އައިޖީއެމްއެޗުން ފަރުވާ ހޯދަން 10،000 އަށްވުރެ ގިނަ މީހުން

ފަރުވާ ހޯދަން ވެއިޓްލިސްޓުގައި މި ވަގުތު 10،000 އަށްވުރެ ގިނަ މީހުން ވެއިޓްލިސްޓު ކޮށްފައި އެބަތިބި ކަމަށް އައިޖީއެމްއެޗުން ބުނެފި އެވެ.

މައުލޫމާތު ހޯދައި ލިބިގަތުމުގެ ގާނޫނުގެ ދަށުން އެ ހޮސްޕިޓަލުން މިދިޔަ ބުރާސްފަތި ދުވަހު "މިހާރު" އަށް ހިއްސާކުރި މައުލޫމާތަށް ބަލާއިރު، ފަރުވާ ހޯދަން މިދިޔަ މަހުގެ 26 ވަނަ ދުވަހާ ހަމައަށް 10،068 މީހުން ވެއިޓްލިސްޓުކޮށްފައި ތިއްބެވެ.

ކިއު އެންމެ ބޮޑީ އީއެންޓީ ޑިޕާޓްމަންޓުގަ އެވެ. އެއީ 2،190 މީހުންނެވެ.

އީއެންޓީ ޑިޕާޓްމަންޓުގައި ފަސް ޑޮކްޓަރުންނާއި ތިން ނަރުހުން މަސައްކަތްކުރެ އެވެ.

ވެއިޓް ލިސްޓު އެންމެ ކުޑަ، އަންހެނުންގެ ބަލިތަކުގެ ޑިޕާޓްމަންޓުގައި ފަރުވާ ހޯދަން މި ވަގުތު އެއްވެސް މީހަކު ނެތް ކަމަށް އައިޖީއެމްއެޗުން ބުންޏެވެ. އެ ޑިޕާޓްމަންޓުގައި 18 ޑޮކްޓަރުންނާއި ހަތް ނަރުހުން މަސައްކަތްކުރެ އެވެ.

ވެއިޓްލިސްޓު ކުޑަކޮށް އެޕޮއިންޓްމަންޓް ސިސްޓަމް ހަރުދަނާކުރުމުގެ މަޝްވަރާތައް ކުރަމުން އަންނަ ކަމަށް އެ ހޮސްޕިޓަލުން ވަނީ ބުނެފަ އެވެ.

އައިޖީއެމްއެޗުން މިދިޔަ މަހު ބޭއްވި ޕްރެސް ކޮންފަރެންސްގައި ވެސް އިބްރާހިމް އަބްދުއްރައްޒާގު ހަލީމް ވިދާޅުވީ ކިއު ކުޑަކުރުމަށް މާލޭގެ ހަތަރު އަވަށުގައި ޖީޕީ ކްލިނިކް ހަދައި ރިފަރަލް ސިސްޓަމަށް ދާން ނިންމާފައިވާ ކަމަށެވެ. އޭރުން ސްޕެޝަލިސްޓުންނަށް ދެއްކޭނީ ޖީޕީ ކްލިނިކް މެދުވެރިކޮށް ކަމަށް އޭނާ ވިދާޅުވި އެވެ.

މެންޓަލް ހެލްތު ސެންޓަރަކީ އައިޖީއެމްއެޗުގައި އާއްމުކޮށް ދިގު ވެއިޓް ލިސްޓެއް އޮންނަ ޑިޕާޓްމަންޓެކެވެ. އެ ފަރުވާއަށް މި ވަގުތު 465 މީހުން މަޑުކޮށްގެން އެބަތިއްބެވެ.

މެންޓަލް ހެލްތު ސެންޓަރުގައި 10 ސައިކޭޓްރިސްޓުން ތިބެ އެވެ.