ނިއު އަށް "ބޭއިންސާފުން" އެޅި ފިޔަވަޅު ރާއްޖޭގެ އިދާރާތަކާ ހިއްސާކޮށްފި

ނިއު ރޭޑިއަންޓާ މެދު އެފްއޭއެމްގެ ކުރީގެ ލީޑާޝިޕުން ފިޔަވަޅު އެޅީ ބޭއިންސާފުން ކަމަށާއި އެ މައްސަލަތަކުގެ ތަފްސީލު ރާއްޖޭގެ އިދާރާތަކަށް ހުށަހަޅާފައިވާ ކަމަށް އެ ކްލަބްގެ އާ ޗެއާމަން އަހްމަދު މުބީން ވިދާޅުވެއްޖެ އެވެ.

މިދިޔަ ބުރާސްފަތި ދުވަހު ހަވީރު އެ ކްލަބުން ބޭއްވި ޕްރެސް ކޮންފަރެންސްގައި މުބީން، ވިދާޅުވީ ނިއު "ބޭއިންސާފުން ސަސްޕެންޑް ކުރި" މައްސަލައިގައި ހައްގު ހޯދަން، ބައިނަލްއަގްވާމީ ކުޅިވަރު އާބިޓްރޭޝަން ކޯޓް (ކާސް) އަށް ދާން ޖެހުނަސް ދާނެ ކަމަށެވެ.

ޕްރެސްގައި އޭނާ ދެއްވި، އެ ވާހަކައިގެ އެއްވެސް މަސައްކަތެއް ކްލަބުން ކުރިއަށް ގެންދަންތޯ "މިހާރު" އިން ސުވާލު ކުރުމުން މުބީން ވިދާޅުވީ ކާސް އަށް މައްސަލަ ހުށަހެޅުމުގެ ކުރިން ރާއްޖޭގެ އިދާރާތަކަށް މައްސަލަ ސާފުކޮށް ދިނުމުގެ މަސައްކަތް ކޮށްފައިވާ ކަމަށެވެ.

"މިކަމުގައި ރާއްޖޭގައި ހުރި ކުޅިވަރު ހުރިހާ އިދާރާ އަކަށް އަޅުގަނޑުމެން ގޮސްފިން. ސްޕޯޓްސް މިނިސްޓަރު [އަބްދުﷲ ރާފިއު] ގެ އަރިހަށް، ސްޕޯޓްސް ކޮމިޝަނާ [މުހައްމަދު ތޮލާލް] ގެ އަރިހަށް އަޅުގަނޑުމެން ގޮސްފިން. ސްޕޯޓްސް ކައުންސިލަށް ވެސް އަޅުގަނޑުމެން ގޮސް މިކަންކަން ހިނގާދިޔަ ގޮތް ހިއްސާކޮށްފިންމ" މުބީން ވިދާޅުވި އެވެ.

އޭނާ ވިދާޅުވީ ރާއްޖޭގެ އިދާރާތަކުން އިންސާފު ނުލިބިއްޖެނަމަ ދެން ދާނީ ކާސް އަށް ކަމަށެވެ.

"އެ ވާހަކަ އަޅުގަނޑު ޕްރެސްގައި ދެންނެވީ،" މުބީން ވިދާޅުވި އެވެ.

އެފްއޭއެގެ ކުރީގެ ރައީސް ބައްސާމް އަދީލް އިތުބާރު ނެތް ކަމުގެ މައްސަލަ ހުށަހަޅަން ނިއު ތައްޔާރުވަމުން ދިއުމުން، އެފްއޭއެމުން 2019 ގެ ޖެނުއަރީ މަހު، އެ ކްލަބް ސަސްޕެންޑް ކުރި އެވެ. ސަސްޕެންޑް ކުރީ ކުޅުންތެރިންނަށް މުސާރަ ނުދޭ ކަމަށް ބުނުމަށް ފަހު އެވެ. އެ އެސޯސިއޭޝަނުން އޭރު ބުނީ ކުޅުންތެރިންނަށް މުސާރަ ދިނުމަށް ތަކުރާރުކޮށް ނިއު އަށް އެންގި ކަމަށެވެ.

މުބީން ވިދާޅުވީ، ކުޅުންތެރިންނަށް މުސާރަ ނުދީ ހުރުމުން ފީފާއިން އެޅީ ޓްރާންސްފާ ބޭންގެ ފިޔަވަޅެއް ކަމަށެވެ. އެކަމަކު އެ މައްސަލައިގައި އެފްއޭއެމުން އެންމެ ފުރަތަމަ ވެސް އެޅި ފިޔަވަޅަކީ އެ ކްލަބް ސަސްޕެންޑް ކުރުން ކަމަށްވުމުން، ނިއުއާ މެދު ފިޔަވަޅު އެޅީ ބޭއިންސާފުންކަން ސާފުކޮށް އެނގޭ ކަމަށް މުބީން ވިދާޅުވި އެވެ.

ޓްރާންސްފާގެ ބޭންގެ އަދަބު ތަންފީޒާ އެކު، ންމެ ފަހު ފުޓްބޯޅަ ސީޒަންގައި ބައެއް ކަލްބްތަކުން ކުޅެފައި ވެ އެވެ. އެކަމަކު، އެފްއޭއެމުން ނިއު ސަސްޕެންޑް ކުރުމުން، ފުޓްބޯޅައިގެ އެއްވެސް ހަރަކާތްތަކެއްގައި އެ ކްލަބް ބައިވެރިވުން އޭރު ހުއްޓިގެން ދިޔަ އެވެ.

ރައްޔިތުންގެ މަޖިލީހުގެ މެންބަރުކަން ވެސް ކުރެއްވި މިހާރު ރީޖަނަލް އެއާޕޯޓް ކުންފުނީގެ މެނޭޖިން ޑިރެކްޓަރުކަން ވެސް ކުރައްވާ މުބީން ވިދާޅުވީ ނިއުގެ މަސައްކަތާ، ސިޔާސީ ކަމަކާ ނުގުޅުވާނެ ކަމަށެވެ.