ސައުތު އެފްރިކާގެ ފުޓްބޯޅަ ރައީސަށް ކޮރަޕްޝަނުގެ ދައުވާ

ސައުތު އެފްރިކަން ފުޓްބޯލް އެސޯސިއޭޝަން (ސަފާ) ގެ ރައީސް ޑެނީ ޖޯޑާން އެ ޖަމިއްޔާގެ ވަސީލަތްތައް އަމިއްލަ މަންފާއާށް ބޭނުންކުރެއްވި ކަމުގެ ތުހުމަތުގައި ހައްޔަރުކޮށް ހިޔާނާތުގެ ދައުވާ އުފުލައިފި އެވެ.

ސައުތު އެފްރިކާ އަށް 2010 ގެ ވޯލްޑް ކަޕް ބޭއްވުމުގެ ފުރުސަތު ހޯދައިދޭން އިސް ދައުރެއް އަދާކުރެއްވި ޖޯޑާން ވަނީ މިހާރު ކަފާލާތުގެ ދަށުން މިނިވަންވެފަ އެވެ. އެކަމަކު މައްސަލަ އަންނަނީ ޖޮހެނެސްބާގުގެ ކޯޓެއްގައި ހިނގަމުންނެވެ. ޖޯޑާން ވަނީ ދައުވާތަކަށް އިންކާރުކުރައްވައިފަ އެވެ.

އޭނާގެ މައްޗަށް ކުރާ ތުހުމަތުތަކުގެ ތެރޭގައި ޖަމިއްޔާގެ ފައިސާ ބޭނުންކުރައްވައިގެން އަމިއްލަ ހިމާޔަތަށް ޕްރައިވެޓް ސެކިއުރިޓީން ހޯދުމާއި ހުއްދަ ނެތި ޕަބްލިކް ރިލޭޝަންސް ކުންފުންޏެއްގެ އެހީ ހޯދުމެވެ. އޭނާއާ އެކު ޖަމިއްޔާގެ ޗީފް ފައިނޭންޝަލް އޮފިސަރު ގްރޯނީ ހުލުޔޯ އާއި އެ ދައުވާގައި ބުނެފައިވާ ކުންފުނީގެ ވެރިޔާ ޓްރެވާ ނީތުލިން ވެސް ހައްޔަރުކުރި އެވެ.

ޖޯޑާން އަކީ 2010 ގެ ވޯލްޑް ކަޕް އިންތިޒާމުކުރެއްވުމުގެ އިސް މޭސްތިރި ވެސް މެ އެވެ. އަދި އޭނާ ވަނީ އޭގެ ކުރީ ވޯލްޑް ކަޕުގެ އޯގަނައިޒިން ކޮމިޓީގައި ވެސް މަސައްކަތްކުރައްވައިފަ އެވެ. ފީފާގެ މާކެޓިން އެންޑް ޓެލެވިޒަން ބޯޑުގެ މެމްބަރުކަން 1998 އިން ފެށިގެން ކުރައްވަމުން އަންނަ ޖޯޑާން ސައުތު އެފްރިކާގެ ފުޓްބޯޅަ އެސޯސިއޭޝަނުގެ ރައީސްގެ މަގާމަށް ވަޑައިގެންނެވީ 2013 ގަ އެވެ.