ނިއު ރޭޑިއަންޓްގެ ޗެއާމަނަކަށް މުބީން އިންތިހާބު ކޮށްފި

ނިއު ރޭޑިއަންޓްގެ ޗެއާމަން ކަމަށް ރީޖަނަލް އެއާޕޯޓްސް ކުންފުނީގެ މެނޭޖިން ޑިރެކްޓަރު އަހްމަދު މުބީން އިންތިހާބު ކޮށްފި އެވެ.

ރަރުބާރުގޭގައި ރޭ ބޭއްވި ކޮންގްރެސްގައި ކޮންމެ މަގާމަކަށް ވެސް ކުރިމަތިލީ އެއް ކެނޑިޑޭޓެވެ. އެހެންވެ އެ މަގާމަށް މީހުން އިންތިހާބު ކުރުމަށް ކުރިއަށް ގެންދިޔައީ އަތް ހިއްލައިގެން ވޯޓް ދޭ ގޮތަށް ނެގި ފެންނަ ނުފެންނަ ވޯޓެކެވެ.

ނިއުގެ ބޯޑްގައި ސަރުކާރު ކުންފުންޏެއްގެ އިތުރު މެނޭޖިން ޑިރެކްޓަރަކު ވެސް ހިމެނެ އެވެ. އެއީ ނައިބު ރައީސް ކަމަށް އިންތިހާބު ކުރި މުޖުތޮބާ ޖަލީލް (މުޖޭ) އެވެ. އޭނާ އަކީ ވެމްކޯގެ މެނޭޖިން ޑިރެކްޓަރުގެ މަގާމު އަދާކުރައްވާ މުޖޭ އަކީ ކްލަބްގެ ސީނިއާ އެއް ނައިބު ރައީސެވެ. ސީނއާ ނައިބު ރައީސްކަމަށް ދެން އިންތިހާބު ކުރީ ހެންވޭރު ހުޅަނގު ދާއިރާގެ މެންބަރު އަލީ އިބްރާހިމް ކައްޕި އެވެ.

ކުރީގެ ޗެއާމަން އަހްމަދު ވާސިފްގެ ބޯޑްގައި ވެސް މަސައްކަތް ކުރެއްވި ގާނޫނީ ވަކީލް އަލީ ރަޝީދު ވަނީ ވައިސް ޗެއާމަންކަމުގެ މަގާމަށް އިންތިހާބު ކޮށްފަ އެވެ.

ކްލަބްގެ ލީގަލްސް ކައުންސިލަކީ މާޒިން ހުސައިން އިބްރާހިމް (ކައްޕި ބްރޯ) އެވެ.

ބޯޑްގައި ދެން ހިމެނޭ މެންބަރުންނަކީ: އެ ކްލަބްގެ ޒަމާންވީ ހިދުމަތްތެރިޔާ އިސްމާއީލް ރަޝީދު (ހުންގާނު)، ޒަހީނުއްދީން ސައީދު، އަހްމަދު ޔޫސުފް، މުހައްމަދު ޔޫސުފް، އަހްމަދު މުސާ، މުހައްމަދު ޝަކީލް، މޫސާ ސާއިދު، އަބްދޫ އަބޫބަކުރު، މުހައްމަދު އަލީ އުމަރު ފަރުހާން އެވެ.

ނިއު އިން އިންތިހާބަކަށް މި ދިޔައީ ކުރިން ހުންނެވި ޗެއާމަން އަހްމަދު ވާސިފް، އޭނާގެ ދައުރުގެ ބާކީ ދެ އަހަރު އޮތްވައި މަގާމުން އިސްތިއުފާ ދިނުމުންނެވެ.

މަގާމުން އިސްތިއުފާ ދެއްވުމަށް ފަހު ވާސިފް ވިދާޅުވެފައި ވަނީ އޭނާ މަގާމުން އިސްތިއުފާ ދިނީ، ނިއު ކޮޅަށް ނަގައި ދޭނެ ބޯޑެއް ކްލަބަށް އިންތިހާބު ވުމަށް މަގުފަހިކޮށް ދިނުމުގެ ގޮތުން ކަމަށެވެ.