ރާއްޖޭގައި ވަޒީފާ އަދާކުރާ އިންޑިއާ މީހުންގެ މުސާރަ ފޮނުވުމުގައި ދަތިތަކެއް!

ރާއްޖޭގައި މަސައްކަތް ކުރާ އިންޑިއާ މީހުންގެ މުސާރަ އެ ގައުމަށް ފޮނުވުމުގައި ކުރިމަތިވެފައިވާ ދަތިތަކަށް ހައްލެއް ހޯދުމުގެ މަޝްވަރާތައް ކުރަމުން އަންނަ ކަމަށް އިންޑިއާގެ އެކްސްޓާނަލް އެފެއާޒް މިނިސްޓްރީން މިއަދު ބުނެފި އެވެ.

އިންޑިއާގެ ގާނޫނު ހަދާ މަޖިލިސް، ލޮކް ސަބާގައި މެމްބަރަކު ކުރެއްވި ސުވާލަކަށް ލިޔުމުން ފޮނުވި ޖަވާބުގައި އެކްސްޓާނަލް އެފެއާޒް މިނިސްޓްރީން ބުނީ، ރާއްޖެ އިން ޑޮލަރު ފޮނުވުމުގައި ލިމިޓުތަކެއް ހުރުމުން ދަތިވާ މައްސަލަ އެ މިނިސްޓްރީގެ ސަމާލުކަމަށް އައިސްފައިވާތީ ހައްލެއް ހޯދޭތޯ ބަލަމުން އަންނަ ކަމަށެވެ.

ރާއްޖޭގެ ބޭންކުތަކަށް މަރުކަޒީ ބޭންކް، އެމްއެމްއޭ އިން ޑޮލަރު ފޯރުކޮށްދިނުމުގައި ލިމިޓެއް ގެންގުޅޭތީއާ އެކު، ރެމިޓެންސްގެ ގޮތުގައި ހުރިހާ ގައުމަކަށް ވެސް ޑޮލަރު ފޮނުވުމުގައި ދަތިތައް އެބަހުރި ކަމަށާއި ރާއްޖޭގައި ވަޒީފާ އަދާކުރާ އިންޑިއާ މީހުންނަށް ވެސް އެ ދަތިތައް ކުރިމަތިވާ ކަމަށް އެ ލިޔުމުގައި ވެ އެވެ. ނަމަވެސް، އިންޑިއާގެ ރައްޔިތުންގެ ތެރެއިން ޑޮލަރުން މުސާރަ ލިބޭ މީހުންނަށް އެ މައްސަލަ ދިމާ ނުވާ ކަމަށް ވެސް އެކްސްޓާނަލް އެފެއާޒް މިނިސްޓްރީގެ ޖަވާބުގައި ބުންޏެވެ.

އިންޑިއާގެ ރައްޔިތުންނަށް ލިބޭ މުސާރަ، އަނބުރާ އެ ގައުމަށް ފޮނުވަން ދިމާވާ ދަތިތަކާ ގުޅިގެން އެމްއެމްއޭއާ އެކު ވާހަކަ ދައްކައި، އެހީތެރިވެވޭނެ ގޮތްތަކެއް ބަލަމުން އަންނަ ކަމަށް ވެސް އެ މިނިސްޓްރީން ބުންޏެވެ. ރާއްޖޭގައި ހުންނަ އިންޑިއާ ހައި ކޮމިޝަނުން އެ މައްސަލަ އެމްއެމްއޭގެ ސަމާލުކަމަށް ވެސް ގެނެސްފައިވާ ކަމަށް އިންޑިއާ ސަރުކާރުގެ ޖަވާބުގައި ވެ އެވެ.

ޑޮލަރުގެ ތާށިކަން އިންތިހާއަށް ބޮޑުވެ، ރާއްޖޭގެ ރިޒާވް ވެސް ދަނީ ވަރަށް ބޮޑަށް ދަށްވަމުންނެވެ. މިދިޔަ މަހު ޔޫޒަބަލް ރިޒާވްގައި ހުރީ 32 މިލިއަން ޑޮލަރެވެ. އެއީ ވޭތުވެދިޔަ ތިން އަހަރު ތެރޭ ރިޒާވް އެންމެ ބޮޑަށް ދަށްވި ފަހަރެވެ.

ރިޒާވް މައްސަލަ ހައްލު ކުރުމަށް އިންޑިއާގެ މަރުކަޒީ ބޭންކް ރިޒާވް ބޭންކް އޮފް އިންޑިއާ (އާރްބީއައި) މެދުވެރިކޮށް 400 މިލިއަން ޑޮލަރުގެ ކަރެންސީ ސްވޮޕް ފެސިލިޓީއެއް ވެސް މިދިޔަ މަހު ވަނީ ބޭނުންކޮށްފަ އެވެ. ކަރެންސީ ސްވޮޕް ފެސިލިޓީއާ އެކު ރަސްމީ ރިޒާވް ވަނީ 615 މިލިއަން ޑޮލަރަށް އަރައިފަ އެވެ.