މީޑިއާ ކޮންޓްރޯލް ބިލް އަނބުރާ ގެންދަން ހަންނާން ހުށަހަޅައިފި

ސަރުކާރަށް މީޑިއާތައް ކޮންޓްރޯލް ކުރެވޭ ގޮތަށް ރައްޔިތުންގެ މަޖިލީހަށް ހުށަހެޅުއްވި ބިލަށް ސަރުކާރު ހިންގާ ޕާޓީ ޕީއެންސީގެ ތާއިދު ނުލިބޭނެތީ، އަނބުރާ ގެންދަން ހުށަހަޅުއްވާފައިވާ ކަމަށް ތުޅާދޫ ދާއިރާގެ އަމިއްލަ މެމްބަރު އަބްދުލްހަންނާނު އަބޫބަކުރު މިއަދު ވިދާޅުވެއްޖެ އެވެ.

ހަންނާން "މިހާރު" އަށް ވިދާޅުވި ގޮތުގައި، މީޑިއާ އެންޑް ބްރޯޑްކާސްޓިން ކޮމިޝަންގެ ބިލް އަނބުރާ ނަގަން މަޖިލިހުގައި އެދިވަޑައިގަތީ އެއީ ސަރުކާރުގެ ސިޔާސަތު ނޫން ކަމަށް ރައީސް ޑރ. މުހައްމަދު މުއިއްޒު ވިދާޅުވެފައިވާތީ އެވެ.

"..ސަރުކާރު ހިންގާ ޕީއެންސީގައި 75 މެންބަރުން މި ތިބެނީ. ދެން ތިބެނީ 14 ވަރަކަށް މެންބަރުން. އެހެންވީމާ ސަރުކާރު މެންބަރުންގެ ތާއިދާ ނުލައި މިއީ ކުރިއަށް ގެންދެވޭނެ ބިލަކަށް ނުވާތީ އަނބުރާ ނަގަން ނިންމީ،" ހަންނާން ވިދާޅުވި އެވެ.

ބިލް މިހާރު އޮތީ ފުރަތަމަ ކިޔުން އިއްވައި، އިބްތިދާއީ ބަހުސް ފެށުމުގެ މަރުހަލާގަ އެވެ.

ސަރުކާރަށް އެއް އަހަރު ފުރުން ފާހަގަކުރަން މިިދިޔަ އާދިއްތަ ދުވަހުގެ ރޭ ބޭއްވި ޖަލްސާގައި ރައީސް ޑރ. މުހައްމަދު މުއިއްޒު ވިދާޅުވެފައިވަނީ މޯލްޑިވްސް މީޑިއާ ކައުންސިލާއި މޯލްޑިވްސް ބްރޯޑްކާސްޓިން ކޮމިޝަން އެއްކޮށްލަން ހުށަހެޅި އެ ބިލްގައި ވަނީ އެ މަނިކުފާނު ގަބޫލުފުޅު ކުރައްވާ ސިޔާސަތެއް ނޫން ކަމަށެވެ. މީޑިއާތައް ކޮންޓްރޯލް ކުރާ ހިތްޕުޅު ނުވާ ކަމަށާއި ބޭނުންފުޅުވަނީ މީޑިއާތަކަށް މިހާރަށް ވުރެ ބޮޑަށް މިނިވަންކަން ދޭން ކަމަށް ވެސް ވިދާޅުވި އެވެ.

މީޑިއާ އެންޑް ބްރޯޑްކާސްޓިން ކޮމިޝަންގެ ބިލާ މެދު ނޫސްވެރިންގެ ގިނަ ކަންބޮޑުވުންތަކެއް އޮތެވެ. ނޫސްވެރިންގެ ޖަމިއްޔާ، އެމްޖޭއޭ އިން ވަނީ އެ ބިލާ ދެކޮޅަށް "ހަތެއްގެ ހައްގުގައި"ގެ ނަމުގައި ކަމްޕެއިނެއް ވެސް ފަށައިފަ އެވެ. އެ ކެމްޕެއިންގެ ދަށުން ބިލް އަނބުރާ ގެންދަން ގޮވާލައި ނޫސްވެރިންގެ ޕެޓިޝަނެއް ތައްޔާރު ކޮށްފައިވާއިރު، އޭގައި 100 އަށް ވުރެ ގިނަ ނޫސްވެރިން ސޮއިކޮށްފައިވެ އެވެ.

އެމްޖޭއޭ އިން ބަންޑާރަ ނައިބު އަހުމަދު އުޝާމާ އެކު ބޭއްވި ބައްދަލުވުމުގައި ބިލާ ގުޅިގެން ނޫސްވެރިންގެ ހުރި ކަންބޮޑުވުންތައް ހައްލުކޮށް ދެއްވާނެ ކަމުގެ ޔަގީންކަން އޭނާ ދެއްވާފައިވެ އެވެ.

މީޑިއާތަކުގެ ބޮޑު ކަންބޮޑުވުމެއް އޮތް ބިލުގައިވާ ގޮތުން، ޖުމްލަ ހަތް މެމްބަރުންގެ މައްޗަށް އެކުލެވޭ އާ ކޮމިޝަނުގައި ތިބޭނީ ރައްޔިތުންގެ މަޖިލީހުގެ ރުހުން ލިބިގެން ރައީސުލްޖުމްހޫރިއްޔާ އައްޔަންކުރާ ހަތަރު މީހަކާއި މީޑިއާތަކުން އައްޔަންކުރާ ތިން މީހެކެވެ.

އެ ކޮމިޝަނުގެ ރައީސާއި ނައިބު ރައީސް އައްޔަން ކުރުމުގެ ބާރު، ބިލުގައި ދީފައިވަނީ މަޖިލީހުގެ ރުހުމާ އެކު ރައީސުލްޖުމްހޫރިއްޔާ އަށެވެ.

އޭގެ އިތުރުން މީޑިއާތަކުން އަމަލު ކުރަން ޖެހޭ ސުލޫކީ މިންގަނޑާ ތަކުރާރުކޮށް ހިލާފު ވެއްޖެ ނަމަ 5،000ރ. އާއި 50،000ރ. އާ ދެމެދުގެ އަދަދަކުން ޖޫރިމަނާ ކުރެވޭނެ ކަމަށާއި ވަކިވަކި ނޫސްވެރިން 5،000ރ. އާއި 10،000ރ. އާ ދެމެދުގެ އަދަދަކުން ޖޫރިމަނާ ކުރެވޭނެ ކަމަށް އެ ބިލުގައި ބުނެފައިވެ އެވެ.

ބިލާ މެދު ކަންބޮޑުވުން ފާޅުކޮށް، އެ ބިލް އަނބުރާ ގެންދަން އިދިކޮޅު އެމްޑީޕީން ވެސް ގޮވާލާފައިވެ އެވެ.