ދިރާގު ފައިބާ ބްރޯޑްބޭންޑުގައި ދެން ލިމިޓެއް ނޯންނާނެ!

ރާއްޖޭގައި ފުރަތަމަ ފަހަރަށް ލިމިޓެއް ނެތް ގޮތަށް ފަރުމާކޮށްފައިވާ ފައިބާ ހޯމް ބްރޯޑްބޭންޑް އިންޓަނެޓް ޕެކޭޖްތައް ދިރާގުން ލޯންޗުކޮށްފި އެވެ.

މި ޕެކޭޖުތައް ތައާރަފްކުރީ މިރޭ ދިރާގު ހެޑް އޮފީހުގައި ބޭއްވި ހާއްސަ ރަސްމިއްޔާތެއްގަ އެވެ.

މި ރަސްމިއްޔާތުގައި ދިރާގުގެ ޗީފް ކޮމާޝަލް އޮފިސަރު، އަލީ ރިޔާޒް ވިދާޅުވީ ދިރާގަކީ ކަސްޓަމަރުންގެ ބޭނުންތައް ދެނެގަނެ، އެކަންތައްތައް ފުރިހަމަކޮށް ދޭން މަސައްކަތްކުރާ ކުންފުންޏެއް ކަމަށެވެ.

"ކަސްޓަމަރުން ބޭނުމެއް ނުވޭ ސްޓްރީމްކުރާ އިރު ޑޭޓާ ބާކީ ހުންނަ ވަރު ބަލާކަށް، އެކަމާ ވިސްނާކަށް. އަޅުގަނޑުމެން މި ދާއިރާ ކުރިއަރުވަން މި މަސައްކަތް ކުރަނީ ކަސްޓަމަރުން އެދޭ ގޮތަށް، އެފަދަ ޕެކޭޖުތަކަކާ އެކު." އޭނާ ވިދާޅުވި އެވެ.

އޭނާ ވިދާޅުވީ އެ ކުންފުނިން މިހާރުވެސް ބޮޑު ހޭދައެއް ކޮށްގެން ކަސްޓަމަރުންނަށް ދެމުންދާ ހިދުމަތްތައް ފުރިހަމަ ކުރަން ބޮޑެތި އިންވެސްޓްމަންޓްތައް ކޮޮށްފައިވާ ކަމަށެވެ. އަދި މިރޭ ތައާރަފްކުރާ ޕެކޭޖުތަކަކީ ކަސްޓަމަރުންގެ ޑިމާންޑުތަކަށް އެކަށީގެންވާ ހިދުމަތެއް ފޯރުކޮށްދިނުމުގެ ގޮތުން ތައާރަފްކުރާ، ސްޓްރީމިން ތަޖުރިބާތައް އިތުރަށް ފުރިހަމަކޮށްދޭނެ ހިދުމަތެއް ކަމަށް އޭނާ ވިދާޅުވި އެވެ.

ދިރާގުން މިރޭ ލޯންޗުކުރީ އެއްވެސް ލިމިޓެއް ނެތި އިންޓަނެޓް ހަލުވި ސްޕީޑުގައި ބޭނުން ކުރެވޭނެ ޕެކޭޖުތަކެކެވެ. މި ޕެކޭޖުތައް އެކްޓިވޭޓް ކުރުމުން އެއް ސްޕީޑެއްގައި މުޅި މަހު އިންޓަނެޓް ލިބޭނެ އެވެ. މީގެ ކުރިން ލިބެން ހުންނަ "އަންލިމިޓަޑް" ޕެކޭޖުތަކަކީ ކޮންމެ މަހަކަށް ވަކި އަދަދެއްގެ ޑޭޓާ ލިބޭ އަދި އެ ޑޭޓާ ބޭނުންކޮށް ނިމުމުން ސްޕީޑް ދަށްވާ ޕެކޭޖުތަކެކެވެ.

ދިރާގުން މިރޭ ތައާރަފް ކުރީ ލިމިޓެއް ނެތް 1 ޖީބީޕީއެސް އާއި ލިމިޓެއް ނެތް 400 އެމްބީޕީއެސް އާއި ލިމިޓެއް ނެތް 100 އެމްބީޕީއެސްގެ އިތުރުން ލިމިޓެއް ނެތް 30 އެމްބީޕީއެސް އަދި ލިމިޓެއް ނެތް 20 އެމްބީޕީއެސް އެވެ.

ދިރާގުގެ ކަސްޓަމާ ވެލިއު މެނޭޖަރު، ބްރޯޑްބޭންޑް އެންޑް ޑިވައިސަސް އަހުމަދު އިޝާން ވިދާޅުވީ އަލަށް ތައާރަފް ކުރި ޕެކޭޖުތަކާއި ގުޅިގެން، މިހާރު ދިރާގުގެ ފައިބާ ބްރޯޑްބޭންޑް ކަސްޓަމަރުންގެ ތަޖުރިބާ އިިތުރަށް ފުރިހަމަ ކުރުމުގެ ގޮތުން އެ ފަރާތްތަކުގެ ޕެކޭޖުތައް މާދަމާއިން ފެށިގެން މިހާރު ހުރި އަގުގައި ދެ ގުނައަށް ސްޕީޑް މަތިކޮށްދޭނެ ކަމަށެވެ.

"ކުރިން 50 އެމްބީޕީއެސް އަންލިމިޓެޑްގައި ހުރި ހުރިހާ ކަސްޓަމަރުންނަށް ދެ ގުނަ އިތުރުކޮށް 100 އެމްބީއެސްއަށް އިތުރު ތަކުލީފަކާއި ނުލާ އަޕްގްރޭޑްކޮށް ދޭނަން. މީގެ ކުރިން 100އެމް ލިމިޓަޑް ޕްލޭނުގައި ހުރި ކަސްޓަމަރުންނަށް ހުރި ކަސްޓަމަރުން 200 އެމްބީޕީއެސްއަށް އިތުރުކޮށްދޭނަން. އަދި 200 އެމްގައި ހުރި ކަސްޓަމަރުން 400 އެމްއަށް އަޕްގްރޭޑުކޮށް ދޭނަން. މި އަޕްގްރޭޑަށް އިތުރު ފީއެއް ނުނަގާނެ. ކަސްޓަމަރުން ދައްކަން ޖެހޭނީ މިހާރު ވެސް ދައްކާ އަގު." އޭނާ ވިދާޅުވި އެވެ.

ދިރާގު ފައިބާ ބްރޯޑްބޭންޑް ނެޓްވޯކަކީ ދިވެހިރާއްޖޭގައި އެންމެ ހަލުވި ސްޕީޑްގައި އަދި އެންމެ ފުޅާ ދާއިރާއެއްގައި ކަވަރޭޖް ފޯރުކޮށްދޭ އެއް ނެޓްވޯކެވެ.