މިސް ޔުނިވާސްގައި ޝައިނާ ދުނިޔެއަށް ދައްކާލީ ދިވެހި ލިބާސް

މިސް ޔުނިވާސް މުބާރާތުގައި ވާދަކުރާ ރާއްޖޭގެ މަރިޔަމް ޝައިނާ ނަސީމް ދިވެހި ލިބާހުގެ ރީތިކަން މުޅި ދުނިޔެެއަށް ދައްކާލައިފި އެވެ.

މިދިޔަ ހޯމަ ދުވަހު މެކްސިކޯގައި ފެށި މިސް ޔުނިވާސް މުބާރާތުގައި ރޭ ބޭއްވީ ޕްރިލިމިނަރީ ރައުންޑްތަކެވެ. އޭގެ ތެރޭގައި ހުރިހާ ގައުމުތަކެއްގެ "ގައުމީ ހެދުން" ދައްކާލުން ހިމެނެ އެވެ.

އުމުރުން 21 އަހަރުގެ މޮޑެލް، ޝައިނާ، ބޯވަޅު އެޅި ރަތް ލިބާހުގައި ފެނުނީ ވަރަށް ދިވެހިވަންތަކޮށެވެ. ފައްޓަރުބައިން ލިބާހުގެ ނަލަކަން އިތުރަށް ފުރިހަމަކޮށްލާފައިވެ އެވެ. ފޭލި އަނދެ އުކުޅުގައި އަތް ވިދެލައިގެން ހުރެ ޝައިނާ މުޅި ދުނިޔެއަށް ދައްކާލީ ސައްތައިން ސައްތަ ދިވެހިކަމެވެ.

މުބާރާތުގައި ދެން އޮންނާނީ 25 ފައިނަލިސްޓުން ހޮވުމެވެ. އޭގެ އިތުރުން އެމެރިކާ، ކެރިބިއަން، ޔޫރަޕް، އެފްރިކާ، އޭޝިއާ އަދި އޯޝަނިއާއިން ހަތަރު ރީޖަނަލް ކެންޑިޑޭޓުން ހޮވާނެ އެވެ.

ސެމީ-ފައިނަލިސްޓް ހޮވާނީ އާންމުންގެ ވޯޓުންނެވެ.

މާދަމާ، ފައިނަލަށް 12 ބައިވެރިން ހޮވާއިރު ގްރޭންޑް ފިނާލޭ އޮންނާނީ އަންނަ އާދިއްތަ ދުވަހު އެވެ.

މިސް ޔުނިވާސް މުބާރާތުގައި ޝައިނާ ބައިވެރިވީ ރާއްޖޭގެ އިވެންޓް މެނޭޖުމަންޓް ކުންފުނި "ހީ އެންޑް ޝީ މޯލްޑިވްސް"ގެ ފަރާތުން ފަހިކޮށްދިން ފުރުސަތެއްގަ އެވެ. ހީ އެންޑް ޝީއަކީ އިންޓަނޭޝަނަލް ބިއުޓީ ޕެޖެންޓް ފްރެންޗައިޒް "ޓޮޕް މޮޑެލް" ވެސް ރާއްޖެއަށް ތައާރަފުކުރި ކުންފުންޏެވެ.

ޝައިނާ ވަނީ "ޓޮޕް މޮޑެލް މޯލްޑިވްސް 2022" ކާމިޔާބުކޮށްފަ އެވެ. ޝައިނާ ވަނީ މިދިޔަ އަހަރު މިސްރުގައި ބޭއްވި "ވޯލްޑް ޓޮޕް މޮޑެލް"ގައި ވެސް ބައިވެރިވެ، ގަދަ 15 ގައި ހިމެނިފަ އެވެ. އެއީ އެ މުބާރާތުގެ ގަދަ 15 ގައި ރާއްޖެ ހިމެނުނު ވެސް ފުރަތަމަ ފަހަރެވެ. އަދި އެ މުބާރާތުގައި "ނިއު ފޭސް"ގެ އެވޯޑު ވެސް ޝައިނާ ހޯދި އެވެ.

މިސް ޔުނިވާސް މުބާރާތުގައި މި އަހަރު 130 ގައުމަކުން ބައިވެރިވެ އެވެ. މިއީ، މި މުބާރާތް ބާއްވާ 73 ވަނަ އަހަރެވެ. މި އަހަރުގެ މިސް ޔުނިވާސްގައި އަލަށް ބައިވެރިވާ ގައުމުތަކުގެ ތެރޭގައި ބެލަރުސް، އެރިތުރިއާ، ގިނިއާ، އީރާން، މަކާއު، މޮލްޑޯވާ، ނޯތު މެކެޑޯނާ، ސޯމާލިއާ، ޔޫއޭއީ އަދި އުޒުބެކިސްތާން ވެސް ހިމެނެ އެވެ.