ބިއޯންޑް އަށް އަހަރެއް، ގޮންޖެހުންތަކާ އެކު ވެސް ބޮޑެތި ކާމިޔާބީތަކެއް

މުޅިން އާ ކޮންސެޕްޓަކާ އެކު ލަގްޒަރީ އެއާލައިން "ބިއޯންޑް" ހިދުމަތަށް ނުކުތްތާ މި މަހު އަހަރެއް ފުރުނުއިރު އެއީ ކާމިޔާބީއާ އެކު ކުރިއަށް ގެންދާ އެއާލައިނަކަށް ވަނީ ވެފަ އެވެ. މިދިޔަ އަހަރުގެ އޮކްޓޫބަރު މަހު ބިއޯންޑް އެއާލައިން ތައާރަފުކުރީ ދުނިޔޭގެ ފުރަތަމަ ޕްރިމިއަމް ލެޝާ އެއާލައިންގެ ގޮތުގަ އެވެ. އެ ޝަރަފު އަދިވެސް އަންނަނީ ދަމަހައްޓަމުންނެވެ.

ސިމްޑީ ގްރޫޕުން ޔޫއޭއީގެ އަރަބެސްކް ކުންފުންޏާ ގުޅިގެން ތައާރަފްކުރި ބިއޯންޑްއަކީ ހަމައެކަނި ބިޒްނަސް ކްލާހުގެ ސީޓުތައް ހިމެނޭ އެއާލައިނެކެވެ. މި އެއާލައިނުން ދަތުރުކުރާ ފަސިންޖަރުންނަށް އެންމެ ފުރިހަމަ ލަގްޒަރީ ތަޖުރިބާ ކަށަވަރު ކުރުމަށް ފްލައިޓުގެ ސީޓުތަކުން ފެށިގެން، ދަތުރުމަތީގައި މުނިފޫހިފިލުވުމަށް ބޭނުންވާނެ ވަސީލަތްތައް ހިޔާރު ކުރުމުގައި ވެސް ހާއްސަ އިސްކަމެއް ދެ އެވެ.

ސީޓުތައް ފަރުމާ ކޮށްފައި ވަނީ ފެރާރީ ކާރުތަކުގައި ބޭނުންކޮށްފައިވާ އަރާމު ލެދާ އިންނެވެ. ފްލައިޓް އުދުހެމުން ދާއިރު އެ ސީޓުތަކުގައި އޮށޯވެ އޮންނަން އަރާމު ވެފައި ފަސޭހަ އެވެ. ސީޓުގެ ވަށައިގެން ލައިޓްވެއިޓް ކާބަން ފައިބާ ލެދާ ބޭނުންކޮށްފައި ވާއިރު، ސްކްރީނެއްގެ ގޮތުގައި ބަހައްޓާފައި ވަނީ އައިޕެޑް ޕްރޯ އެވެ.

އެންމެ ފަހުގެ ޓެކްނޮލޮޖީގެ އެހީގައި ރާއްޖެ ދުނިޔޭގެ އެކި ގައުމުތަކާ ގުޅައިލަދިން މި އެއާލައިންގެ ހިދުމަތް ފެށީ އޭ319 މަރުކާގެ 44 ފަސިންޖަރުންގެ ކެޕޭސިޓީ ހުރި އެއާކްރާފްޓަކާ އެކު އެވެ. ރާއްޖެ އާއި ޖަރުމަނުގެ މިއުނިކާއި ސުވިޓްޒަލެންޑްގެ ޒިއުރިކް އަދި ސައުދީގެ ރިޔާޒުން ދަތުރުތައް ފެށި މި އެއާލައިން މިހާރު އަންނަނީ އިޓަލީގެ މިލާން އަދި ދުބާއީއާ ދެމެދު ވެސް ދަތުރުތައް ކުރަމުންނެވެ.

ޕްރިމިއަމް މާކެޓުގައި ފާއިތުވި އަހަރު، ޝެޑިއުލްޑް ދަތުރުތަކުގެ އިތުރުން ޗާޓަޑް ދަތުރުތަކަށް ވެސް ބިއޯންޑްގެ ފްލައިޓަށް ޑިމާންޑު ލިބި، އެއާލައިނުގެ އަމާޒަށް ވަނީ ވާސިލްވެފަ އެވެ.

މި އެއާލައިންގެ ސީއީއޯ ޓެރޯ ޓަސްކިލާ "ބިއޯންޑް"ގެ ފުރަތަމަ އަހަރު ކާމިޔާބު އަހަރެއްގެ ގޮތުގައި ސިފަކުރެއްވީ މިހެންވެ އެވެ.

"އަޅުގަނޑުމެންނަށް ސެޓު ކުރެވުނު ގޯލްތަކަށް ވާސިލް ވެވުނު. އެއް މާކެޓު ދަށް ވެލާއިރަށް އަނެއް މާކެޓު ޕިކްއަޕް ކުރޭ. އެހެންވެ، ދަތުރުތައް ބޭނުންވާ ވަރަށް ކުރެވުނު،" ޓެރޯ ވިދާޅުވި އެވެ.

އޭނާ ވިދާޅުވީ ޕްރިމިއަމް އެއާލައިނަކީ ދުނިޔޭގައި އާ ކޮންސެޕްޓަކަށް ވުމުން ގޮންޖެހުންތަކެއް ދިމާވި ކަމަށެވެ. އެކަމަކު ދާއިރާގެ އެންމެން ގުޅިގެން، ގިނަ ކަންތައްތަކެއް ދަސްކުރަމުން، ކުރިއަށް ދެވެން ހުރި ގޮތްތައް ހޯދަމުން އަންނަ ކަމަށް ވިދާޅުވި އެވެ.

ޓެރޯ ވީދާޅުވީ، އަމާޒަކީ ކުރިއަށް އޮތް ހަތަރު އަހަރު ދުވަހުގެ ތެރޭގައި 27 އެއާކްރާފްޓް އޮޕަރޭޝަނަށް ގެނެސް 54 މަންޒިލަކަށް ދަތުރުތައް ފަށަން ކަމަށެވެ.

"އަންނަ އަހަރުގެ ދެވަނަ ހާފުގައި އަޅުގަނޑުމެން އިތުރު ހަތަރު ފްލައިޓު އޮޕަރޭޝަނަށް ގެންނާނަން. މީގެ ކޮންމެ ބޯޓަކާ އެކު ތިން-3-4 ޑެސްޓިނޭޝަނަށް ދަތުރުތައް ފެށޭނެ،" އޭނާ ވިދާޅުވި އެވެ.

"ބިއޯންޑް"ގެ އަހަރީ ދުވަސް ފާހަގަކުރުމަށް މިދިޔަ މަހު އެ އެއާލައިންގެ އޮޕަރޭޝަނަށް ގެނައި ދެ ވަނަ ބޯޓު ވަނީ ރަސްމީކޮށް ލޯންޗުކޮށްފަ އެވެ. މި ބޯޓު މިވަގުތު ބޭނުން ކުރަމުން އަންނަނީ ރިޔާޒާއި ރާއްޖެއާ ދެމެދުގެ ދަތުރުތަކަށެވެ. މިއީ އޮފް ސީޒަނަށް ވުމުން ޗާޓަރު ކުރުމަށް ވެސް މި އެއާކްރާފްޓު އަންނަނީ ދޫކުރަމުންނެވެ.

އޭ 321 މަރުކާގެ 66 މީހުންގެ ޖާގައިގެ މި ބޯޓުގައި "ބިއޯންޑް"ގެ ފުރަތަމަ އެއާކްރާފްޓުގެ ހުރިހާ ފީޗާތަކެއް ވެސް ހިމެނެ އެވެ. މި ބޯޓާ އެކު ބިއޯންޑް އިން މިހާރު އަންނަނީ ޗައިނާ އާއި އިންޑިއާ އަދި ސައުދީގެ ޖިއްދާ އަށް ދަތުރުތައް ފެށުމަށް މަސައްކަތް ކުރަމުންނެވެ.