ކުޑަކުދިންނަށް އޮތީ ބަނަ ކުރިމަގެއް: ޔުނިސެފް

ޑިމޮގްރަފިކް ބަދަލުތަކާއި މޫސުމަށް އަންނަ ބަދަލުތަކާއި ޓެކްނޮލޮޖީއަށް އަންނަ ބަދަލުތަކުގެ ސަބަބުން 21 ވަނަ ގަރުނުގެ މެދުތެރޭގައި ޒުވާނުންގެ މުސްތަގުބަލް ވަރަށް ބަނަވާނެ ކަމުގެ ބިރު އެބައޮތް ކަމަށް އދ.ގެ ކުޑަކުދިންނާ ބެހޭ އިދާރާއިން އަންގާރަ ދުވަހު ނެރުނު އަހަރީ ރިޕޯޓުގައި ބުނެފި އެވެ.

ޔުނިސެފްގެ އެގްޒެކެޓިވް ޑިރެކްޓަރު ކެތަރިން ރަސެލް އެ އެޖެންސީގެ އަހަރީ ރިޕޯޓާ އެކު ނެރުއްވި ބަޔާނުގައި ވިދާޅުވީ މޫސުމަށް އަންނަ ލޮޅުންތަކުން ފެށިގެން އޮންލައިން ނުރައްކާތަކާ ހަމައަށް ކުޑަކުދިންނަށް އެކި ކާރިސާތަކަކާ ކުރިމަތިލާން ޖެހިފައިވާ ކަމަށެވެ. އަދި ކުރިއަށް އޮތް އަހަރުތަކުގައި އެ ކަންކަން އިތުރަށް ގޯސްވާނެ ކަމަށް ވިދާޅުވި އެވެ.

"ވަކިން ހާއްސަކޮށް، އަންހެން ކުދިންނަށް އެތައް ޒަމާނަކުން ހޯދައިދެވެން ފެށި ކުރިއެރުން ގެއްލި ދިއުމުގެ ނުރައްކާ އެބަ އޮތް."

މިއަހަރު ޔުނިސެފުން ވަނީ 2050 ވަނަ އަހަރާ ހަމައަށް ފާހަގަކުރެވޭ މައިގަނޑު ތިން ނުރައްކަލެއް ފާހަގަކޮށް، ސިޔާސަތުތައް ކަނޑައަޅާ ފަރާތްތަކުން އެ ކަންކަމާ ގުޅޭ ގޮތުން އަވަހަށް ފިޔަވަޅު ނާޅައިފި ނަމަ ނުރައްކާ ބޮޑުވެދާނެ ކަމުގެ އިންޒާރު ދީފަ އެވެ.

ފުރަތަމަ ނުރައްކަލަކީ އާބާދީއަށް އަންނަމުންދާ ބަދަލެވެ. އާބާދީގައި ކުޑަކުދިންގެ އަދަދު 2.3 ބިލިއަނުގައި ހުންނާނެ ކަމަށް ބެލެވިފައި ވިޔަސް، އެއީ 10 ބިލިއަނުގެ އާބާދީއެއްގައި، އުމުރުން ދުވަސްވީ ގިނަ ބަޔަކާ އެކު ވަރަށް ކުޑަ ހިއްސާއަކަށް ވާނެ ކަމަށް ވަނީ ބުނެފަ އެވެ.

ހުރިހާ ސަރަޙައްދެއްގައި ވެސް ކުޑަކުދިންގެ ނިސްބަތް ދަށަށް ދާއިރު، ފަގީރު ބައެއް ސަރަޙައްދުތަކުގައި، ހާއްސަކޮށް ސަބް ސަހާރާ އެފްރިކާގައި އެކުދިންގެ އަދަދު އެތައް ގުނައެއް އިތުރުވެގެންދާނެ ކަމަށް ވަނީ ލަފާކޮށްފަ އެވެ.

މިކަމުގެ ސަބަބުން އިގްތިސާދީ ކުރިއެރުން ހޯދިދާނެ ކަމަށާއި ނަމަވެސް އާ ޒުވާން އާބާދީއަށް ފެންވަރު ރަނގަޅު ތަޢުލީމާއި ސިއްހީ ހިދުމަތާއި ވަޒީފާގެ ފުރުސަތު ލިބިގެން ނޫނީ އެ ކާމިޔާބީ ހާސިލްނުވާނެ ކަމަށް ޔުނިސެފުން ބުންޏެވެ.

ކުރިއަރާފައިވާ ބައެއް ގައުމުތަކުގައި 2050 ވަނަ އަހަރާ ހަމައަށް ކުޑަކުދިންނަކީ އާބާދީގެ 10 ޕަސެންޓަށް ވުރެ ވެސް ކުޑަ އަދަދަކަށް ވާނެ ކަމަށާއި އެކަމުގެ ސަބަބުން އެ ކުދިންނަށް ދެވޭ ސަމާލުކަން ކުޑަވެ އުމުރުން ދުވަސްވީ މީހުންގެ އާބާދީއަށް ފޯކަސްކުރެވިގެން ކުޑަކުދިން ހައްގުތައް ގެއްލިދާނެ ކަމަށް ވެސް ބުނެފައިވެ އެވެ.

ދެވަނަ ނުރައްކަލަކީ މޫސުމަށް އަންނަ ބަދަލުތަކެވެ.

ގްރީންހައުސް ގޭސް ބޭރުކުރުމުގެ މިހާރުގެ ޓްރެންޑްތައް ބަދަލުނުވެ އޮވެއްޖެ ނަމަ، 2000 ވަނަ އަހަރާ އަޅާބަލާއިރު 2050 ވަނަ އަހަރު، ކުޑަކުދިންނަށް މިހާރަށްވުރެ އަށް ގުނަ ހޫނު ގަދަވާނެ ކަމަށާއި ފެން ބޮޑުވުމުގެ ހާދިސާތައް ތިން ގުނަ އިތުރުވެ އަދި އަލިފާނުގެ ހާދިސާތައް 1.7 ގުނަ އިތުރުވެދާނެ ކަމަށް ޔުނިސެފުން ވަނީ ލަފާކޮށްފަ އެވެ.

އާ ޓެކްނޮލޮޖީ، ހާއްސަކޮށް އާޓިފިޝަލް އިންޓެލިޖެންސަކީ އާ އުފެއްދުންތަކާއި ކުރިއެރުމަށް މުހިންމު ޓެކްނޮލޮޖީއެއް ނަމަވެސް މުއްސަނދި ގައުމުތަކާއި ފަގީރު ގައުމުތަކާ ދެމެދު މިހާރު ހުރި ފަރަގު މިހާރަށް ވުރެ ވެސް މާ ބޮޑުވެދާނެ ކަމަށް ވެސް ބުނެފައިވެ އެވެ.

ކުރިއަރާފައިވާ ގައުމުތަކުގެ 95 ޕަސެންޓް މީހުންނަށް އިންޓަނެޓްގެ ޚިދުމަތް ލިބެމުންދާއިރު، އެންމެ ކުޑަކޮށް ތަރައްގީވެފައިވާ ގައުމުތަކުގައި އިންޓަނެޓްގެ ހިދުމަތް ލިބެނީ އެންމެ 26 ޕަސެންޓަށެވެ.

"މި ގައުމުތަކުގައި ކުޑަކުދިންނަށް، ހާއްސަކޮށް ފަގީރު ގޭބިސީތަކުގައި ދިރިއުޅޭ ކުދިންނަށް ހުރި ހުރަސްތައް ނައްތާނުލެވިއްޖެ ނަމަ މިހާރުވެސް ނިކަމެތި ހާލުގައި ތިބި ޖީލެއް އިތުރަށް ނިކަމެތިވެގެން ހިނގައިދާނެ،" ޔުނިސެފުން ބުންޏެވެ.

"ކަނެކްޓިވިޓީ" ގައި ވެސް ނުރައްކާތަކެއް ހިމެނޭ ކަމަސް ރިޕޯޓްގައިވެ އެވެ. އާ ޓެކްނޮލޮޖީތައް ހުއްޓުމެއް ނެތި ފުޅާވަމުން ދާއިރު އެކަމުގެ ސަބަބުން ކުޑަކުދިންނަށާއި އެ ކުދިންގެ އަމިއްލަ ޑޭޓާއަށް ނުރައްކާވެ، އޮންލައިން ޝިކާރަވެރިންގެ ނުރައްކާ ކުޑަކުދިންނަށް ކުރިމަތިވާ ކަމަށް ވެސް ފާހަގަކޮށްފައިވެ އެވެ.

ޔުނިސެފްގެ ރިސާޗް ޑިވިޝަންގެ ޑެޕިއުޓީ ޑިރެކްޓަރު ސެސިލް އެޕްޓެލް އޭއެފްޕީއަށް ވިދާޅުވީ މުސްތަގުބަލުގެ ކުދިންނަށް ވަރަށް ގިނަ ނުރައްކާތަކާ ކުރިމަތިލާން ޖެހޭނެ ކަމަށާއި ނަމަވެސް ހައްލުތައް މިއަދުގެ ޖީލުގެ އަތްމަތީގައި އެބަ އޮތް ކަމަށެވެ. -- އޭއެފްޕީ