މީޑިއާ ކޮމިޝަންގެ ބިލް އަނބުރާ ގެންދަން ގޮވާލައިފި

މޯލްޑިވްސް މީޑިއާ ކައުންސިލް (އެމްއެމްސީ) އާއި މޯލްޑިވްސް ބްރޯޑްކާސްޓިން ކޮމިޝަން (ބްރޯޑްކޮމް) އެއްކޮށްލުމަށްޓަކައި ރައްޔިތުންގެ މަޖިލީހަށް ހުށަހަޅާފައިވާ މީޑިއާ ކޮމިޝަންގެ ބިލްގެ ސަބަބުން ނޫސްވެރިކަމުގެ މިނިވަންކަމަށް ވަރަށް ބޮޑަށް ހުރަސް އެޅޭތީ އެ ބިލް އަނބުރާ ގެންދަން ބައެއް ޖަމިއްޔާތަކުން މިއަދު ގޮވާލައިފި އެވެ.

ތުޅާދޫ ދާއިރާގެ އަމިއްލަ މެންބަރު އަބްދުލްހަންނާން އަބޫބަކުރު ހުށަހަޅާފައިވާ މީޑިއާ އެންޑް ބްރޯޑްކާސްޓިން ކޮމިޝަންގެ ބިލް އޮތް ގޮތާ މެދު ކަންބޮޑުވުން ފާޅުކޮށް އެމްޖޭއޭ އާއި އެމްއެމްސީ އަދި ޓްރާންސްޕޭރެންސީ މޯލްޑިވްސް އިން ވަނީ "ހަތަރެއްގެ ހައްގުގައި" ނަމުގައި ކެމްޕެއިނެއް ފަށައިފަ އެވެ. އެ ކެމްޕެއިން ޓީމުން ބޭއްވި ޕްރެސް ކޮންފަރެންސްގައި، އެމްޖޭއޭގެ ސެކްރެޓަރީ ޖެނެރަލް އަހުމަދު ނާއިފް ވިދާޅުވީ އެއީ ވަކި ސިޔާސީ ފިކުރެއްގެ ބަޔަކަށް ބާރު ލިބޭ ގޮތަށް އަދި މިނިވަން މީޑިއާގެ ވެށި މުޅިން ނެތި ހިނގައިދާނެ އަދި އެތައް އަހަަރެއް ފަހަތަށް ސޮއްސައިލާނެ ބިލެއް ކަމަށެވެ.

ސަރުކާރު އަދި ސަރުކާރު ހިންގާ ޕާޓީ ޕީއެންސީގެ ފަރާތުން ވެސް އެ ބިލު ބަލައި ނުގަނެ، ފޮނުވާލަން އޭނާ ގޮވާލެއްވި އެވެ.

ނާއިފް ވިދާޅުވީ އެ ބިލް އިސްލާހުކުރުމަކީ މި ވަގުތަށް ރަނގަޅު ކަމެއް ކަމަށް ގަބޫލު ނުކުރެވޭ ކަމަށެވެ. އެހެންވެ، ނޫސްވެރިންނާއި އެޑިޓަރުންނާ މަޝްވަރާކުރުމަށް ފަހު، ރަނގަޅު ބިލެއް ހުށަހެޅުމެއް، އެ ބިލް އަނބުރާ ފޮނުވާލަން އޭނާ އެދިވަޑައިގަތެވެ.

އެމްއެމްސީގެ މެމްބަރު މޫސާ ރަޝީދު ވިދާޅުވީ އެ ބިލުގައި އެ ކައުންސިލުން ކަންބޮޑުވާ ވަރަށް ގިނަ ކަންތައްތައް އެބަހުރި ކަމަށެވެ.

ސެލްފު ރެގިއުލޭޓްރީ ނިޒާމަކަށް ދިއުމުގެ ބަދަލުގައި ޖޫރިމަނާކުރުން ފަދަ ކަންކަން ބިލްގައި ކަނޑައަޅާފައި ވުމުން ނުފޫޒު ފޯރުވުމުގެ ފުރުސަތު އެބައޮތް ކަމަށް ވިދާޅުވި އެވެ.

މޫސަ ވިދާޅުވީ މީގެ ކުރިން ބޭއްވި މަޝްވަރާތަކުގައި ވެސް އެމްއެމްސީ އަދި ބްރޯޑްކޮމް އެއްކޮށްލަން ތާއިދުކުރައްވާ ކަމަށެވެ. އެކަމަކު، އޮންނަން ޖެހޭނީ ދެ ގާނޫނުގައި ވެސް ހުރި މައްސަލަތަކަށް ހައްލު ލިބޭ ގޮތަށް ކަމަށް މޫސަ ވިދާޅުވި އެވެ.

އޭނާ ވިދާޅުވީ އެމްއެމްސީއަށް މި އަހަރު 95 މައްސަލަ ހުށަހެޅިއިރު، އޭގައި ގިނައީ ރަޖިސްޓްރީނުކުރާ ނޫސްތަކާ ދެކޮޅު މައްސަލަތައް ކަމަށެވެ. ނަމަވެސް، އަލަށް ހެދި ބިލުގައި ވެސް އެ ކަހަލަ އެއްވެސް ކަމެއް ނެތް ކަމަށް ފާހަގަކުރެއްވި އެވެ.

"އަޅުގަނޑުމެންގެ އުއްމީދަކީ ރަނގަޅު ހެޔޮ ބަދަލުތަކެއް ފެނުން އަދި ކޮމިޓީ މަރުހަލާ އަށް ނުގޮސް ބޭރުކޮށްލުން އެއީ އަޅުގަނޑުމެން ވަކާލާތުކުރާ ކަމަކީ." މޫސަ ވިދާޅުވި އެވެ.

ޓްރާންސްޕޭރެންސީ މޯލްޑިވްސްގެ ގަވަނެންސް މެނޭޖަރު އައްޒަ މުހައްމަދު ވިދާޅުވީ މައުލޫމަތަކީ ހުރިހާ ހައްގެއްގެ އަސާސް ކަމަށެވެ. އެކަމަކު، އެ ހައްގުތައް ހަނިކުރުމުން ނޫސްވެރިންގެ މަސައްކަތަށް ހުރަސް އެޅޭ ކަމަށް ވިދާޅުވި އެވެ. އޭގެ ސަބަބުން ކޮރަޕްޝަންގެ މައްސަލަތައް ރިޕޯޓުކުރަން ފަސްޖެހި، އަމިއްލަ އަށް ސެންސަޝިޕަށް ދިއުމުގެ ފުރުސަތު އޮންނާނެ ކަމަށް ވިދާޅުވި އެވެ.

ދަ މިރާގެ ނޫސްވެރިޔާ ޝިފްޒާން އަހުމަދު ވިދާޅުވީ، އެ ބިލް އެކުލަވާލާފައިވަނީ ނޫސްވެރިކަން ރެގިއުލޭޓް ކުރުމުގެ މިންގަނޑުތަކާ ހިލާފަށް ކަމަށެވެ.

"ބިލް ބަލައިނުގަތުމަށް ޑިމާންޑުކުރާ ސަބަބަކީ، ރާއްޖޭގައި މިހާތަނަށް ކުރެވިފައިވާ ތަޖުރިބާ އަށް ބަލާއިރު ރައްޔިތުންގެ މަޖިލީހަށް ހުށަހަޅާ ބިލެއް، ހުށަހަޅާއިރަށް ވުރެ ރަނގަޅު ކުރުމަށްޓަކައި މަޖިލީހުގެ ކޮމިޓީއަކުން ބިލެއް އިސްލާހުކޮށްގެން ބަދަލު ކޮށްގެން ފާސްކޮށް ނެރޭއިރުގައި އޮންނަނީ މާ ގިނަ މައްސަލަތައް އުފެދިފައި،" ޝިފްޒާން ވިދާޅުވި އެވެ.

މީޑިއާ ކޮމިޝަންގެ ބިލްގެ ފުރަތަމަ ކިޔުން ވަނީ މަޖިލީހަށް އިއްވައިފަ އެވެ. އެ ބިލަށް ތާއީދު ކުރުމާ މެދު ޕީއެންސީން އަދި ވަކި ގޮތެއް ނުނިންމަ އެވެ.

ބިލްގައިވާ ގޮތުން، ހަތް މެމްބަރުންގެ މައްޗަށް އެކުލެވޭ އާ ކޮމިޝަނުގައި ތިބޭނީ ރައްޔިތުންގެ މަޖިލީހުގެ ރުހުން ލިބިގެން ރައީސުލްޖުމްހޫރިއްޔާ އައްޔަންކުރާ ހަތަރު މީހަކާއި މީޑިއާތަކުން އައްޔަންކުރާ ތިން މީހެކެވެ.

މީޑިއާ ތަމްސީލުކުރާ ތިން މެމްބަރުން އިންތިހާބު ކުރަން ވޯޓުލެވޭނީ، ގާނޫނުތަކުގެ ދަށުން ރަޖިސްޓަރީ ކޮށްގެން ހިންގާތާ ފަސް އަހަރު ވެފައިވާ ބްރޯޑްކާސްޓަރުންނާއި މީޑިއާތަކާއި އެ ތަންތަނުގައި މަސައްކަތް ކުރާ ނޫސްވެރިންނަށެވެ.

އެ ކޮމިޝަނުގެ ރައީސާއި ނައިބު ރައީސް އައްޔަން ކުރުމުގެ ބާރު، ބިލުގައި ދީފައިވަނީ މަޖިލީހުގެ ރުހުމާ އެކު ރައީސުލްޖުމްހޫރިއްޔާ އަށެވެ.

އޭގެ އިތުރުން މީޑިއާތަކުން އަމަލު ކުރަން ޖެހޭ ސުލޫކީ މިންގަނޑާ ތަކުރާރުކޮށް ހިލާފު ވެއްޖެ ނަމަ 5،000ރ. އާއި 50،000ރ. އާ ދެމެދުގެ އަދަދަކުން ޖޫރިމަނާ ކުރެވޭނެ ކަމަށާއި ވަކިވަކި ނޫސްވެރިން 5،000ރ. އާއި 10،000ރ. އާ ދެމެދުގެ އަދަދަކުން ޖޫރިމަނާ ކުރެވޭނެ ކަމަށް އެ ބިލުގައި ބުނެފައިވެ އެވެ.