މީޑިއާ ކޮންޓްރޯލް ކުރާ ބިލް މަޖިލީހުން ބޭރުކުރާނެ: ރައީސް

ސަރުކާރަށް މީޑިއާތައް ކޮންޓްރޯލް ކުރެވޭ ގޮތަށް އަމިއްލަ މެމްބަރަކު ރައްޔިތުންގެ މަޖިލީހަށް ހުށަހަޅުއްވާފައިވާ ބިލް، ސަރުކާރު ހިންގާ ޕާޓީ ޕީއެންސީން ބޭރުކޮށްލާނެ ކަމަށް ރައީސް ޑރ. މުހައްމަދު މުއިއްޒު މިރޭ ވިދާޅުވެއްޖެ އެވެ.

މި ސަރުކާރަށް އެއް އަހަރު ފުރުން ފާހަގަކުރަން ސޯޝަލް ސެންޓަރުގައި ބޭއްވި ރަސްމިއްޔާތުގައި ރައީސް ވަނީ އާއްމުންގެ ކަންބޮޑުވުންތައް ހިމެނޭ ކަންކަމާ ގުޅޭގޮތުން ވެސް ދިގުކޮށް ވާހަކަފުޅު ދައްކަވައިފަ އެވެ.

އޭގެ ތެރޭގައި، ތުޅާދޫ ދާއިރާގެ އަމިއްލަ މެމްބަރު އަބްދުލްހަންނާނު އަބޫބަކުރު ހުށަހަޅުއްވާފައިވާ ބިލާ ގުޅޭ ވާހަކަފުޅުތައް ހިމެނެ އެވެ.

ރައީސް ވިދާޅުވީ، މޯލްޑިވްސް މީޑިއާ ކައުންސިލާއި މޯލްޑިވްސް ބްރޯޑްކާސްޓިން ކޮމިޝަން އެއްކޮށްލަން ހުށަހެޅި އެ ބިލްގައި ވަނީ އެ މަނިކުފާނު ގަބޫލުފުޅު ކުރައްވާ ސިޔާސަތެއް ނޫން ކަމަށެވެ.

މީޑިއާތައް ކޮންޓްރޯލް ކުރާ ހިތްޕުޅު ނުވާ ކަމަށާއި ބޭނުންފުޅުވަނީ މީޑިއާތަކަށް މިހާރަށް ވުރެ ބޮޑަށް މިނިވަންކަން ދޭން ކަމަށް ވެސް ވިދާޅުވި އެވެ.

"އެގޮތަކަށް އަޅުގަނޑުމެންނެއް ނުކުރާނަން. އޭގެ ބަދަލުގައި މީޑިއާތައް ބާރުވެރިކުރުވަން މަސައްކަތް ކުރާނީ. މީޑިއާތައް ބާރުވެރި ކުރުވުމަށްޓަކައި ފުރަތަމަ ފަހަރަށް މި ފާސްކުރެވޭ ބަޖެޓުގައި އޮންނާނެ ދައުލަތުގެ ބަޖެޓުން މީޑިއާތަކަށް ފައިސާ ދޭން ހިމަނާފައި. ފުރަތަމަ ފަހަރަށް، ވައުދުވި ގޮތަށް،" ރައީސް މުއިއްޒު ވިދާޅުވި އެވެ.

މީޑިއާތަކަށް ހެޔޮ އަގުގައި އޮފީސް ހިންގާނެ ޖާގަ ދިނުމަށް ހުޅުމާލެއިން އިމާރާތެއް ހަމަޖައްސައި، ގަވައިދަށް ފެތޭ ހުރިހާ މީޑިއާތަކަށް އެސްޓީއޯއިން އަޅަން ފެށި ހޮޓަލުން އޮފީސް ޖާގަ ލިބޭނެ ކަމަށް އެ މަނިކުފާނު ވިދާޅުވި އެވެ.

މިރޭގެ ރަސްމިއްުޔާތަށް ފަހު، ރައީސް ސަޕޯޓަރުންނާ ސަލާން ކުރައްވަނިކޮށް އެ ސަރަހައްދަށް ދިޔަ ބައެއް ނޫސްވެރިން ވަނީ މީޑިއާ ކޮމިޝަންގެ ބިލާ ގުޅޭގޮތުން ސުވާލު ކޮށްފަ އެވެ. އެ މަނިކުފާނު ވިދާޅުވީ ވެރިކަން ކުރާ ޕާޓީގެ މެޖޯރިޓީ އޮތް މަޖިލީހުން އެ ބިލް ބޭރުކުރާނެ ކަމަށެވެ.

"އޭތި ބޭރުކުރާނެ،" ރައީސް ވިދާޅުވި އެވެ.

އެ ބިލް ބަލައި ނުގަންނާނެތޯ ނޫސްވެރިޔާ ސުވާލުކުރުމުން ރައީސް ވިދާޅުވީ "ޔޭސް، އޮފްކޯޒް" އެވެ.

އެ މަނިކުފާނު ވިދާޅުވީ މަސައްކަތްކުރައްވަނީ ދެފުށް ފެންނަ ސަރުކާރެއް ގާއިމްކުރަން ކަމަށެވެ. ރައީސް އޮފީހަށް ހުށަހަޅާފައިވާ އާރުޓީއައިތަކުގެ 91 ޕަސެންޓަށް ޖަވާބުދީފައިވާ ކަމަށް ވިދާޅުވި އެވެ.

ރައީސް ވިދާޅުވީ ހުރިހާ މިނިސްޓްރީއަކުން ކުރާ ކަންތައްތައް، 'ސަރުކާރު' ވެބްސައިޓުގައި އަޕްލޯޑް ކުރަމުންދާ ކަމަށާއި މީގެ ކުރިން މައުލޫމާތު ހާމަނުކުރާ ވަރަށް ހާމަކުރަމުންދާ ކަމަށެވެ. ޖަވާބު ދިނުމަށް ރައްޔިތުންގެ އަޑުގެ ނަމުގައި ޕޯޓަލްއެއް ރަޖިސްޓްރީކުރި ކަމަށާއި މިހާތަނަށް 819 ސުވާލު ލިބިވަޑައިގެންނެވި ކަމަށެވެ. އޭގެ ތެރެއިން 773 ސުވާލަށް ވަރަށް ތަފްސީލުކޮށް ޖަވާބު ދީފައިވެ އެވެ.

އެކި މިނިސްޓްރީތަކުން 73 ޕްރެސް ކޮންފަރެންސް ބާއްވައި 791 ފަހަރު އެކި މިނިސްޓަރުން މީޑިއާތަކަށް އިންޓަވިއު ދެއްވި ކަމަށް ރައީސް ވިދާޅުވި އެވެ.

ނަމަވެސް، ނޫސްވެރިން ވެސް އަމަލުކުރަންޖެހޭ އުސޫލެއް އެބައޮތް ކަމަށާއި ތެދު ބަހުން ނޫސްވެރިކަން ކުރާ ނަމަ ކޮންމެ ކަމެއް ހާމަކުރިއަސް ވަރިހަމަ ކަމަށް އެ މަނިކުފާނު ވިދާޅުވި އެވެ.

"އެއީ ސިޔާސީ ވެގެން، ސިޔާސީ ލީޑަރަކު ބުނެގެން ނޫނީ ތިމަންނަގެ އަމިއްލަ އެޖެންޑާއެއް އޮވެގެން ލިޔާ އެއްޗަކުން ތެދަކަށް ނުވާނޭ. އެހެން ނުހައްދަވައްޗޭ. ތެދު ބަހުން، ފުރިހަމަ މިނިވަންކަން މި ރާއްޖޭގައި އިސްލާމް ދީނާއި ގާނޫނުއަސާސީއާ އެއްގޮތަށް ފުރިހަމަ މިނިވަންކަން ހަގީގީ މާނައިގައި ހުރިހާ މީޑިއާތަކަށް އޮންނާނެ،" ރައީސް ވިދާޅުވި އެވެ.

މީޑިއާތަކުގެ ބޮޑު ކަންބޮޑުވުމެއް އޮތް ބިލުގައިވާ ގޮތުން، ޖުމްލަ ހަތް މެމްބަރުންގެ މައްޗަށް އެކުލެވޭ އާ ކޮމިޝަނުގައި ތިބޭނީ ރައްޔިތުންގެ މަޖިލީހުގެ ރުހުން ލިބިގެން ރައީސުލްޖުމްހޫރިއްޔާ އައްޔަންކުރާ ހަތަރު މީހަކާއި މީޑިއާތަކުން އައްޔަންކުރާ ތިން މީހެކެވެ.

އެ ކޮމިޝަނުގެ ރައީސާއި ނައިބު ރައީސް އައްޔަން ކުރުމުގެ ބާރު، ބިލުގައި ދީފައިވަނީ މަޖިލީހުގެ ރުހުމާ އެކު ރައީސުލްޖުމްހޫރިއްޔާ އަށެވެ.

އޭގެ އިތުރުން މީޑިއާތަކުން އަމަލު ކުރަން ޖެހޭ ސުލޫކީ މިންގަނޑާ ތަކުރާރުކޮށް ހިލާފު ވެއްޖެ ނަމަ 5،000ރ. އާއި 50،000ރ. އާ ދެމެދުގެ އަދަދަކުން ޖޫރިމަނާ ކުރެވޭނެ ކަމަށާއި ވަކިވަކި ނޫސްވެރިން 5،000ރ. އާއި 10،000ރ. އާ ދެމެދުގެ އަދަދަކުން ޖޫރިމަނާ ކުރެވޭނެ ކަމަށް އެ ބިލުގައި ބުނެފައިވެ އެވެ.