ސަރުކާރުގެ ބައިވެރިވުމެއް ނެތް، މިސް ޔުނިވާސްގައި ބައިވެރިވުން ހުއްޓާލަން ގޮވާލައިފި

ރީތީގެ މުބާރާތް، މިސް ޔުނިވާސްގައި ދިވެއްސަކު އަމިއްލަ އަށް ބައިވެރިވާން ނިންމާފައި ވިޔަސް އެއީ ސަރުކާރުގެ ބައިވެރިވުމެއް އޮތް ކަމެއް ނޫން ކަމަށާއި އެކަން ހުއްޓާލަން ސަރުކާރުން މިއަދު ގޮވާލައި، ނޫސްބަޔާނެއް ނެރެފި އެވެ.

ޔޫތު މިނިސްޓްރީން ނެރުނު ނޫސްބަޔާނެއްގައި ބުނީ، މެކްސިކޯގައި ބޭއްވުމަށް ހަމަޖެހިފައިވާ މި އަހަރުގެ މިސް ޔުނިވާސް މުބާރާތުގައި ރާއްޖެ ތަމްސީލުކުރުމަށް ދިވެއްސަކު ބައިވެރިވަނީ ދިވެހި ސަރުކާރުގެ އެއްވެސް ބައިވެރިވުމެއް އޮވެގެން ނޫން ކަމަށެވެ. އަދި އެއީ ދިވެހި ސަރުކާރުން ބަލައިގަންނަ ކަމެއް ނޫން ކަމަށް ވެސް އެ ބަޔާނުގައި ބުންޏެވެ.

ސަރުކާރުން ބުނިގޮތުގައި، ދިވެހިންގެ ދީނާއި އަގީދާއި ސަގާފަތާ ނުގުޅޭ މުބާރާތްތައް ބޭއްވުމާއި އެކިއެކި ފަރާތްތަކުން ބާއްވާ އެ ކަހަލަ މުބާރާތްތަކާއި ހަރަކާތްތަކުގައި ބައިވެރިވުމަކީ ދިވެހި ސަރުކާރުން ބަލައިގަންނަ ކަމެއް ނޫނެވެ.

"އަދި، އެފަދަ ކަންކަމަކީ، ދިވެހިން ގަބޫލުކުރާ އާންމު އަހުލާގީ މިންގަނޑުތަކާއި އުސޫލުތަކާ ވެސް ހިލާފު ކަންކަމަށް ވާއިރު، ރާއްޖެ ތަމްސީލުކުރުމުގެ ނަމުގައި ދިވެއްސަކު އެފަދަ ހަރަކާތަކަށް ދިއުން ދިވެހި ސަރުކާރުން ކުށްވެރިކުރަމެވެ،" އެ ބަޔާނުގައިވެ އެވެ.

މިސް ޔުނިވާސް މުބާރާތުގައި ބައިވެރިވުމަށް މަސައްކަތްކުރަމުން އަންނަ ބައިވެރިޔާ އެކަން ހުއްޓާލުމަށް ވެސް މިނިސްޓްރީގެ ބަޔާނުގައި ގޮވާލާފައިވެ އެވެ.

މި ކަހަލަ މުބާރާތެއް ދިވެއްސަކު ބައިވެރިވުމަކީ ސަރުކާރު ކުރާނެ ކަމަށް ނޫން ކަމަށާއި އެހެން ދޭހަވާ ގޮތަށް ވާހަކަތައް ނުފަތުރަން ވެސް ސަރުކާރުން ގޮވައިލި އެވެ.

މި އަހަރުގެ މިސް ޔުނިވާސްގައި ބައިވެރިވާ ދިވެއްސަކީ އުމުރުން 21 އަހަރުގެ މޮޑެލް، މަރިޔަމް ޝައިނާ ނަސީމެވެ. މިއީ، މި މުބާރާތުގައި ދިވެއްސަކު ބައިވެރިވާ ފުރަތަމަ ފަހަރެވެ.

އެއްވެސް ގައުމަކުން، އެއްވެސް އިރަކު މި މުބާރާތުގައި ބައިވެރިވަނީ އެ ގައުމެއްގެ ސަރުކާރުގެ ފަރާތަކުން ނޫނެވެ. އެ ފުރުސަތު ފަހިކޮށްދެނީ އަމިއްލަ ކުންފުނިތަކުންނެވެ.

މިސް ޔުނިވާސް މުބާރާތުގައި ޝައިނާ ބައިވެރިވީ ރާއްޖޭގެ އިވެންޓް މެނޭޖުމަންޓް ކުންފުނި "ހީ އެންޑް ޝީ މޯލްޑިވްސް"ގެ ފަރާތުން ފަހިކޮށްދިން ފުރުސަތެއްގަ އެވެ. އެ ކުންފުންޏަަށް މި ފުރުސަތު ފަހިކޮށްދިނީ އެ މުބާރާތުގެ ފްރެންޗައިޒް ރައިޓްސް ހޯލްޑްކުރާ ރޮމޭނިއާގެ ކުންފުންޏެއްގެ ފަރާތުންނެވެ.

ހީ އެންޑް ޝީއަކީ އިންޓަނޭޝަނަލް ބިއުޓީ ޕެޖެންޓް ފްރެންޗައިޒް "ޓޮޕް މޮޑެލް" ވެސް ރާއްޖެއަށް ތައާރަފުކުރި ކުންފުންޏެވެ.

މި އަހަރުގެ މިސް ޔުނިވާސް މުބާރާތް ބާއްވަނީ އަންނަ މަހުގެ 14 އިން 16 އަށް މެކްސިކޯގަ އެވެ.

މިސް ޔުނިވާސް މުބާރާތުގައި މި އަހަރު 130 ގައުމަކުން ބައިވެރިވެ އެވެ. މިއީ، މި މުބާރާތް ބާއްވާ 73 ވަނަ އަހަރެވެ.

މި އަހަރުގެ މިސް ޔުނިވާސްގައި އަލަށް ބައިވެރިވާ ގައުމުތަކުގެ ތެރޭގައި ބެލަރުސް، އެރިތުރިއާ، ގިނިއާ، އީރާން، މަކާއު، މޮލްޑޯވާ، ނޯތު މެކެޑޯނާ، ސޯމާލިއާ، ޔޫއޭއީ އަދި އުޒުބެކިސްތާން ވެސް ހިމެނެ އެވެ.