އަށް އަހަރު ވަންދެން އޮންނާނީ މޮޅުވެފަ އަދި ހާސްވާކަށް ނުޖެހޭ: ގާޑިއޯލާ

މެންޗެސްޓާ (ނޮވެމްބަރު 24) - ޖެހިޖެހިގެން ފަސްވަނަ މެޗުން މެންޗެސްތާ ސިޓީ ބަލިވި ނަމަވެސް އެކަމާ މާ ބޮޑަށް ހާސްވާން ނުޖެހޭ ކަމަށް ކޯޗު ޕެޕް ގާޑިއޯލާ ބުނެފި އެވެ.

އަމިއްލަ ދަނޑުގައި ޓޮޓެންހަމް ހޮޓްސްޕާއާ ވާދަކޮށް ރޭ ސިޓީ ބަލިވީ 4-0 އިންނެވެ. ފުރަތަމަ ހާފުގައި ޖޭމްސް މެޑިސަން ޓޮޓެންހަމަށް ދެ ގޯލުގެ ލީޑެއް ހޯދައިދިން އިރު، ފަހު ހާފުގައި ޓޮޓެންހަމަށް ލަނޑުތައް ޖަހައިދިނީ ޕެޑްރޯ ޕޯރޯ އާއި ބްރޭނަން ޖޯންސަން އެވެ.

ސިޓީން ވަނީ ލީގު ޗެމްޕިއަންކަން އަށް އަހަރު ހޯދައިފަ އެވެ. ލީގު ކާމިޔާބު ކުރާނެ ކަމަށް ބެލެވޭ ފޭވަރިޓްގެ ލިސްޓުން ސިޓީ މި ވަގަުތު ވަނީ ކަޓައިފަ އެވެ. ލީގު ކާމިޔާބު ނުކުރެވޭނަމަ ޗެމްޕިއަންސް ލީގުގެ ޖާގައެއް ހޯދަން ސަމާލުކަން ދޭން ޖެހޭ ކަމަށް ގާޑިއޯލާ ބުންޏެވެ.

"އަހަރެމެން ވަރަށް ނާޒުކު ކޮށް މި ދަނޑިވަޅުގައި މި ތިބީ. ގޯލު ޖެހުމުގައި ވެސް މައްސަލަ އެބަ އުޅޭ، ރަނގަޅަށް ޑިފެންސެއް ނުކުރެވޭ. މީގެ ކުރިން މި ހާލަތެއް ދިމައެއް ނުވޭ އެކަމަކު މިފަދަ ކަންކަން ދިމާވާނެކަން ގަބޫލު ކުރަން ޖެހޭ،" ގާޑިއޯލާ ބުންޏެވެ.

"އަހަރެމެން ސީޒަނަށް ވުރެ ބޮޑަށް ވިސްނަން ޖެހެނީ ކުރިއަށް އޮތް މެޗަށް. އަހަރެމެން މީގެ ކުރިން މޮޅުވަމުން އައީ މޮޅުވާން ހައްގު ކުލުމެއް ކުޅެގެން. އެކަމަކު އަހަރެންގެ ކުޅުންތެރިންނަށް އަބަދުވެސް އިތުބާރު ކުރަން. ދިހަވަރަކަށް ސީޒަން ވަންދެން ކާމިޔާބީތައް މެދުނުކެނޑި ތަކުރާރު ކުރެވޭނެ ޓީމެއް ދުނިޔޭގަ ނޯންނާނެ."

މިއީ 58 މެޗަށް ފަހު ސިޓީގެ އަމިއްލަ ދަނޑުގައި އެޓީމު ބަލިވި ފުރަތަމަ ފަހަރެވެ. މި މެޗުގެ ކުރިން އެޓީމު ބަލިވި ހަތަރު މެޗު ވެސް ކުޅުނީ ރަށުން ބޭރުގަ އެވެ. އެގޮތުން އޮކްޓޫބަރު މަހުގެ ފަހު ދުވަހު ޓޮޓެންހަމް އަތުން 2-1 އިން ބަލިވެގެން ވަނީ ލީގް ކަޕުން ކަޓައިފަ އެވެ. އެއަށް ފަހު ބޯންމަތާ ވާދަކޮށް 2-1 އިން ލީގުގެގައި ފުރަތަމަ ފަހަރަށް ބަލިވި އިރު، ޗެމްޕިއަންސް ލީގުގައި ސްޕޯޓިން އަތުން ވަނީ 4-1 އިން ބަލިވެފަ އެވެ. އަދި އިންޓަނޭޝަނަލް ބްރޭކަށް މެދުކަނޑާލުމުގެ ކުރިން ބްރައިޓަން އަތުން ވެސް ވަނީ ލީގުގައި 2-1 އިން ބަލިވެފަ އެވެ.

ސިޓީ އަށް ކުރިއަށް އޮތީ ޗެމްޕިއަންސް ލީގުގައި އަމިއްލަ ދަނޑުގައި ފެއިނޫޑާ ދެކޮޅަށް ކުޅޭ މެޗެވެ. މި މެޗު ކުޅޭނީ އަންގާރަ ދުވަހުގެ ރެއެވެ. އެއަށް ފަހު އަންނަ އާދިއްތަ ދުވަހުގެ ރޭ ރަށުން ބޭރުގައި ލިވަޕޫލާ ދެކޮޅަށް ނުކުންނާނެ އެވެ.

ބައްޔާ އެކު ވެސް ސިޓީ މިވަގުތު އޮތީ ލީގުގެ ދެވަނައިގަ އެވެ. ސިޓީ އަށް ވަނީ 12 މެޗުން 23 ޕޮއިންތް ލިބިފަ އެވެ. އެއްވަނައިގައި އޮތީ 11 މެޗުން 28 ޕޮއިންޓް ހޯދާފައިވާ ލިވަޕޫލެވެ. ލިވަޕޫލް މިރޭ ރަށުން ބޭރުގައި ސައުތެމްޓަންއާ ދެކޮޅަށް ނުކުންނާނެ އެވެ.

ލީގުގެ ތިންވަނައިގައި އޮތް ޗެލްސީ އާއި ހަތަރުވަނައިގައި އޮތް އާސެނަލް އަދި ފަސްވަނައިގައި އޮތް ބްރައިޓަން އަށް ވެސް ވަނީ 22 ޕޮއިންޓް ލިބިފަ އެވެ. ޓޮޓެންހަމް އޮތީ 19 ޕޮއިންޓާ އެކު ހަވަނައިގަ އެވެ. ނޮޓިންހަމް ފޮރެސްޓާއި އެސްޓަން ވިލާ އަށް ވެސް ވަނީ 19 ޕޮއިންޓް ލިބިފަ އެވެ.

ޗެލްސީން ވަނީ ރޭ 2-1 އިން ލެސްޓަ ސިޓީ ބަލި ކޮށްފަ އެވެ. އާސެނަލް އިން 3-0 އިން ފޮރެސްޓް ބަލި ކުރި އިރު، ބްރައިޓަން ވަނީ އެކަކު މަދުކޮށް ކުޅެގެން 2-1 އިން ބޯންމަތު ބަލިކޮށްފަ އެވެ.