އީސްޕޯޓް ޗެމްޕިއަންޝިޕަށް ރާއްޖޭގެ ޓީމް ދިޔައީ ބިއޯންޑްގައި

ސައުދީ އަރަބިއާގެ ވެރިރަށް ރިޔާދުގައި މިހާރު ކުރިއަށްދާ ވޯލްޑް އީސްޕޯޓްސް ޗެމްޕިއަންޝިޕަށް ރާއްޖޭގެ ގައުމީ ޓީމް ދަތުރުކުރީ ބިއޯންޑް އެއާލައިނުގަ އެވެ.

އެ އެއާލައިނުން ބުނީ ދުނިޔޭގެ އީސްޕޯޓްސް ޗެމްޕިއަންޝިޕުގެ ރާއްޖެ ތަމްސީލުކުރާ ޓީމަށް ސަޕޯޓުކުރުމުގެ ގޮތުން ސައުދީއަށް ދިއުމާއި އެނބުރި އައުން އެ އެއާލައިނުން ހަމަޖައްސާފައިވާ ކަމަށެވެ. އަދި މިއީ އެ އެއާލައިނުން ރާއްޖޭގެ އެކި ދާއިރާތަކުން ޒުވާނުންނަށް އެއްބާރުލުންދީ، ޒުވާނުންގެ ހުނަރު ތަރައްގީ ކުރުމުގައި ބައިވެރިވުމަށް ފަށާފައިވާ މަސައްކަތުގެ ދަށުން ހަމަޖައްސައިދިން ހިދުމަތެއްގެ ގޮތުގައި ބިއޯންޑް އެއާލައިނުން ފާހަގަކުރި އެވެ.

ވޯލްޑް އީސްޕޯޓްސް ޗެމްޕިއަންޝިޕަކީ ދުނިޔޭގެ އެކި ގައުމުތަކާއި ވާދަކޮށް، ބޭރު ދުނިޔޭގައި ދިވެހިންގެ ގޭމިން ހުނަރުތައް ދައްކާލުމަށް ލިބޭނެ ބޮޑު ފުރުސަތެކެވެ.

ބިއޯންޑުގެ ސީއީއޯ ޓެރޯ ޓަސްކިލާ ވިދާޅުވީ ބޭރު ދުނިޔޭގައި ތަމްސީލުކުރަން ދާ ރާއްޖޭގެ ޓީމަކަށް ދަތުރުގެ ކަންތައްތައް އެންމެ ފުރިހަމައަށް ހަމަޖައްސައި ދިނުމަކީ އެ އެއާލައިނަށް ލިބުނު ފަހުރެއް ކަމަށެވެ. އަދި އެ އެއާލައިނުން ދިވެހި ޒުވާނުން ބާރުވެރިކުރުމަށް ކުރެވެން ހުރި އެކި މަސައްކަތްތަކުގައި އެއްބާރުލުން ދޭނެ ކަމަށް ވިދާޅުވި އެވެ.

ދުނިޔޭގެ އީސްޕޯޓްސް ޗެމްޕިއަންޝިޕުގައި ވާދަކުރާ ދިވެހި ޓީމު އެނބުރި ރާއްޖެ އައުމަށް ހަމަޖެހިފައި ވަނީ މި މަހުގެ 26 ވަނަ ދުވަހު ބިއޯންޑް އެއާލައިނުންނެވެ.

ރާއްޖޭގެ ފުރަތަމަ ލަގްޒަރީ އެއާލައިން ބިއޯންޑަކީ ސައުދީގެ ރިޔާޒަށް މިހާރު ވެސް ޝެޑިއުލް ދަތުރުތަކެއް ކުރަމުންދާ އެއާލައިނެކެވެ. ހަމައެކަނި ބިޒްނަސް ކްލާސްގެ ސީޓުތައް ހިމެނޭ މި އެއާލައިނުން ސުވިޓްޒަލޭންޑުގެ ޒޫރިކް އާއި ޖަރުމަނުގެ މިއުނިކް އާއި އިޓަލީގެ މިލާންއަށް އަދި ޔޫއޭއީއަށް ދަނީ ދަތުރުތައް ކުރަމުންނެވެ.