މީޑިއާ ކޮންޓްރޯލް ބިލް އަނބުރާ ގެންގޮސްފި

ސަރުކާރަށް މީޑިއާތައް ކޮންޓްރޯލް ކުރެވޭ ގޮތަށް ތުޅާދޫ ދާއިރާގެ އަމިއްލަ މެމްބަރު އަބްދުލްހަންނާނު އަބޫބަކުރު ހުށަހެޅުއްވި ބިލު އަނބުރާ ގެންދިޔަކަން ރަސްމީކޮށް މަޖިލީހުގައި މިއަދު އިއުލާނުކޮށްފި އެވެ.

ރައްޔިތުންގެ މަޖިލީހުގެ މިއަދުގެ ޖަލްސާ ފައްޓަވަމުން މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވީ، މި މަހުގެ 19 ވަނަ ދުވަހު އެ ބިލު އަނބުރާ ގެންގޮސްފައިވާ ކަމަށެވެ.

މަޖިލީހުގެ ގަވައިދުގައިވާ ގޮތުން، އިބްތިދާއީ ބަހުސް ނިންމައި މަޖިލީހަށް ބިލު ބަލައިގަތުމަށް ވޯޓު ނެގުމުގެ ކުރިން ބިލު އަނބުރާ ގެންދެވޭނެ އެވެ. ބިލު އަނބުރާ ގެންދިޔައީ ފުރަތަމަ ކިޔުން އިއްވައި، އިބްތިދާއީ ބަހުސް ފެށުމުގެ މަރުހަލާގަ އެވެ.

މީޑިއާ އެންޑް ބްރޯޑްކާސްޓިން ކޮމިޝަންގެ ބިލް އަނބުރާ ނަގަން މަޖިލިހުގައި އެދިވަޑައިގަތީ އެއީ ސަރުކާރުގެ ސިޔާސަތު ނޫން ކަމަށް ރައީސް ޑރ. މުހައްމަދު މުއިއްޒު ވިދާޅުވެފައިވާތީ ކަމަށް ބިލު ހުށަހެޅުއްވި ހަންނާން ވަނީ ވިދާޅުވެފަ އެވެ.

"...ސަރުކާރު ހިންގާ ޕީއެންސީގައި 75 މެންބަރުން މި ތިބެނީ. ދެން ތިބެނީ 14 ވަރަކަށް މެންބަރުން. އެހެންވީމާ ސަރުކާރު މެންބަރުންގެ ތާއިދާ ނުލައި މިއީ ކުރިއަށް ގެންދެވޭނެ ބިލަކަށް ނުވާތީ އަނބުރާ ނަގަން ނިންމީ،" ހަންނާން މީގެ ކުރިން ވިދާޅުވި އެވެ.

މީޑިއާ އެންޑް ބްރޯޑްކާސްޓިން ކޮމިޝަންގެ ބިލާ މެދު ނޫސްވެރިންގެ ގިނަ ކަންބޮޑުވުންތަކެއް އޮތެވެ. ނޫސްވެރިންގެ ޖަމިއްޔާ، އެމްޖޭއޭ އިން ވަނީ އެ ބިލާ ދެކޮޅަށް "ހަތެއްގެ ހައްގުގައި"ގެ ނަމުގައި ކަމްޕެއިނެއް ވެސް ފަށައިފަ އެވެ. އެ ކެމްޕެއިންގެ ދަށުން ބިލް އަނބުރާ ގެންދަން ގޮވާލައި ނޫސްވެރިންގެ ޕެޓިޝަނެއް ތައްޔާރު ކޮށްފައިވާއިރު، އޭގައި 100 އަށް ވުރެ ގިނަ ނޫސްވެރިން ސޮއިކޮށްފައިވެ އެވެ.

އެމްޖޭއޭ އިން ބަންޑާރަ ނައިބު އަހުމަދު އުޝާމާ އެކު ބޭއްވި ބައްދަލުވުމުގައި ބިލާ ގުޅިގެން ނޫސްވެރިންގެ ހުރި ކަންބޮޑުވުންތައް ހައްލުކޮށް ދެއްވާނެ ކަމުގެ ޔަގީންކަން އޭނާ ދެއްވާފައިވެ އެވެ.

މީޑިއާތަކުގެ ބޮޑު ކަންބޮޑުވުމެއް އޮތް ބިލުގައިވާ ގޮތުން، ޖުމްލަ ހަތް މެމްބަރުންގެ މައްޗަށް އެކުލެވޭ އާ ކޮމިޝަނުގައި ތިބޭނީ ރައްޔިތުންގެ މަޖިލީހުގެ ރުހުން ލިބިގެން ރައީސުލްޖުމްހޫރިއްޔާ އައްޔަންކުރާ ހަތަރު މީހަކާއި މީޑިއާތަކުން އައްޔަންކުރާ ތިން މީހެކެވެ.

އެ ކޮމިޝަނުގެ ރައީސާއި ނައިބު ރައީސް އައްޔަން ކުރުމުގެ ބާރު، ބިލުގައި ދީފައިވަނީ މަޖިލީހުގެ ރުހުމާ އެކު ރައީސުލްޖުމްހޫރިއްޔާ އަށެވެ.

އޭގެ އިތުރުން މީޑިއާތަކުން އަމަލު ކުރަން ޖެހޭ ސުލޫކީ މިންގަނޑާ ތަކުރާރުކޮށް ހިލާފު ވެއްޖެ ނަމަ 5،000ރ. އާއި 50،000ރ. އާ ދެމެދުގެ އަދަދަކުން ޖޫރިމަނާ ކުރެވޭނެ ކަމަށާއި ވަކިވަކި ނޫސްވެރިން 5،000ރ. އާއި 10،000ރ. އާ ދެމެދުގެ އަދަދަކުން ޖޫރިމަނާ ކުރެވޭނެ ކަމަށް އެ ބިލުގައި ބުނެފައިވެ އެވެ.