ރިޔާސީ އިންތިހާބުގައި ވާދަކުރެއްވުމާ ގުޅޭ ގޮތުން އިބޫ ޖަވާބެއް ނުދެއްވި!

މީގެ ހަތަރު އަހަރު ފަހުން 2028 ގައި ބާއްވާ ރިޔާސީ އިންތިހާބުގައި ވާދަކުރެއްވުމާ ގުޅޭ ގޮތުން ދެންނެވި ސުވާލަށް ކުރީގެ ރައީސް އިބްރާހިމް މުހައްމަދު ސޯލިހު (އިބޫ) ވަކި ޖަވާބެއް ނުދެއްވައި އެ މަނިކުފާނުގެ ވިސްނުންފުޅު ފަހުން ހާމަކުރައްވާނެ ކަމަށް މިއަދު ވިދާޅުވެއްޖެ އެވެ.

އިބޫ އެހެން ވިދާޅުވީ، ރާއްޖެ ޓީވީގެ "ފަށާއިރު" ޕްރޮގްރާމްގައި ޕްރެޒެންޓަރު ކުރެއްވި ސުވާލެއްގެ ޖަވާބުގަ އެވެ.

ދެހާސް އަށާވީސް ވަނަ އަހަރުގެ ރިޔާސީ އިންތިހާބަށް ވާދަކުރެއްވުމުގެ ޝައުގުވެރިކަން އެބަހުރިތޯ ތަކުރާރުކޮށް ސުވާލު ދެންނެވުމުން އިބޫ ވިދާޅުވީ، އެ މަނިކުފާނުގެ ސިޔާސީ ކުރިމަގާ ބެހޭ ގޮތުން އެމްޑީޕީގެ އިސްވެރިންނާ ވާހަކަފުޅު ދައްކަވާފައިވާ ކަަމަށާއި ކުރިއަށް ވަޑައިގަންނަވާނެ ގޮތް ވެސް އެ ބޭފުޅުންނާ ހިއްސާ ކުރައްވާފައިވާ ކަމަށެވެ.

"އަޅުގަނޑުގެ ސިޔާސީ ހަޔާތާއި އަޅުގަނޑުގެ ކުރިމަގާ ބެހޭ ގޮތުން ޕާޓީގެ އިސްވެރިންނާ އަޅުގަނޑު ވާނީ ވާހަކަ ދައްކާފައި. އެކަން އަޅުގަނޑު ކުރިއަށް ގެންދާނެ ގޮތް އެ ބޭފުޅުންނަށް އެނގިވަޑައިގަންނަވާނެ މިހާރު، ޝައްކެއް ނެތް މިންވަރަށް،" އިބޫ ވިދާޅުވި އެވެ.

އިބޫ ވިދާޅުވި ގޮތުގައި އެމްޑީޕީގެ ރިޔާސީ ޕްރައިމަރީގައި ވާދަ ކުރެއްވުމަށް "ހަތަރު ފަސް" މެމްބަރަކު މިހާރު ވެސް ޝައުގުވެރިކަން ފާޅުކުރައްވާފައިވެ އެވެ. އެއީ ވަރަށް ރަނގަޅު ކަމެއްގެ ގޮތުގައި ސިފަ ކުރައްވައި، އެ މަނިކުފާނު ވިދާޅުވީ ވާދަވެރި އެތެރޭގެ އިންތިހާބެއް ކުރިއަށް ގެންދިއުމަކީ ވަރަށް މުހިއްމު ކަމެއް ކަމަށެވެ.

އިބޫ ވިދާޅުވީ ރިޔާސީ އިންތިހާބަށް ޝައުގުވެރިވިޔަސް ޕާޓީއާ އެކު ކުރިއަށް ދިއުމަކީ މުހިއްމު ކަމެއް ކަމަށެވެ.

"މިއަދު އަޅުގަނޑުމެން މިއޮތް ހާލަތަކީ އަދި އަށާވީސް އަންނަން ވާއިރަށް ވެސް ކުރަންޖެހޭ ބައިވަރު މަސައްކަތްތައް އެބަހުރި. އަޅުގަނޑުގެ ވިސްނުން އަޅުގަނޑު ޕަބްލިކަަށް ހާމަކުރާނަން،" އެ މަނިކުފާނު ވިދާޅުވި އެވެ.

އެކަމަކު ސުވާލަށް ސީދާ ޖަވާބެއް ނުދެއްވުމުން، ޕްރެޒެންޓަރު ވަނީ އެމްޑީޕީގެ އެތެރެއިން ޝައުގުވެރިވާ މީހުންނަށް ފަރުސަތު ދެއްވުމަށް ފަހު، އެ މަނިކުފާނު އެއް ފަރާތަށް ޖެހިވަޑައިގަންނަވަނީތޯ ސުވާލު އުފައްދައިފަ އެވެ.

އެއާ އެކު އިބޫ ވިދާޅުވީ "އަޅުގަނޑު އޮންނާނީ ދަންނަވާފައި ހުރިހާ ބޭފުޅުންނަށް ކުރިއަށް ވަޑައިގަންނަވަން،" ކަމަށެވެ.

އިންތިހާބުގައި ވާދަކުރެއްވުމާ ގުޅޭ ގޮތުން އަދި ވަކި ގޮތެއް ނުނިންމަވަނީތޯ އެއްސެވުމުން އިބޫ ވިދާޅުވީ، އެކަމާ ގުޅިގެން އެ މަނިކުފާނު ނިންމެވި ނިންމެވުމުން މިއަދު އާންމުކޮށްފި ނަމަ އޭގެ ސަބަބުން ޕާޓީ އަށް ލިބޭ ފައިދާ އަށް ވުރެ ކުރިމަތިވެދާނެ ގެއްލުން ބޮޑުވެދާނެ ކަމަށް ފެނިވަޑައިގަންނަވާ ކަމަށެވެ.

އެކަމަކު އާންމުންނަށް އެ ނިންމުން އާންމުކުރަންޖެހޭ ހިސާބުން އާންމުކުރައްވާނެ ކަމަށް ވެސް ވިދާޅުވި އެވެ.

"ޕާޓީގެ އިސް ސަފުގައި ތިއްބެވި ވަރަށް ގިނަ ބޭފުޅުންނަށް އެނގިވަޑައިގަންނަވާނެ އަޅުގަނޑުގެ ނިންމުން. ޕަބްލިކަަށް އަޅުގަނޑު ހިތުން، އޭގައި ނަގާފައި އޮތް ޑިސިޝަން ހާމަކޮށްފިއްޔާ ޕާޓީއަށް ލިބޭ ފައިދާއަށް ވުރެ ލިބޭ ގެއްލުން ބޮޑުވެދާނެހެން އަޅުގަނޑަށް ހީވަނީ. އެކަމަކު އަޅުގަނޑު ހާމަކުރާނަން. އެކަން ކުރަންޖެހޭނެތާ،" 2028 ގެ އިންތިހާބުގައި ވާދަކުރާނެތޯ ތަކުރާރުކޮށް އެހުމުން އިބޫ ވިދާޅުވި އެވެ.

އިބޫ ވިދާޅުވި ގޮތުގައި އެ މަނިކުފާނަކީ އެމްޑީޕީ އަށް ވެރިކަން ކާމިޔާބުކުރުމަށް އޮތް "ހުރަހަކަށް" ނުވާނެ އެވެ.

އިބޫ އެގޮތަށް ވިދާޅުވިއިރު އެމްޑީޕީގެ އެތެރޭގެ ކޯޅުން ބޮޑުވެ، އެ ޕާޓީ ތެރެއިން އެހެން ޕާޓީއެއް އުފަންވީ ވެސް ބަރުލަމާނީ ނިޒާމަށް އޭރު އިބޫ ތާއީދު ނުކުރެއްވުމުންނެވެ. އެމްޑީޕީގެ ރިޔާސީ ޕްރައިމަރީން ކުރީގެ ރައީސް މުހައްމަދު ނަޝީދަށް ނާކާމިޔާބުވެވަޑައިގަތުމުން ޑިމޮކްރެޓްސް އުފައްދައި މަސައްކަތްޕުޅު ކުރެއްވީ އިބޫގެ ވެރިކަން ނިންމުމަކަށް ގެނައުމަށެވެ.

މިދިޔަ އަހަރުގެ ރިޔާސީ އިންތިހާބުގެ ދެވަނަ ބުރުގައި ވެސް ޑިމޮކްރެޓްސް އިން ނިންމީ އެމްޑީޕީ އާއި ޕީޕީއެމްގެ ތެރެއިން އެއްވެސް ޕާޓީއަކަށް ތާއީދު ނުކުރުމަށެވެ.

ރިޔާސީ އިންތިހާބުގައި ވާދަކުރެއްވުމާ ގުޅޭ ގޮތުން ނިންމެވި ނިންމެވުން އިބޫ ހާމަނުކުރެއްވިޔަސް ކުރީގެ ރައީސް އަބްދުﷲ ޔާމީން ވަނީ ގައި ޖަލު ހުކުމެއްގައި ބަންދު ނުކޮށްފި ނަމަ އެ އިންތިހާބުގައި ވާދަކުރައްވާނެ ކަމަށް ވިދާޅުވެފަ އެވެ.

ރިޔާސީ ދެވަނަ ދައުރަކަށް ކުރިމަތިލެއްވުމާ ގުޅޭ ގޮތުން މިހާރުގެ ރައީސް ޑރ. މުހައްމަދު މުއިއްޒު އަދި ވަކި އެއްޗެއް ވިދާޅެއް ނުވެ އެވެ.