މިސް ޔުނިވާސްގެ ތާޖު ޑެންމާކުގެ ވިކްޓޯރިއާ އަށް

ޑެންމާކުގެ ރީތީގެ ރާނީ ވިކްޓޯރިއާ ކެޖާ ތެއިލްވިގް މިސް ޔުނިވާސްގެ ތާޖު އެ ގައުމަށް ފުރަތަމަ ފަހަރަށް ހޯދައިދީފި އެވެ.

މެކްސިކޯ ސިޓީގައި ބޭއްވި މި މުބާރާތުގެ 73 ވަނަ އެޑިޝަންގައި 120 އަށް ވުރެ ގިނަ ބައިވެރިންގެ މައްޗަށް ކާމިޔާބު ހޯދި އުމުރުން 21 އަހަރުގެ ވިކްޓޯރިއާ އަކީ ނެށުންތެރިއެއްގެ އިތުރުން ވިޔަފާރިވެރިއެކެވެ. އަދި އޭނާ އަކީ ޖަނަވާރުންގެ ހައްގުތަކަށް މަސައްކަތް ކުރާ އެކްޓިވިސްޓެއް ވެސް މެ އެވެ.

މުބާރާތުގެ ފަސްޓް ރަނަރަޕް އަކަށް ހޮވުނީ ނައިޖީރިއާ ތަމްސީލްކުރި، ގާނޫނީ ދާއިރާއިން ކިޔަވަމުން އަންނަ ޗިޑިމްމާ އެޑެޓްޝިނާ އެވެ. އޭނާގެ ފަހަތުން ވަނަތައް ހޯދީ މެކްސިކޯގެ މާރިއާ ފެނާންޑޭޒް ބެލްޓްރަން އާއި ތައިލެންޑްގެ ސުޗާޓާ ޗުއަންގްސްރީ އަދި ވެނެޒުއޭލާގެ އިލިއާނާ މާކޭޒް އެވެ.

އެޑެޓްޝިނާ އަކީ މީގެ ކުރިން މިސް ސައުތު އެފްރިކާގެ ފައިނަލިސްޓެކެވެ. ނަމަވެސް އޭނާގެ ގައުމީ ނިސްބަތާ މެދު ސުވާލު އުފެދި އެންމެ ފަހުން އޭނާއަށް ނައިޖީރިއާ ތަމްސީލު ކުރަން މަޖުބޫރުވީ އެވެ.

އުމުރުން 28 އަހަރުގެ މާކޭޒް މީގެ ކުރިން ވަނީ މިސް ވެނެޒުއޭލާގެ ތާޖު ހާސިލްކުރި ފުރަތަމަ މަންމަގެ ގޮތުގައި ތާރީހުން ޖާގަ ހޯދައިފަ އެވެ.

މުބާރާތުގައި 2023 ވަނަ އަހަރު ވަނީ ކައިވެނިކޮށްގެން އުޅޭ މީހުންނާއި ޕްލަސް ސައިޒް އަދި ޓްރާންސްޖެންޑާ މީހުން ވެސް ބައިވެރިކޮށްފަ އެވެ. އަދި މިފަހަރުގެ މުބާރާތުގައި 28 އަހަރުން މަތީގެ މީހުން ވެސް ބައިވެރިކުރި އެވެ. މީގެ ކުރިން މި މުބާރާތުގައި ބައިވެރިވެވޭ އެންމެ މަތީ އުމުރަކީ އެއީ އެވެ.

މީގެ ތެރޭގައި އުމުރުން 40 އަހަރުގައި ގްރޭންޑް ފިނާލޭއަށް ދިޔަ އެންމެ ދުވަސްވީ އަންހެން މީހާގެ ޝަރަފު ހޯދި މޯލްޓާގެ ބީޓްރިސް އެންޖޯޔާ ވެސް ހިމެނެ އެވެ.

މިއީ މެކްސިކޯއިން މި މުބާރާތް ބާއްވާ ފަސް ވަނަ ފަހަރެވެ. އެކަމަކު މިއީ އަންހެންވަންތަކަމާ މެދު ގަބޫލުކުރާ ބޯދާ ވިސްނުންތައް ޕްރޮމޯޓްކުރާ އިވެންޓެއްގެ ގޮތުގައި މިހާރު ފާޑުކިޔުން އަމާޒުވެ އެވެ.

ތައިލެންޑްގެ މީޑިއާ ދާއިރާގައި ބާރުގަދަ އަދި ޓްރާންސްޖެންޑާ ރައިޓްސް އަށް ކެމްޕޭނުކުރާ އޭން ޖަކަޕޮންގް ޖަކްރާޖުތާޓިޕް އިސްކޮށް ހަރަކާތްތެރިވާ ޖޭކޭއެން ގްލޯބަލް ގްރޫޕުން މި މުބާރާތުގެ ރައިޓްސް ގަތުމަށް ފަހު، މި މުބާރާތް ތަރައްގީކޮށް ރީބްރޭންޑް ކުރަން ވަނީ މަސައްކަތްކޮށްފަ އެވެ.

މެކްސިކޯގެ ލެގަސީ ހޯލްޑިން އިން މިދިޔަ ޖެނުއަރީ މަހު ވަނީ މިސް ޔުނިވާސްގެ 50 ޕަސެންޓް ހިއްސާ ގަނެފަ އެވެ.