ޔަމާލް ގެންދަން ޕީއެސްޖީން 260 މިލިއަން ޑޮލަރުގެ ހުށަހެޅުމެއް

ބާސެލޯނާ (ނޮވެމްބަރު 20) – ބާސެލޯނާގެ ޒުވާން ފޯވާޑް ލަމީން ޔަމާލް ގެންދަން، މިނިދިޔަ ހޫނު މޫސުމުގެ ޓްރާންސްފާ ޕީރިއަޑްގައި ޕީއެސްޖީން 260 މިލިއަން ޑޮލަރުގެ ޕެކޭޖެއް ހުށަހެޅި ކަމުގެ އިޝާރާތެއް ބާސެލޯނާގެ އޮފިޝަލަކު ދީފި އެވެ.

ބާސާގެ ރައީސް ޔޮއާން ލަޕޯޓާ، މީގެ ކުރިން ވެސް ވިދާޅުވެފައި ވަނީ ޔަމާލް ގެންދަން އެހެން ކްލަބަކުން ބޮޑު ހުށަހެޅުމެއް ލިބުނު ކަމަށެވެ. އެކަމަކު އެ ހުށަހެޅުމާ މެދު އޭނާ އެއްގޮތަކަށް ވެސް ނުވިސްނާ ކަމަށް ލަޕޯޓާ ވިދާޅުވެފައި ވެ އެވެ. އެކަމަކު އެއީ ކޮން ކްލަބަކުން ކަމެއް އޭނާ އޭރު ވިދާޅެއް ނުވެ އެވެ.

ލަޕޯޓާ އަށް ލަފާ ދޭ ބާސާގެ ސްޕޯޓްސް ކޮމިޝަންގެ މެންބަރު އެންރިކް މާސިޕް ބުނީ އެ ހުށަހެޅުން އައީ ފްރާންސުން ކަމަށެވެ. ފްރާންސްގެ ކޮން ކްލަބެއް ކަމެއް އޭނާ ވެސް ނުބުނެ އެވެ.

މިދިޔަ ސީޒަނަށް ފަހު ކިލިޔަން އެމްބާޕޭ، ޕީއެސްޖީ ދޫކޮށްލުމުން އޭނާގެ މަގާމަށް އެ ފެންވަރުގެ އެހެން ކުޅުންތެރިޔެއް ގެނައުމަށް ޕީއެސްޖީން މަސައްކަތް ކުރި އެވެ.

އެ ކްލަބަކީ ޕީއެސްޖީ ނަމަ އެމްބާޕޭ މަގާމު އެ ފޫބައްދަން އެންމެ ރަނގަޅު ކުޅުންތެރިޔާ ކަމަށް ނޫސްވެރިޔާ ފާހަގަ ކުރުމުން ސުވާލު މާސިޕް ބުނީ ފައިސާ ހުރި ނަމަ ކޮންމެ ކުޅުންތެރިޔަކު ސޮއި ކުރުވަން ވެސް އުޅެވިދާނެ ކަމަށެވެ.

އޭނާ ބުނީ ޔަމާލް އަކީ މިވަގުތު ދުނިޔޭގައި ހުރި އެންމެ މޮޅު ކުޅުންތެރިޔާ ކަމަށް ބާސާއިން ގަބޫލު ކުރާ ކަމަށެވެ.