އޭސީސީ، އީސީ އަދި ސީއެސްސީގެ ބައެއް މެންބަރުން ވަކިކުރަނީ ނުފޫޒަށް ލެނބުމާއި ސުލޫކީ މައްސަލަތަކަކާ ގުޅިގެން

އެންޓި ކޮރަޕްޝަން ކޮމިޝަން (އޭސީސީ) އާއި އިލެކްޝަންސް ކޮމިޝަން (އީސީ) އަދި ސިވިލް ސާވިސް ކޮމިޝަން (ސީއެސްސީ) ގެ ބައެއް މެންބަރުން މަގާމުން ވަކިކުރަން ނިންމާފައި ވަނީ ނުފޫޒަށް ލެނބުމާއި ސުލޫކީ މައްސަލަތަކަކާ ގުޅިގެން ކަމަށް މިނިވަން މުއައްސަސާތަކާ ބެހޭ ކޮމިޓީން މިއަދު ބުނެފި އެވެ.

އެ ކޮމިޓީން ވަނީ އޭސީސީގެ ނައިބު ރައީސް އަބްދުލް ސަލާމާއި މެންބަރު ތޯހާ މުހައްމަދާއި އީސީގެ ނައިބު ރައީސް އަލީ ނަޝާތާއި މެންބަރު މުހައްމަދު އާސިފާއި މެންބަރު ޑރ. މުހައްމަދު ޒާހިރު އަދި ސީއެސްސީގެ ރައީސް މުހައްމަދު ނާސިހާ ގުޅޭ ގޮތުން ހުށަހެޅި މައްސަލަތަކެއް ބަލަން ނިންމައިފަ އެވެ.

އެކަން މަޖިލީހުގެ މިއަދުގެ ޖަލްސާގައި އިއުލާން ކުރައްވަމުން މަޖިލިހުގެ އަމީންއާންމު ފާތިމަތު ނިއުޝާ ވިދާޅުވީ އޭސީސީގެ ގާނޫނުގެ 17 ވަނަ މާއްދާގެ (ހ) ގައި އެ ކޮމިޝަންގެ ވާޖިބުތައް އަދާކުރުމުގައި ބިރަކަށް ނުވަތަ ނުފޫޒަކަށް ލެނބިގެން ނުވާނެ ކަމަށް ބަޔާން ކޮށްފައިވާ ކަމަށެވެ. އެ މާއްދާގެ (ށ) ގައި އެއްވެސް މައްސަލައެއް ނިންމުމުގައި ނުވަތަ ސިޔާސަތެއް ކަނޑައެޅުމުގައި އަމިއްލަ މަސްލަހަތެއް ހާސިލް ކޮށްގެން ނުވާނެ ކަމަށް ބުނެފައިވާކަން އޭނާ ފާހަގަކުރެއްވި އެވެ.

އެ ދެ މާއްދާއާ ހިލާފަށް މެމްބަރަކު އަމަލު ކުރުމަކީ މެމްބަރު ކަމުން ވަކިކުރެވޭނެ ހާލަތެއް ކަމަށް ގާނޫނުގައި ބުނާއިރު، ސަލާމާއި ތޯހާ އެ މާއްދާތަކާ ހިލާފަށް އެތައް ކަމެއް ކުރައްވާފައިވާ ކަމަށް ތުހުމަތުކޮށް، މިނިވަން މުއައްސަސާތަކާ ބެހޭ ކޮމިޓީ އަށް ދެ މައްސަލައެއް ލިބިފައިވާ ކަމަށް އަމީންއާންމު ވިދާޅުވި އެވެ.

އީސީ އާއި ސީއެސްސީގެ މެމްބަރުން ވަކި ކުރުމާ ގުޅޭ ގޮތުން އެ ކޮމިޓީން ފޮނުވި ސިޓީ އިއުލާން ކުރައްވަމުން އަމީންއާންމު ވިދާޅުވީ، ސުލޫކީ ހަމަތަކާ މެންބަރުން ހިލާފުވެއްޖެ ނަމަ އެ މެންބަރަކު މަގާމުގައި ހުރުން އެކަށީގެން ނުވާ ކަމަށް ބަލައި މަގާމުން ވަކިކުރެވިދާނެ ކަމަށް އެ ދެ މުއައްސަސާއާ ގުޅޭ ގާނޫނުތަކުގައި ބުނާ ކަމަށެވެ.

އެހެންވެ، އެ ކަންކަމަށް ރިއާޔަތްކޮށް، ނަޝާތާއި އާސިފާއި ޑރ. މުހައްމަދު ޒާހިރު އަދި ސީއެސްސީގެ ނާސިހުއާ ގުޅޭ ގޮތުން އެފަދަ މައްސަލަތަކެއް ކޮމިޓީ އަށް ލިބިފައިވާ ކަމަށް އަމީންއާންމު ވިދާޅުވި އެވެ.

އެކަން މަޖިލީހުގެ ތަޅުމުގައި އިއުލާން ކުރެއްވުމުން، ރިޔާސަތުން މަޖިލީހުގެ ރައީސް އަބްދުއްރަހީމް އަބްދުﷲ ވަނީ ގޮތެއް ކަނޑައަޅަން މިނިވަން މުއައްސަސާތަކާ ބެހޭ ކޮމިޓީ އަށް ފޮނުއްވައިފަ އެވެ.