަށް ތުހުމަތުކުރެވޭ މައްސަލައެއް އިއްޔެ ރިޕޯޓްކޮށްފައިވާ ކަމަށާއި އެ މައްސަލަ މިހާރު ތަހުގީގުކުރަމުން އަންނަ ކަމަށެވެ.

އައްޑޫ ސިޓީ ކައުންސިލުން ފޭސްބުކްގައި ކުރި ޕޯސްޓެއްގައި ބުނީ ހިތަދޫ ކިނބިވައު ސަރަހައްދުން ފުއްޓަރު ފަރާތަށް ގިނަ އަދަދަކަށް ކްލޮރިން އަޅާފައިވާ ކަމުގެ މައުލޫމާތު ލިބުމާ ގުޅިގެން މޭޔަރު އަލީ ނިޒާރާއި ޑެޕިއުޓީ މޭޔަރު މުހައްމަދު ޝުއާއު އާއި ކައުންސިލަރުން އަދި އެސްޖީ އިއްޔެ އެ ސަރަހައްދަށް ވަޑައިގެން އެތަން ބައްލަވާލެއްވި ކަމަށެވެ.

"މިއީ ތިމާވެއްޓަށް އޭގެ ނޭދެވޭ އަސަރުކޮށް، މަސްތައް މަރުވެ އަދި އެ ސަރަހައްދުގެ ކަނޑުގެ ދިރުމަށް ނުހަނު ބޮޑަށް ގެއްލުން ލިބިދާނެ ކަމެއް. މިފަދަ އަމަލުތަކަކީ ކައުންސިލުން ނުހަނު ކަންބޮޑުވާ ކަމެއް. މިފަދަ އަމަލުތައް ނުކުރުމަށާއި މިފަދަ އަމަލުތަކާއި ދުރުހެލިވުމަށް ނަސޭހަތްތެރިވަން،" ސިޓީ ކައުންސިލުން ބުންޏެވެ.

އެ ސަރަހައްދަށް ގިނަ އަދަދަކަށް ކޮލޮރިން އަޅާފައިވާ ކަމަށް ބެލެވޭތީ އާންމުން މި ވަގުތު އެ ސަރަހައްދަށް މޫދަށް އެރި ނޫޅުމަށް ވެސް ސިޓީ ކައުންސިލުން ވަނީ އިލްތިމާސްކޮށްފަ އެވެ.