ސިވިލް ސާވިސްގެ ރައީސް މުވައްޒަފުންނަށް ޖާސޫސްކުރާ ކަމުގެ ތުހުމަތު، ކޮމިޓީން ނިންމީ ވަކިނުކުރަން

ސިވިލް ސާވިސް ކޮމިޝަންގެ ރައީސް މުހައްމަދު ނާސިހް މުވައްޒަފުންނަށް ޖާސޫސްކޮށް ފާރަލާފައިވާ ކަމަށް ތުހުމަތު ކުރެވުނު ނަމަވެސް އެ ކަންކަން ސާބިތުނުވާތީ އޭނާ މަގާމުން ވަކި ނުކުރަން ރައްޔިތުންގެ މަޖިލީހުގެ މިނިވަން މުއައްސަސާތަކާ ބެހޭ ކޮމިޓީން ނިންމައިފި އެވެ.

ސިވިލް ސާވިސް ކޮމިޝަންގެ ރައީސް ނާސިހު އެ ކޮމިޝަންގެ ރައީސްގެ މަސްއޫލިއްޔަތުތަކާ ހިލާފަށް އަމަލުކޮށްފައިވާ ކަމަށާއި އެ ކޮމިޝަންގެ މެންބަރުކަމުގެ މަގާމާ އެކަށީގެންނުވާ ފަދަ އަމަލުތަކެއް ކޮށްފައިވާ ކަމަށް ބުނެ މަޖިލީހަށް މައްސަލައެއް ހުށަހަޅާފައިވެ އެވެ.

މިނިވަން މުއައްސަސާތަކާ ބެހޭ ކޮމިޓީން އެ މައްސަލަ ދިރާސާކުރުމަށް ފަހު މިއަދު އާންމުކުރި ރިޕޯޓްގައި ނާސިހްގެ މައްޗަށް ގިނަ ތުހުމަތުތަކެއް ކޮށްފައިވެ އެވެ.

ނާސިހްގެ މައްޗަށް ކުރާ ތުހުމަތުތައް:

- ކޮމިޝަންގެ ބައެއް ވެރިންގެ ކޮމްޕިއުޓާ ސިސްޓަމަށާއި ސިވިސް ސާވިސް ޓްރެއިނިން އިންސްޓިޓިއުޓްގައި ތިއްބަވާ ބައެއް ފަރާތްތަކުގެ ކޮމްޕިއުޓާ ސިސްޓަމަށް ސޮފްޓްވެއާއެއް އަޅައިގެން އެ މުވައްޒަފުންނަށް ޖާސޫސްކޮށް ފާރަލުން.

- ކޮމިޝަންގެ އެޑްމިނިސްޓްރޭޓިވް ސެކްޝަން އަދި ފައިނޭންސް ސެކްޝަނަށް ދެ ޑިރެކްޓަރުން ހޮވުމަށްޓަކައި ވަކި ފަރާތަކަށް ހާއްސަކޮށްގެން ގަވައިދަށް ނުވަތަ އުސޫލަށް ބަދަލު ގެނައުން.

- ކޮމިޝަންގެ ކައުންސެލް ޖެނަރަލް ޗުއްޓީއަށް ވަޑައިގަތުމުން ސީނިއާ ލީގަލް ކައުންސެލްއާ އެ މަގާމުގެ މަސްއޫލިއްޔަތު ހަވާލުކުރުމުގެ ބަދަލުގައި އުސޫލާ ހިލާފަށް ޖޫނިއާ މަގާމެއްގެ މުވައްޒަފަކާ މަސްއޫލިއްޔަތު ހަވާލުކުރުން.

- ޕްރޮބޭޝަން ފެއިލްވެފައިވާ މުވައްޒަފެއްގެ ޕްރޮބޭޝަން ފޯމް ފުރުމަށް ފަހު އެ މުވައްޒަފު ވަޒީފާއިން ވަކި ކުރަން ސުޕަވައިޒަރު ލަފާދީފައިވަނިކޮށް އެ މުވައްޒަފު ވަކި ނުކުރަން ނިންމުން.

- ސިވިލް ސާވިސްގެ ވަޒީފާ ދިނުމުގައި އެމީހެއްގެ ތައުލީމީ ފެންވަރާއި މަސައްކަތުގެ ހުނަރާއި ގާބިލްކަމާއި ތަޖުރިބާއަށް ބެލުމެއް ނެތި ވަޒީފާ ދިނުން.

- ކުރީ ސަރުކާރުގެ މިނިސްޓަރުންނާއި މަޖިލިސް މެންބަރުންގެ އެދުމަށް ވަޒީފާތަކަށް އެކި މީހުން ހަމަޖެއްސުން. ޕާޓީއެއްގެ އެތެރޭގެ އިންތިހާބަކާ ދިމާކޮށް ކުރީގެ މިނިސްޓަރެއްގެ އެދުމަށް ވަޒީފާ ބަޔަކަށް ދީފައިވާ ކަން.

- ކުރީގެ މިނިސްޓަރެއްގެ އެދުމަށް ޕީސީބީ ބޯޑުގެ މަގާމަކަށް މީހުން އައްޔަންކޮށްފައިވުން އަދި ކުރީގެ މިނިވަން މުއައްސަސާތަކާ ބެހޭ ކޮމިޓީގެ މެންބަރުން އެދިފައިވާ ގޮތަށް ވަޒީފާތައް ހަމަޖައްސަައިދީފައިވުން.

މި ތުހުމަތުތަކާ ގުޅިގެން ޖަވާބުދާރީވުމުގެ ފުރުސަތު ކޮމިޓީން ނާސިހަށް ދީފައިވެ އެވެ. އެ ފުރުސަތުގައި ނާސިހްގެ ފަރާތުން ލިޔުންތަކެއް ކޮމިޓީއަށް ހުށަހަޅާފައިވެ އެވެ.

އެ ލިޔުންތަކަށް ބަލާއިރު، މަގާމާ އެކަށީގެންވާ އަމަލެއް ނާސިހް ކޮށްފައިވާ ކަމަށް ކޮމިޓީއަށް ސާބިތު ނުވާ ކަމަށް ރިޕޯޓްގައި ބުންޏެވެ. އެހެންވެ، އޭނާ މަގާމުން ވަކި ކުރަން ނުފެންނަ ކަމަށް ކޮމިޓީގެ އިއްތިފާގުން ވަނީ ފާސްކޮށްފަ އެވެ.

ނާސިހްއާ އެކު އެންޓި ކޮރަޕްޝަން ކޮމިޝަންގެ ނައިބު ރައީސް އަބްދުލް ސަލާމާއި މެންބަރު ތޯހާ މުހައްމަދު އަދި އިލެކްޝަން ކޮމިޝަންގެ ނައިބު ރައީސް އަލީ ނަޝާތާއި މެންބަރު މުހައްމަދު އާސިފާއި މެންބަރު ޑރ. މުހައްމަދު ޒާހިރުގެ މައްސަލަތައް ވެސް މަޖިލީހަށް ހުށަހެޅި އެވެ. އެ މައްސަލަތައް ބެލުމަށް ފަހު ކޮމިޓީން ނިންމީ އެ ހުރިހާ މެންބަރުން މަގާމުން ވަކިކުރާށެވެ.