އިހުމާލުވެފައި އޮތް ދަރުމަވަންތަ ހޮސްޕިޓަލްގެ ހާލަތު މި ސަރުކާރުން ބަދަލުކޮށްފި: ހަލީމް

މި ސަރުކާރުން ވެރިކަމާ ހަވާލުވިއިރު ދަރުމަވަންތަ ހޮސްޕިޓަލް އޮތީ އިހުމާލުވެ، އަޅާނުލާ ދޫކޮށްލާފައި ކަމަށާއި އެ ހާލަތު މި ސަރުކާރުން ބަދަލުކޮށްފައިވާ ކަމަށް އެ ހޮސްޕިޓަލްގެ ސީއީއޯ އިބްރާހިމް އަބްދުއްރައްޒާގް ހަލީމް މިރޭ ވިދާޅުވެއްޖެ އެވެ.

ބޭނުން ކުރަން ފެށިތާ ހަ އަހަަރު ފަހުން ދަރުމަވަންތަ ހޮސްޕިޓަލް ރަސްމީކޮށް ހުޅުވުމަށް މިރޭ ބޭއްވި ރަސްމިއްޔާތުގައި ވާހަކަ ދައްކަވަމުން ހަލީމް ވިދާޅުވީ މި ވެރިކަން ފެށުނުއިރު ދަރުމަވަންތަ ހޮސްޕިޓަލްގެ ހާލަތު އޮތީ ތަސައްވުރު ކޮށްލަން ވެސް އުނދަގޫ ހާލަތެއްގައި ކަމަށެވެ.

"ތަނުގެ ފިނިހޫނުމިން ބަލަހައްޓާ ނިޒާމު ހުރީ މަރާމާތުނުކޮށް ގިނަ ދުވަސްވުމުގެ ސަބަބުން ބޭނުން ނުކުރެވޭ ހާލަތުގައި. ހޮސްޕިޓަލުގެ ހިދުމަތްތައް ދެމުން ގެންދިޔައީ އެކި ދަންފަޅިތަކުގައި އެކި ސަރަހައްދުތަކުގައި އެކި ފަންގިފިލާތަކަށް އެކި ވަގުތުތަކުގައި ފިނިހޫނުމިން ބަހައިގެން،" ހަލީމް ވިދާޅުވި އެވެ.

މި ކަމުގެ ސަބަބުން އިމާރާތުގައި ހުރި އަގުބޮޑު އެތައް ވަސީލަތެއް ހުރީ ބޭނުން ނުކުރެވޭ ހާލަތަށް ގޮސްފައި ކަމަށާއި އަދި ގިނަ ފަންގިފިލާތައް ހުރީ ބޭނުން ނުކޮށް "ހޮހޮޅައެއްގެ ގޮތުގައި ގުދަންކޮށް" ދޫކޮށްލާފައި ކަމަށް އޭނާ ވިދާޅުވި އެވެ.

ހައިބްރިޑް ކެތުލެބްގައި ހުރި މެޝިންތައް ވެސް މަރާމާތު ނުކުރުމުގެ ސަބަބުން ހުރީ ބޭނުން ނުކުރެވޭ ހާލަތުގައި ކަމަށާއި ނަމަވެސް މިހާރު އެ ހާލަތު ބަދަލުކޮށް މިހާރު ފެންނަނީ އެހެން މަންޒަރެއް ކަމަށް އޭނާ ވިދާޅުވި އެވެ.

އެގޮތުން ފިނިކުރާ ނިޒާމުގެ މައްސަލަތައް ހައްލުކޮށް، ސްޓޭންޑަޑް ޕްރޮސީޖާތަކާ އެއްގޮތަށް ހިދުމަތް ދެވޭނެ ގޮތް ހަދައި، މައްސަލަ ޖެހިފައި ހުރި މެޝިނަރީތައް ބަދަކޮށް ހައިބްރިޑް ކެތުލެބްގެ ހިދުމަތް ފަށާފައިވާ ކަން އޭނާ ފާހަގަ ކުރެއްވި އެވެ.

އޭނާ ވިދާޅުވީ ހޮސްޕިޓަލުގައި ކުރިން ބޭނުން ނުކޮށް ގުދަނަކަށް ހަދާފައި ހުރި، 17 ފްލޯއިން ފެށިގެން 22 ވަނަ ފްލޯއާ ހަމައަށް ހުރި ފްލޯތައް މިހާރު ބޭނުން ކުރަން ފަށާފައިވާ ކަމަށެވެ. އެގޮތުން 17 ވަނަ ފްލޯގައި ހަ ޑެލިވެރީ ސޫޓާއި އެންއައިސީޔޫއަކާއި 18 ވަނަ ފްލޯ އައި 19 ވަނަ ފްލޯގައި 14 ކޮޓަރީގެ އިތުރުން 21 ވަނަ ފްލޯ އިދާރީ މަސައްކަތަށް އަދި 22 ވަނަ ފްލޯގައި ފާޓިލިޓީ ސެންޓަރު ގާއިމް ކޮށްފައިވާ ކަމަށް އޭނާ ވިދާޅުވި އެވެ.

ސަރުކާރުގެ ރަސްމީ ހޮސްޕިޓަލުގެ ގޮތުގައި މިރޭ ދަރުމަވަންތަ ހޮސްޕިޓަލު ހުޅުވީ ޓާޝަރީ ގޮތުން ފުރިހަމަވާން ޖެހޭ ހުރިހާ ހިދުމަތްތަކާ އެކުގައި ކަމަށް ވެސް އޭނާ ވިދާޅުވި އެވެ.