"ރަސްވާދަ" ފުޓްބޯޅައިގެ ބޮޑު ކުރިމަތިލުން މާދަމާ؛ ފައިނަލް މެޗުގެ ކުރިން ބޮޑު ފައިނަލެއް

ސަޕޯޓަރުން ނުވަންނާތީ ފަޅުވި ގަލޮޅު ދަނޑުގެ ފަޅުކަން، މިދިޔަ ސީޒަނުގައި ފިލުވާލަ ދިނީ އެންމެ މެޗަކުންނެވެ. އެންމެ ފަހުގެ ދެވަނަ ޑިވިޝަން ފުޓްބޯޅަ މުބާރާތުގެ ގުރޫޕް ސްޓޭޖުގައި ނިއު ރޭޑިއަންޓާއި ވިކްޓަރީ ކުޅުނު މެޗަކީ، މި ފަހުން ގަލޮޅު ދަނޑަށް، ކްލަބް ފުޓްބޯޅަ މެޗެއް ބަލަން އެންމެ ގިނަ ބަޔަކު ވަން މެޗެވެ.

އޮކްޓޯބަރު 2021 ގައި ރާއްޖޭގައި ބޭއްވި ސާފް ޗެމްޕިއަންޝިޕަށް ފަހު ގައުމީ ޓީމު ކުޅުނު މެޗެކަށް ވެސް އެ އަދަދަށް މީހުން ދަނޑަށް ނުވަދެ އެވެ.

އެ މެޗަށް ފަހު ނިއު ރޭޑިއަންޓްގެ ޗެއާމަން އަހްމަދު ވާސިފް ވިދާޅުވީ ފުޓްބޯޅައިގެ ފޯރި ގަލޮޅު ދަނޑަކަށް އަލުން ގެނެވޭނެކަން ސާބިތުކޮށްދެވިއްޖެ ކަމަށެވެ.

މިފަހަރު ދެވަނަ ޑިވިޝަންގައި މި ދެ ޓީމު ކުރިމަތިލާން ޖެހިފައި ވަނީ މުބާރާތުގެ އެންމެ މުހިންމު ހިސާބުންނެވެ. އެފްއޭއެމުން 2019 ގައި މި ދެ ޓީމު ސަސްޕެންޑް ކުރުމުން، ދެވަނަ ޑިވިޝަނަށް ރެލިގޭޓް ވި ދެ ޓީމު މިދިޔަ މުބާރާތުގައި ވެސް އެއްވަނަ ޑިވިޝަނަށް އަރަން ކުރި މަސައްކަތް ކާމިޔާބެއް ނުވި އެވެ.

އެކަމަކު މާދަމާ ކުޅޭ މެޗުން، އެ ދެ ޓީމުގެ ތެރެއިން ކޮންމެ ވެސް އެއް ޓީމަކަށް އަންނަ ސީޒަނުގެ ފުރަތަމަ ޑިވިޝަންގެ ޖާގަ ކަށަވަރު ވާނެ އެވެ.

މެޗުގެ ވާދަވެރިކަން ވެސް ބޮޑު ވަނީ ވެސް އެހެންވެ އެވެ. އެ މެޗުން ކޮންމެ ވެސް އެއް ޓީމަކަށް އެއްވަނަ ޑިވިޝަނުގެ ޖާގަ ލިބޭތީ އެވެ.

ދެ ޓީމުން ވެސް ދަނީ މެޗު ޕްރަމޯޓް ކުރުމަށް ސޯޝަލް މީޑީއާގައި ކެމްޕޭނެއް ކުރިއަށް ގެންދަމުންނެވެ. "ރަސްވާދަ" ގެ ނަމުގައި ޕްރަމޯޓް ކުރަމުން އަންނަ މެޗަށް، ދެ ޓީމަށް ކުރިން ކުޅުނު ލެޖެންޑްރީ ކުޅުންތެރިންނަށް މެޗު ބަލަން ދަނޑަށް ހާޒިރު ވުމަށް ދައުވަތު ދަނީ ފޮނުވަމުންނެވެ.

މިދިޔަ އަހަރު ނިއު އަށް އިރުޝާދު ދިން ކޯޗު ސޮބާހް މުހައްމަދު ހުރީ ވިކްޓަރީގެ ބެންޗުގަ އެވެ. އޭނާ ބުނީ މާދަމާގެ މެޗަކީ ފައިނަލު މެޗުގެ ކުރިން ކުޅޭނެ ބޮޑު ފައިނަލެއް ކަމަށެވެ.

ނިއު އަށް މި ފަހަރު އިރުޝާދު ދެނީ މިދިޔަ ސީޒަނުގެ ތިންވަނަ ޑިވިޝަން މުބާރާތް ލެގޫންސް އަށް ކާމިޔާބުކޮށް ދިން ކޯޗު އަހްމަދު ނިމާދު އެވެ. ވިދިވިދިގެން ދެ ސީޒަނުގައި ދެ ޓީމެއް ޕްރޮމޯޓްކޮށް ދިނުމުގެ ޝަރަފު މާދަމާގެ މެޗުން ނިއު މޮޅުކޮށް ދީފިނަމަ އޭނާ އަށް ލިބޭނެ އެވެ.

ސެމީ ފައިނަލު ދެ މެޗާއި ފައިނަލު މެޗު ފަށާނީ ހަވީރު 3:30 ގަ އެވެ. ސެމީގެ ފުރަތަމަ މެޗުގައި މިއަދު ހަވީރު މަސްއޮޑި އާއި ޓެންޓް ވާދަ ކުރާނެ އެވެ. މެޗުން މޮޅުވާ ޓީމެއް ފުރަތަމަ ޑިވިޝަނަށް ކޮލިފައިވާނެ އެވެ.