ނެޝަނަލް ފާޓިލިޓީ ސެންޓަރާއެކު ދަރުމަވަންތަ ހޮސްޕިޓަލް ރަސްމީކޮށް ހުޅުވައިފި

ދަރުމަވަންތަ ހޮސްޕިޓަލް ބޭނުން ކުރަން ފެށިތާ ފަސް އަހަރު ފަހުން ޓާޝަރީ ފެންވަރުގައި ދަރުމަވަންތަ ހޮސްޕިޓަލް މިރޭ ރަސްމީކޮށް ހުޅުވައިފި އެވެ.

ދަރުމަވަންތަ ހޮސްޕިޓަލުގައި މިރޭ ބޭއްވި ރަސްމިއްޔާތެއްގައި މި ހޮސްޕިޓަލް ހުޅުވައިދެއްވީ ރައީސް ޑރ. މުހައްމަދު މުއިއްޒު އެވެ. މި ހޮސްޕިޓަލް މިރޭ ހުޅުވީ ދަރިމައިވުމުގެ މައްސަލަތަކަށް ފަރުވާ ދިނުމަށް ނެޝަނަލް ފާޓިލިޓީ ސެންޓަރެއް ވެސް ހިމެނޭ ގޮތަށެވެ.

ނޭޝަނަލް ފާޓިލިޓީ ސެންޓަރު ގާއިމް ކޮށްފައިވަނީ އެ ހޮސްޕިޓަލްގެ 22 ވަނަ ފްލޯގަ އެވެ.

ދަރިމައިވުމުގެ ފަރުވާ ފެށުމަށް ތައްޔާރުވެފައި ވާއިރު މި ސެންޓަރުން އައިވީއެފް ފަދަ އެންމެ ފަހުގެ ޒަމާނީ ހުރިހާ ފަރުވާއެއް ލިބޭނެ ކަމަށް އެ ހޮސްޕިޓަލުން ބުންޏެވެ. އައިޔޫއައި އާއި އެގް، ސްޕާމް އަދި އެމްބްރިއޯ ފްރީޒިންގެ ހިދުމަތް ލިބޭނެ ކަމަށް ވެސް ހޮސްޕިޓަލުން ބުންޏެވެ.

އެ ހޮސްޕިޓަލުން ބުނީ މި ސެންޓަރާއެކު، ރާއްޖޭގައި ހުރެގެން މި ފަރުވާ ހޯދުމުގެ މަގުފަހިވެ، އާއިލާތަަކަށް މާލީ އަދި ނަފްސާނީ ގޮތުން ލުއިތަކެއް ލިބިގެން ދާނެ ކަމަށެވެ.

މިރޭ ވަނީ ދަރުމަވަންތަ ހޮސްޕިޓަލުގެ 11 ވަނަ ފްލޯގައި ގާއިމްކޮށްފައިވާ އެންމެ ޒަމާނީ ފެންވަރުގެ ހައިބްރިޑް ތިއޭޓަރުގެ ބައެއް ސާމާނުތައް ބަދަލުކޮށް އަދި އެންމެ ޒަމާނީ ފެންވަރުގެ ހައިބްރިޑް ކެތުލެބް ވެސް ރަސްމީކޮށް ހުޅުވައިފަ އެވެ.

މީގެ އިތުރުން ދަރުމަވަންތަ ހޮސްޕިޓަލުގެ އިމަޖެންސީ ޔުނިޓު ވަނީ ކުޑަކުދިންނަށް ހާއްސަ އީއާރެއްގެ ގޮތުގައި ހަމަޖައްސައި އެ ހިދުމަތް ވެސް މިރޭ އިފްތިތާހުކޮށްފަ އެވެ. އަދި ކުޑަކުދިންގެ އައިސީޔޫ ވެސް ވަނީ ދަރުމަވަންތަ ހޮސްޕިޓަލުގައި ގާއިމް ކޮށްފަ އެވެ.

ކުރީގެ ރައީސް އަބްދުﷲ ޔާމީންގެ ވެރިކަމުގައި އިމާރާތްކުރި 25 ބުރީގެ ހޮސްޕިޓަލް ބޭނުންކުރަން ފެށީ އެމްޑީޕީގެ ވެރިކަމުގައި 2019 ވަނަ އަހަރު އެވެ. ނަމަވެސް އެތަން ރަސްމީކޮށް ހުޅުވާފައެއް ނުވެ އެވެ. އަދި މުވައްޒަފުންނާއި ތަކެތީގެ ދަތިކަމާ ހެދި 17 ވަނަ ފްލޯއިން 19 ވަނަ ފްލޯއާ ހަމައަށް ބޭނުމެއް ނުކުރެ އެވެ.