އޮލްމޯ ޓީމުގައި މަޑުކުރުވަން ބާސާއިން މަރަށް ތެޅެނީ!

ފައިނޭންޝިއަލް ފެއާޕްލޭގެ މިންގަނޑަށް ވުރެ ބާސެލޯނާގެ ހަރަދުތައް ބޮޑުވެފައި ވުމުން ޑެނީ އޮލްމޯ އާއި ޕައު ވިކްޓާ ބާސާލޯނާ އަތުން ދޫވެދާނެކަމުގެ ބިރު ހީވެއްޖެ އެވެ.

ރެޑްބުލް ލައިޕްޒިގުން މި ސީޒަނުގައި ބާސާއާ ގުޅުނު އޮލްމޯ ރަޖިސްޓަރީ ކުރުމުގެ ހުއްދަ ބާސާ އަށް ދިނީ ހަ މަހުގެ މުއްދަތަކަށެވެ. އެ ހުއްދަ ދިނީ އޭނާގެ މުސާރައިގެ އިތުރުން ޑިފެންޑަރު ކްރިސްޓަންސެންގެ މުސާރައިން ވެސް ބޮޑު ބައެއް ކުޑަކުރުމަށް ފަހު ލިބޭ އާމުދަނީ އާއި ހަރަދާ އެއްވަރު ކުރުމަށެވެ.

ބާސާ އަށް ކުރިމަތިވެގެން އުޅޭ މައްސަލައަކީ ޓީމަށް ލިބޭ އާމުދަނީއަށް ވުރެ ބޮޑަށް ކުޅުންތެރިންނަށް ކުރާ ހަރަދު ބޮޑުވުމެވެ. އޮލްމޯއާ އެކު ހެދި ހަ މަހުގެ ކޮންޓްރެކްޓް ބާސާ އަށް އިތުރު ކުރެވޭނީ، ކްލަބަށް އިތުރަށް ފައިސާ ވައްދައިގެންނެވެ.

ބާސެލޯނާގެ މީޑީއާތަކުން ބުނެފައި ވަނީ އޮލްމޯ އާއި ވިކްޓާ ޓީމުގައި ބަހައްޓަން ބޭނުންވާ ފައިސާ ކްލަބަށް ލިބޭނެ ގޮތް ހަމަޖެހިފައިވާ ކަމަށެވެ.

މިހާރު އިމާރާތް ކުރަމުންދާ ކޭމްޕް ނޯ ސްޓޭޑިއަމްގެ ވީއައިޕީ ބޮކްސްތަކެއް 100 މިލިއަން ޑޮލަރަށް ގަންނަން އަރަބި މަހުޖަނުންތަކަކާ އެކު ބާސާ އަށް އެއްބަސްވުމަކަށް އާދެވިފައިވާ ކަމަށްވެ އެވެ. ބާސާގެ ރައީސް ޔޮއާން ލަޕޯޓާ، އަރަބި ވިޔަފާރިވެރިންނާ އެކު އެ ޑީލަށް މަސައްކަތް ކުރަމުންދާތާ ދުވަސްތަކެއް ވެފައިވާ ކަމަށް ރިޕޯޓްތައް ބުނެ އެވެ.

އެކަމަކު އަދި މިހާތަނަށް އެ ފައިސާ ބާސާގެ އެކައުންޓަށް ވަދެފައެއް ނުވެ އެވެ.

މި ސީޒަން ނިމެންދެން އޮލްމޯ ޓީމުގައި ބެހެއްޓުމުގެ ފުރުސަތު ދިނުމަށް ބާސާއިން ވަނީ ލަލީގާގެ ކިބައިން އެދިފަ އެވެ. ލަލީގާއިން އެކަން ބަލައެއް ނުގަތެވެ. އެ ނިންމުން އިސްތިއުނާފު ކުރަން ބާސާއިން ކޯޓަށް ދިއުމުން ޝަރީއަތުން ވެސް އެ ކްލަބަށް ކާމިޔާބެއް ނުވި އެވެ.

ބާސާ އަށް ފައިސާ ހަމަނުޖެހިއްޖެނަމަ އޮލްމޯގެ ކޮންޓްރެކްޓް ޖެނުއަރީ އެކަކަށް ހަމަވާނެ އެވެ. އެހާހިސާބުން ފްރީ ޓްރާންސްފާގައި އެހެން ކްލަބަށް އޭނާ ގެންދިއުމުގެ ފުރުސަތު ލިބޭނެ އެވެ. ޕީއެސްޖީން ވަނީ އޭނާ ގެންދިއުމަށް ޝައުގުވެރިކަން ފާޅުކޮށްފަ އެވެ.