ގެވެށި އަނިޔާއާ ދެކޮޅަށް މަހާސިންތާއެއް ފަށައިފި

ގެވެށި އަނިޔާއާ ދެކޮޅަށް މަސައްކަތްކުރާ މަދަނީ ޖަމިއްޔާތައް ބައިވެރިވާ "މަދަނީ ޖަމިއްޔާތަކުގެ މަހާސިންތާ" މިއަދު ފަށައިފި އެވެ.

ފެމިލީ ޕްރޮޓެކްޝަން އެޖެންސީ (އެފްޕީއޭ) އާއި ޔުނިސެފް ގުޅިގެން ބާއްވާ މި މަހާސިންތާގައި ރާއްޖޭގެ އެކި ސަރަހައްދުތަކުން 15 ޖަމިއްޔާއަކުން މީހުން ބައިވެރިވެ އެވެ.

މަހާސިންތާގެ މި އަހަރުގެ ޝިއާރަކީ "ގުޅިގެން ބަދަލެއް: ގެވެށި އަނިޔާ ހުއްޓުވުމަށް އިޖާބަދިނުމުގައި ބާރުވެރި މުޖުތަމައެއް ބިނާކުރުން" އެވެ.

އެފްޕީއޭ އިން ބުނި ގޮތުގައި މަހާސިންތާގެ ބޭނުމަކީ ގެވެށި އަނިޔާ ހުއްޓުވުމަށް މަސައްކަތް ކުރާ މަދަނީ ޖަމިއްޔާތަކާ ގުޅިގެން މަސައްކަތް ކުރުމަށް ދިމާވާ ދަތިތަކަކީ ކޮބައިތޯ ދަނެގަނެ، އެ މައްސަލަތައް ހައްލުކުރުމަށް ހަރުދަނާ މަސައްކަތްތަކެއްކޮށް، ދެމެހެއްޓެނިވި ބަދަހި ގުޅުމެއް ސަރުކާރުގެ މުއައްސަސާތަކާއި ޖަމިއްޔާތަކާ މެދު ގާއިމުކުރުމެވެ.

އެ މަހާސިންތާގެ އަލީގައި ދައުލަތުގެ އެކި އިދާރާތަކާއި ޖަމިއްޔާތަކުން އެކުގައި ކުރެވޭނެ މަސައްކަތްތަކާއި އަނިޔާ ލިބޭ ފަރާތަށް އަޅާލާނެ ގޮތާއި އެމީހުންނާ މެދު ގެންގުޅެންޖެހޭ މިންގަނޑުތަކާއި ހިފަހައްޓަން ޖެހޭ އުސޫލުތައް ވެސް ހިއްސާކުރާނެ ކަމަށް އެފްޕީއޭ އިން ބުނެ އެވެ.

މަހާސިންތާ ފެށުމުގެ ރަސްމިއްޔާތުގެ ޝަރަފުވެރި މެހުމާން ސޯޝަލް އެންޑް ފެމިލީ ޑިވެލޮޕްމަންޓް މިނިސްޓަރު ޑރ. އައިޝަތު ޝިހާމް ވިދާޅުވީ ސަރުކާރުގެ އެންމެ ބޮޑު އެއް އަމާޒަކީ އަނިޔާ ލިބޭ މީހުން ވީ އެންމެ އަވަހަކަށް އެކަމުން އަރައިގަތުމަށް ބޭނުންވާ އެހީތެރިކަން ފޯރުކޮށްދީ، ރައްކާތެރި މާހައުލެއް ކަށަވަރުކޮށްދިނުން ކަމަށެވެ.

އެކަން ހާސިލުކުރުމަށް ގެވެށި އަނިޔާ ހުއްޓުވުމުގެ ގާނޫނީ އޮނިގަނޑު އިތުރަށް ހަރުދަނާ ކުރުމަށް ގެންނަން ޖެހޭ އިސްލާހުތައް ގެނައުމުގެ މަސައްކަތް ކުރަމުން އަންނަ ކަމަށް މިނިސްޓަރު ވިދާޅުވި އެވެ.

އޭނާ ވަނީ އަނިޔާ ލިބޭ މީހުންނަށް ބޭނުންވާ އިޖުތިމާއީ އެހީތެރިކަމާއި އިގްތިސާދީ އަދި މާލީ ގޮތުން އެހީތެރިކަން ފޯރުކޮށްދޭ ޖަމިއްޔާތަކުގެ މަސައްކަތް ފާހަގަކުރައްވައި ޝުކުރު އަދާކުރައްވައިފަ އެވެ.

މާދަމާގެ ނިޔަލަށް ކުރިއަށް ގެންދާ މި މަހާސިންތާގައި އެކަމާ ގުޅޭ އެމްއޯޔޫތަކެއްގައި ސޮއިކުރަން ވެސް ހަމަޖެހިފައިވެ އެވެ.